បារាំង៖G៧ និយាយមិនចុះសម្រុងគ្នាជុំវិញការគ្រប់គ្រងពួកជីហាតបរទេសនៅស៊ីរី និងអ៊ីរ៉ាក់
រដ្ឋមន្រ្តីក្រសួងមហាផ្ទៃនៃក្រុមប្រទេសមហាអំណាចឧស្សាហកម្មក្នុងលោកហៅកាត់ G៧ បិទបញ្ចប់កិច្ចប្រជុំរយៈពេល ២ថ្ងៃក្នុងប្រទេសបារាំងនាថ្ងៃសុក្រ ទី៥ មេសា។ តាមរដ្ឋមន្រ្តីក្រសួងមហាផ្ទៃបារាំងលោក Christophe Castaner ភាពមិនចុះសម្រុងគ្នារវាងប្រទេសសមាជិក G៧ បានកើតមានលើការគ្រប់គ្រងពួកជីហាតបរទេស រួមទាំងគ្រួសាររបស់ពួកគេដែលកំពុងមានវត្តមាននៅក្នុងទឹកដីនៃប្រទេសស៊ីរី និងអ៊ីរ៉ាក់។ តែទន្ទឹមគ្នានេះ G៧ បានឯកភាពគ្នាលើយុទ្ធនាការប្រឆាំងនឹងការប្រើប្រព័ន្ធអ៊ីនធ័រនែតពីសំណាក់ក្រុមជ្រុលនិយមដើម្បីឃោសនាមនោគមន៍ភេរវនិយម ឬជ្រុលនិយម។
ចុះផ្សាយនៅថ្ងៃ៖
ស្តាប់ - ០២:១៦
តាំងពីជម្រកចុងក្រោយរបស់អង្គការរដ្ឋអ៊ីស្លាមក្នុងទឹកដីស៊ីរីត្រូវបានវាយកម្ទេចមក សហគមន៍អន្តរជាតិកំពុងខ្វាយខ្វល់ខ្លាំងពីវត្តមានពួកជីហាតបរទេសនៅក្នុងទឹកដីស៊ីរី និងអ៊ីរ៉ាក់។ នៅក្នុងកិច្ចប្រជុំថ្នាក់រដ្ឋមន្រ្តីក្រសួងមហាផ្ទៃ G៧ បានព្រមព្រៀងគ្នាពីភាពចាំបាច់ក្នុងការគ្រប់គ្រងប្រមូលផ្តុំពួកជីហាតបរទេស និងក្រុមគ្រួសាររបស់ពួកគេ ពោលកុំឲ្យមានការរត់បែកខ្ញែកគ្នា។ វិធានការបន្ទាប់ គឺផ្តើមពិនិត្យមើលលើករណីរបស់ពួកជីហាតម្នាក់ៗដែលត្រូវកាត់ទោស និងត្រូវទទួលទោស។ គឺនីតិវិធីកាត់ទោស និងទទួលទោសនេះហើយដែល G៧ ពិបាកនិយាយចុះសម្រុងគ្នា និងមានជំហរមិនដូចគ្នាទេ។
សមាជិក G៧ ភាគច្រើន ពិសេសបារាំង និងអាល្លឺម៉ង់ចង់ឲ្យកាត់ទោសពួកជីហាតបរទេសទាំងនោះនៅក្នុងបណ្តាប្រទេសក្នុងតំបន់ តែភាគីអាមេរិកចង់ឲ្យមានការទទួលយក និងកាត់ទោសពួកជីហាតបរទេសទាំងនោះពីសំណាក់រដ្ឋអំណាចនៅក្នុងប្រទេសកំណើតរបស់ពួកគេ។ « ជំហររបស់យើង គឺត្រូវបញ្ជូនពួកជីហាតទាំងអស់នោះទៅប្រទេសកំណើតរបស់គេវិញ ហើយយើងនឹងធ្វើការរួមគ្នាជាមួយដៃគូរបស់យើងដើម្បីធានាថា ពួកជីហាតទាំងនោះនឹងត្រូវទទួលការកាត់ទោស » នេះជាការរម្លឹករបស់អនុរដ្ឋមន្រ្តីក្រសួងសន្តិសុខផ្ទៃក្នុងអាមេរិក។
ក្រៅពីប្រធានរឿងពួកជីហាតបរទេស G៧ ក៏បាននិយាយពីយុទ្ធនាការប្រឆាំងនឹងការប្រើប្រព័ន្ធអ៊ីនធ័រនែតពីសំណាក់ក្រុមភេរវជន ឬក្រុមជ្រុលនិយមដើម្បីឃោសនា និងជ្រើសរើសសកម្មជនរបស់ពួកគេ។ នៅក្នុងករណីនេះ G៧ បានព្រមព្រៀងគ្នាពីភាពចាំបាច់ដើម្បីទាមទារឲ្យក្រុមហ៊ុនអ៊ីនធ័រនែតចាត់វិធានការគ្រប់យ៉ាងក្នុងការប្រឆាំងនឹងការផ្សព្វផ្សាយព័ត៌មានដែលមានលក្ខណៈភេរវនិយម ឬជ្រុលនិយម។ ប្រទេសខ្លះក្នុងក្រុម G៧ អាចជ្រើសរើសការអនុម័តច្បាប់ជាតិ ឬតំបន់ដើម្បីបង្ខំក្រុមហ៊ុនអ៊ីនធ័រនែតឲ្យដកព័ត៌មានដែលមានលក្ខណៈភេរវនិយម ឬជ្រុលនិយមទាំងនោះចេញពីគេហទំព័រក្នុងរយៈពេល ១ម៉ោង។
ចុងបញ្ចប់ រដ្ឋមន្រ្តីក្រសួងមហាផ្ទៃនៃក្រុម G៧ បានស្នើឲ្យមានការវាយតម្លៃលើហានិភ័យដែលពាក់ព័ន្ធនឹងការដាក់ឲ្យប្រើប្រាស់នូវប្រព័ន្ធទូរគមនាគមន៍ជំនាន់ថ្មីហៅថា ៥G៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ