Brexit៖នាយករដ្ឋមន្រ្តីអង់គ្លេសបានសុំអាល្លឺម៉ង់ និងបារាំងឲ្យជួយគាំទ្រលើសំណើសុំលើកពេលចេញពីអឺរ៉ុប
នៅថ្ងៃពុធ ទី១០ មេសា សហភាពអឺរ៉ុបបើកកិច្ចប្រជុំដើម្បីពិនិត្យសំណើសុំលើកពេល Brexit របស់លោកស្រីនាយករដ្ឋមន្រ្តីអង់គ្លេសតេរ៉េហ្សា មេ។ លោកស្រីមេដែលបានសុំលើកពេលចេញពីអឺរ៉ុបរហូតដល់ថ្ងៃទី៣០ មិថុនា។ នេះជាលើកទី២ ដែលលោកស្រីមេបានសុំពន្យារពេលចេញរបស់អង់គ្លេស ព្រោះបើតាមកិច្ចព្រមពៀងដែលលោកស្រីមេបានចុះហត្ថលេខាជាមួយអឺរ៉ុបក្នុងខែវិច្ឆិកា ឆ្នាំ ២០១៨ អង់គ្លេសត្រូវចេញពីអឺរ៉ុបជាផ្លូវការក្នុងថ្ងៃទី២៩ មីនា។ ដើម្បីអាចទទួលបានការយល់ព្រមពន្យារពេលពីអឺរ៉ុបជាថ្មី លោកស្រីមេបានទៅសុំអាល្លឺម៉ង់ និងបារាំងឲ្យជួយគាំទ្រនាថ្ងៃអង្គារ ទី៩ មេសា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
បន្ទាប់ពីបានជួបសន្ទនាជាមួយសមភាគីអាល្លឺម៉ង់លោកស្រីមែរកិលក្នុងទីក្រុងប៊ែរឡាំងនារសៀលថ្ងៃអង្គារ ទី៩ មេសា លោកស្រីមេបានបន្តដំណើរទៅជួបប្រធានាធិបតីបារាំងលោកម៉ាក្រុងក្នុងទីក្រុងប៉ារីស។ កម្មវត្ថុរបស់លោកស្រីមេ គឺសុំឲ្យអាល្លឺម៉ង់ និងបារាំងក្នុងនាមជាប្រទេសស្ថាបនិកអឺរ៉ុបជួយគាំទ្រលើសំណើរបស់លោកស្រីដែលសុំពន្យារពេល Brexit រហូតដល់ថ្ងៃទី៣០ មិថុនា។ នេះជាសំណើសុំលើកពេលលើកទី២ បន្ទាប់ពីអឺរ៉ុបបានយល់ព្រមលើកពេលលើកទី១ រហូតដល់ថ្ងៃសុក្រ ទី១២ មេសា។ វត្តមានរបស់លោកស្រីមេក្នុងទីក្រុងប៉ារីស និងប៊ែរឡាំងពេលនេះបានធ្វើឡើង មួយថ្ងៃមុនអឺរ៉ុបបើកជំនួបកំពូលក្នុងថ្ងៃពុធ ទី១០ មេសាដើម្បីពិនិត្យសំណើសុំលើកពេល Brexit លើកទី២ របស់លោកស្រីមេ។
បើអឺរ៉ុបច្រានចោលលើសំណើសុំពន្យារពេលលើកទី២ រហូតដល់ថ្ងៃទី៣០ មិថុនារបស់លោកស្រីមេ អង់គ្លេសនឹងត្រូវចេញពីអឺរ៉ុបនៅរំលងអធ្រាត្រយប់ថ្ងៃសុក្រ ទី១២ ឆ្លងចូលថ្ងៃសៅរ៍ ទី១៣ មេសាដោយគ្មានកិច្ចព្រមព្រៀង។ តែបើតាមមើលទៅ អឺរ៉ុបប្រហែលជាមិនបដិសេធលើសំណើសុំលើកពេលជាថ្មីរបស់លោកស្រីមេរហូតដល់ថ្ងៃទី៣០ មិថុនាទេ ព្រោះអឺរ៉ុបក៏មិនចង់ឃើញអង់គ្លេសចាកចេញដោយគ្មានកិច្ចព្រមព្រៀងដែរ។ តែប្រភពអ្នកការទូតអឺរ៉ុបឲ្យដឹងថា សម្បទានជាថ្មីរបស់អឺរ៉ុបនឹងអាចមានលក្ខខណ្ឌ។ លក្ខខណ្ឌនោះ គឺសភាអង់គ្លេសត្រូវអនុម័តទទួលយកកិច្ចព្រមព្រៀង Brexit ដែលលោកស្រីមេបានចុះហត្ថលេខាជាមួយអឺរ៉ុបកាលពីខែវិច្ឆិកា ឆ្នាំ ២០១៨ ឲ្យបានមុនថ្ងៃទី២២ ឧសភាខាងមុខ។
គួររម្លឹកថា សភាអង់គ្លេសធ្លាប់បានបោះឆ្នោតច្រានចោលកិច្ចព្រមព្រៀង Brexit ដដែលនោះចំនួន ៣ដងរួចហើយ។ តែអ្វីដែលថ្មីនៅពេលនេះ លោកស្រីមេបានយល់ព្រមអង្គុយជជែកជាមួយគណបក្សឡាបួរដែលជាបក្សប្រឆាំងនៅក្នុងសភាអង់គ្លេសដើម្បីស្វែងរកកុងសង់ស៊ុសរួមមួយ។ ប្រសិនបើកិច្ចសន្ទនាផ្ទៃក្នុងមួយនេះនៅតែមិនអាចឈានទៅអនុម័តលើកិច្ចព្រមព្រៀង Brexit បាន អឺរ៉ុបក៏មិនបិទទ្វារទាំងស្រុងចំពោះការពន្យារពេល Brexit រយៈពេលវែងដែរ។ ប្រធានក្រុមប្រឹក្សាអឺរ៉ុបលោកដូណាល់ ទូស្កិ៍បានស្នើឲ្យផ្តល់ការពន្យារពេលរយៈពេលដល់ ១ឆ្នាំ។ តែនឹងអាចកាត់បន្ថយពេលណាក៏បានក្នុងករណីណាដែលសភាអង់គ្លេសបោះឆ្នោតទទួលយកកិច្ចព្រមព្រៀង Brexit៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ