បារាំងនឹងបោះឆ្នោតប្រឆាំង គម្រោងបើកការចរចាពាណិជ្ជកម្ម អឺរ៉ុប-អាមេរិក
ប្រធានាធិបតី បារាំង លោកអេម៉ានុយអែល ម៉ាក្រុង បានសម្រេចចិត្ត នៅថ្ងៃព្រហស្បតិ៍ម្សិលមិញថា បារាំងនឹងបោះឆ្នោតប្រឆាំងគម្រោងបើកការចរចា ពាណិជ្ជកម្មរវាងសហភាពអឺរ៉ុប ហើយនិង អាមេរិក។ នៅថ្ងៃចន្ទ ដើមសប្តាហ៍ ក្រោយនេះ បារាំងនឹងក្លាយជាប្រទេសទោល ដែលបោះឆ្នោតប្រឆាំង ក្នុងពេលដែលប្រទេសសមាជិកអឺរ៉ុបដទៃទៀត បានបោះឆ្នោត រួចហើយ យល់ព្រមឲ្យសហភាពអឺរ៉ុបបើកការចរចាពាណិជ្ជកម្ជជាមួយសហរដ្ឋអាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
នៅទីក្រុងព្រុចស៊ែល នៅថ្ងៃចន្ទដើមសប្តាហ៍ក្រោយនេះ បារាំងអាចជាប្រទេសមួយគត់ដែលបោះឆ្នោតប្រឆាំង គម្រោងបើកការចរចាពាណិជ្ជកម្មរវាងសហភាពអឺរ៉ុប និងសហរដ្ឋអាមេរិក។ បារាំង បោះឆ្នោតជំទាស់ ប៉ុន្តែ គ្មានសិទ្ធិវេតូ នោះទេ។ សហភាពអឺរ៉ុបនឹងនៅតែអាចបើកការចរចាពាណិជ្ជកម្មជាមួយអាមេរិក។
យ៉ាងណាក៏ដោយ សម្រាប់វិមានប្រធានាធិបតីបារាំង វាជារឿងគោលការណ៍ និងតម្លៃថ្លៃថ្នូរ ព្រោះថា បារាំង ដែលផ្តោតសំខាន់ទៅលើបញ្ហាបរិស្ថាន នឹងមិនគាំទ្រឲ្យមានការចរចាពាណិជ្ជកម្មជាមួយប្រទេសណា ដែលមិនមែនជាហត្ថលេខីនៃកិច្ចព្រមព្រៀងស្តីពីអាកាសធាតុនោះទេ។
សូមអាន៖ លោកដូណាល់ ត្រាំបានដកអាមេរិកចេញពីកិច្ចព្រមព្រៀងអន្តរជាតិស្តីពីអាកាសធាតុ
សហរដ្ឋអាមេរិករបស់លោកដូណាល់ត្រាំ បានដកខ្លួនចេញពីកិច្ចព្រមព្រៀងទីក្រុងប៉ារីសអាកាសធាតុ កាលពីឆ្នាំ ២០១៧។ នៅថ្ងៃព្រហស្បតិ៍ម្សិលមិញ សមាជិកភាគច្រើនរបស់សហភាពអឺរ៉ុប បានសម្រេចយល់ព្រមព្រៀងគ្នាឲ្យមានបើកការចរចាពាណិជ្ជកម្មឡើងវិញ ជាមួយអាមេរិក។ អាល្លឺម៉ង់ និងប្រទេសអឺរ៉ុបខាងជើងចង់ជំរុញឲ្យមានការចរចាពាណិជ្ជកម្មជាមួយអាមេរិក ជាពិសេសនៅក្នុងរឿងយកពន្ធលើទំនិញឧស្សាហកម្ម។ ចំណែកអេស្ប៉ាញ និងបែលហ្ស៊ិកជាដើម ទោះបីជាពួកគេព្រួយបារម្ភពីបញ្ហាបរិស្ថាន ប៉ុន្តែ នៅតែចង់ឲ្យមានការបើកការចរចាពាណិជ្ជកម្មជាមួយអាមេរិក។
ដោយបោះឆ្នោតប្រឆាំងគម្រោងបើកការចរចាពាណិជ្ជកម្មសហភាពអឺរ៉ុបជាមួយអាមេរិក បារាំងចង់ផ្ញើសារ ប្រឆាំងជំហរនយោបាយរបស់សហរដ្ឋអាមេរិក។ តាមវិមានប្រធានាធិបតី បារាំង បើទោះបីជាបារាំងបានជោគជ័យ ទាមទារកុំឲ្យសហភាពអឺរ៉ុបដាក់បញ្ហាកសិកម្ម ទៅក្នុងការចរចាពាណិជ្ជកម្មជាមួយអាមេរិកក្តី ប៉ុន្តែ នៅមានរឿងជាច្រើនទៀត ដែលសហភាពអឺរ៉ុបកំពុងចាញ់ប្រៀប នៅក្រោមការដាក់សម្ពាធរបស់លោកដូណាល់ ត្រាំ។ សម្រាប់ទីក្រុងប៉ារីស រដ្ឋបាលលោកដូណាល់ ត្រាំ នៅតែបន្តដាក់សម្ពាធពាណិជ្ជកម្មខ្លាំងលើសហភាពអឺរ៉ុប។ លោកដូណាល់ ត្រាំបាន បដិសេធ មិនលុបចោលទៅវិញ ពន្ធដែលដាក់លើដែក និងអាលុយមីញ៉ូម នាំចូលពីសហភាពអឺរ៉ុប។ លើសពីនោះ លោកនៅបានគំរាមដំឡើងពន្ធលើរថយន្តនាំចូលពីអឺរ៉ុបទៀត។
ស្ថិតក្នុងស្ថានភាពបែបនេះ បារាំងមិនប្រយុទ្ធប្រឆាំងតែម្នាក់នោះទេ។ បារាំងដែលយកបញ្ហាប្រែប្រួលអាកាសធាតុជាមូលដ្ឋានគ្រឹះនៅក្នុងការចរចាពាណិជ្ជកម្ម ត្រូវបញ្ចេញសំឡេងប្រឆាំងឲ្យគេដឹង ព្រោះថា គេមិនអាចយកអនាគតរបស់អឺរ៉ុបទៅលេងសើចបានទេ។ តាមវិមានប្រធានាធិបតី បារាំង អឺរ៉ុបត្រូវតែធ្វើជាគំរូ ហើយនិងត្រូវមានជំហរដាច់ខាត ក្នុងរឿងការពារបរិស្ថាន និងការប្រែប្រួលអាកាសធាតុនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ