រដ្ឋអាជ្ញាបារាំងថាពេលនេះ អគ្គិភ័យឆាបឆេះវិហារណូត្រ ដាម ដឺ ប៉ារីសជារឿងគ្រោះថ្នាក់
នៅក្នុងប្រទេសបារាំង ក្រោយហេតុការណ៍ឆាបឆេះវិហារណូត្រ ដាម ដឺ ប៉ារីសនាយប់ថ្ងៃចន្ទ ទី១៥ មេសា រដ្ឋអាជ្ញាក្រុងប៉ារីសលោករ៉េមី អេត្សបានប្រាប់ឲ្យដឹងនៅថ្ងៃអង្គារ ទី១៦ មេសាពីមូលហេតុដែលបានបណ្តាលឲ្យមានអគ្គិភ័យឆាបឆេះលើណូត្រ ដាម ដឺ ប៉ារីស។ យោងតាមលោករ៉េមី អ្វីដែលគេអាចនិយាយបានពេលនេះគឺថា ការឆាបឆេះវិហារណូត្រ ដាម ដឺ ប៉ារីសជារឿងគ្រោះថ្នាក់ និងថា គេនៅមិនទាន់មានភស្តុតាងណាមួយដែលបញ្ជាក់ជាទង្វើដុតដោយចេតនាទេ។ ទន្ទឹមគ្នានេះ លោករ៉េមីក៏បានប្រាប់ឲ្យដឹងពីការផ្តើមការស៊ើបអង្កេតសួរសាក្សី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣១
« អ្វីដែលយើងអាចសន្និដ្ឋានបាននៅពេលនេះគឺថា ការឆាបឆេះណូត្រ ដាម ដឺ ប៉ារីសជារឿងគ្រោះថ្នាក់ដែលអណ្តាតភ្លើងបានចេញពីដំបូលដែលកំពុងជួសជុល។ គិតត្រឹមថ្ងៃអង្គារ ទី១៦ មេសា គ្មានភស្តុតាង និងហេតុផលណាមួយដែលបញ្ជាក់ថា ការឆាបឆេះនោះបានកើតចេញពីទង្វើដុតបំផ្លាញដោយចេតនានោះទេ។
ការដែលសំណុំរឿងមួយនេះត្រូវបានប្រគល់ទៅប៉ូលិសបង្រ្កាបបទឧក្រិដ្ឋជាអ្នកធ្វើការស៊ើបអង្កេត ក៏មកពីស្ថាប័នប៉ូលិសមួយនេះមានលទ្ធភាពបច្ចេកទេស និងធនធានមនុស្សគ្រប់គ្រាន់ដើម្បីបើកការស៊ើបអង្កេតលើសំណុំរឿងមួយដែលពិបាក និងត្រូវការពេលយូរ។
តែទោះជាយ៉ាងនេះ ក៏ការស៊ើបអង្កេតបានចាប់ផ្តើមហើយ។ ជាការស៊ើបអង្កេតដោយចាប់ផ្តើមពីការសួរសាក្សី។ ចូរកុំភ្លេចថា មានក្រុមហ៊ុនចំនួន ៥ កំពុងចូលរួមជួសជុលណូត្រ ដាម ដឺ ប៉ារីសពេលនេះ។ ចាប់ពីថ្ងៃអង្គារ ទី១៦ មេសាទៅ ក្រុមអ្នកស៊ើបអង្កេតបានផ្តើមសួរពួកកម្មករ និងបុគ្គលិកទាំង ៥ក្រុមហ៊ុនដែលបានធ្វើការជួសជុលនៅណូត្រ ដាម ដឺ ប៉ារីស។
ជាសរុប មានមនុស្សប្រមាណជា ១៥នាក់ដែលបានធ្វើការ និងមានវត្តមាននៅទីនោះក្នុងថ្ងៃចន្ទ ទី១៥ មេសា ហើយពួកគេនឹងត្រូវសួរនាំនៅក្នុងក្របខណ្ឌជាសាក្សី »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ