មហាសេដ្ឋីបារាំងស្រាក់គ្នាផ្តល់លុយរាប់រយលានអឺរ៉ូដើម្បីជួសជុលវិហារ Notre Dameឡើងវិញ
រន្ធត់ចិត្តដោយសារហេតុការណ៍ភ្លើងឆាបឆេះ វិហារប្រវត្តិសាស្រ្ត Notre Dame មហាសេដ្ឋីបារាំង ជាច្រើននាក់ ដែលជាម្ចាស់ក្រុមហ៊ុនឯកជនល្បីៗ នៅប្រទេសបារាំង បានប្រកាសផ្តល់វិភាគទាន សម្រាប់កសាងវិហារ Notre Dame ឡើងវិញ។ គិតនៅត្រឹមថ្ងៃអង្គារ នៅមួយថ្ងៃ ក្រោយ អគ្គិភ័យ ឆាបឆេះវិហារ Notre Dame វិស័យឯកជនបារាំង បានសន្យាផ្តល់ប្រាក់ច្រើនជាង ៦០០លានអឺរ៉ូសម្រាប់ការសាងសង់ឡើងវិញ វិហារ Notre Dame។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
នៅប៉ុន្មានម៉ោងក្រោយ Notre Dame វិហារប្រវត្តិសាស្រ្ត និងជានិមិត្តរូប របស់បារាំង ត្រូវភ្លើងឆាបឆេះយ៉ាងសន្ធោសន្ធៅ ឥស្សរជនបារាំង ទាំងក្នុងវិស័យឯកជន និងរដ្ឋាភិបាលបានចេញមុខ ប្រកាសផ្តល់ជំនួយ ទាំងថវិកា និងកម្លាំងកាយ សម្រាប់ការកសាង ឡើងវិញ វិហារ Notre Damede Paris។ នៅក្នុងចំណោមនោះ ទឹកប្រាក់ជំនួយ ច្រើនជាង ៦០០លានអឺរ៉ូ មានប្រមាណ ៥០០លានអឺរ៉ូ ដែលផ្តល់ដោយគ្រួសារមហាសេដ្ឋីបារាំង តែ ចំនួន៣។
នៅក្នុងសេចក្តីថ្លែងការណ៍ នៅថ្ងៃអង្គារ ក្រុមហ៊ុនផលិតកាបូបប្រណិត Louis Vuiton របស់គ្រួសារArnault ដែលជាមហាសេដ្ឋី មានជាងគេនៅអឺរ៉ុប បានប្រកាសផ្តល់ប្រាក់២០០លានអឺរ៉ូ ចំណែកគ្រួសារBettencourt Meyers ដែលជាម្ចាស់ក្រុមហ៊ុនសំអាង L’oréalបានសន្យាផ្តល់ប្រាក់ ២០០លានអឺរ៉ូដែរ។ គ្រួសារPinault ដែលជាម្ចាស់សហគ្រិនKering ផ្តល់១០០លានអឺរ៉ូ។
ក្រុមហ៊ុនតូតាល់វិញ បានប្រកាសផ្តល់ជំនួយពិសេស តម្លៃ ១០០លានអឺរ៉ូ ក្នុងពេលក្រុមហ៊ុនVinci ដែលជំនាញខាងសាងសង់ ជួសជុល អគារប្រវត្តិសាស្រ្ត បានប្រកាសផ្តល់ជំនួយហិរញ្ញវត្ថុ ហើយនិងកម្លាំងប្រាជ្ញារបស់ស្ថាបត្យកររបស់ខ្លួន ក្នុងគម្រោងការកសាង ឡើងវិញ វិហារ Notre Dame។ នេះគេនៅមិនទាន់និយាយពី បណ្តាក្រុមហ៊ុនរាប់រយផ្សេងទៀត ដូចជាក្រុមហ៊ុនសំណង់ ក្រុមហ៊ុនផលិតឈើ Chêne ដែលសន្យាផ្តល់ឈើ រាប់ពាន់ម៉ែត្រគូប ដើម្បីសង់ដំបូលវិហារ Notre Dame ដែលត្រូវឆេះខ្ទេច នៅក្នុងអគ្គិភ័យ កាលពីថ្ងៃចន្ទ។
នៅថ្ងៃចន្ទ នៅពេលឈរមើលអគ្គិភ័យបំផ្លាញ វិហារ Notre Dame ប្រធានាធិបតី បារាំង លោកអេម៉ានុយអែល ម៉ាក្រុងបានប្រកាសសន្យាកសាង វិហារ Notre Dame de Paris ឡើងវិញ តាមរយៈជំនួយសន្យាជាតិនិងអន្តរជាតិ។ រដ្ឋាភិបាលបារាំង ដែលជាម្ចាស់វិហារគ្រឹស្តសាសនាប្រមាណ ៨៧កន្លែង នៅទូទាំងប្រទេសធ្លាប់បានសន្យាផ្តល់ជំនួយសម្រាប់ជួសជុល វិហា Notre Dame ក្នុងទំហំទឹកប្រាក់៦០លានអឺរ៉ូ ក្នុងរយៈពេល ១០ឆ្នាំ។
រដ្ឋមន្រ្តីវប្បធម៌បារាំងបានលើកឡើងពីការដ្ឋានរាប់សិបឆ្នាំ និងទឹកប្រាក់រាបរយលានអឺររ៉ូ ដើម្បី កសាងវិហារ Notre Dameឡើងវិញ។ សម្រាប់រដ្ឋមន្រ្តីបារាំង បារាំង មានអ្នកជំនាញ មានចំណេះដឹងគ្រប់គ្រាន់ ដើម្បី អាចកសាង វិហារNotre Dameឲ្យដូចរូបភាពឡើងវិញ៕
គិតមកដល់ថ្ងៃអង្គារ អាជ្ញាធរបារាំងនៅមិនទាន់បានវាយតម្លៃពីទំហំខូចខាតដោយសារអគ្គិភ័យទៅលើវិហារ Notre Dame នៅឡើយទេ។ គេគ្រាន់តែដឹងថា អគ្គិភ័យ កាលពីថ្ងៃចន្ទ មិនបានសម្លាប់មនុស្សណាម្នាក់ទេ ហើយវត្ថុសំខាន់ៗ មានតម្លៃ របស់វិហារ ជាច្រើន ក៏ត្រូវបានដឹកចេញ កាលពីប៉ុន្មានខែមុន និងស្ថិតនៅកន្លែងសុវត្ថិភាព គឺមិនបានត្រូវឆេះបំផ្លាញ នៅក្នុងអគ្គិភ័យនោះទេ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ