តួកគីបន្តបដិសេធមិនទទួលស្គាល់អំពើប្រល័យពូជសាសន៍លើជនជាតិអាមេនីកាលពី ១០៤ឆ្នាំមុន
២៤ មេសា ១៩១៥-២៤ មេសា ២០១៩ ថ្ងៃនេះជាខួបគម្រប់ ១០៤ឆ្នាំនៃអំពើប្រល័យពូជសាសន៍លើជនជាតិអាមេនីចំនួន ១ ៣០០ ០០០នាក់ពីសំណាក់រដ្ឋអំណាចតួកគី។ ក៏ដូចជារៀងរាល់ឆ្នាំ ប្រជាជនអាមេនីនៅទូទាំងពិភពលោកបានរៀបចំពិធីរម្លឹកខួបដ៏សោកនាដកម្មមួយនេះ។ តែនៅតួកគីឯណោះ រដ្ឋាភិបាលទីក្រុងអង់ការ៉ាកំពុងបន្តបដិសេធមិនទទួលស្គាល់អំពើប្រល័យលើជនជាតិអាមេនីកាលពី ១០៤ឆ្នាំមុនទេ។ នៅក្នុងទីក្រុងប៉ារីស ប្រទេសបារាំង ពិធីរម្លឹកខួបសម្រាប់ជនរងគ្រោះអាមេនីត្រូវបានរៀបចំធ្វើនៅវិមានជ័យជំនះ។ តែអ្វីជាការកត់សម្គាល់ និងជាលើកទី១ក្នុងឆ្នាំនេះ បារាំងបានសម្រេចកំណត់យកថ្ងៃទី២៤ មេសាជាថ្ងៃទិវាជាតិសម្រាប់ចូលរួមរម្លឹកអំពើប្រល័យពូជសាសន៍លើជនជាតិអាមេនី។ ការសម្រេចនេះត្រូវបានប្រកាសដោយប្រធានាធិបតីបារាំងលោកម៉ាក្រុងនាដើមឆ្នាំ ២០១៩ ដូចដែលលោកបានសន្យានៅក្នុងសម័យឃោសនាបោះឆ្នោត។ លោក Franck Papazian សហប្រធានក្រុមប្រឹក្សាសម្របសម្រួលនៃសមាគមអាមេនីក្នុងប្រទេសបារាំងបានបន្តទាមទារឲ្យប្រទេសតួកគីទទួលស្គាល់អំពើប្រល័យពូជសាសន៍លើជនជាតិអាមេនី និងធ្វើការសុំទោសជាផ្លូវការ។ សម្រាប់លោក Franck អ្វីៗនៅមិនទាន់យឺតពេលនៅឡើយទេសម្រាប់រដ្ឋអំណាចតួកគី។
ចុះផ្សាយនៅថ្ងៃ៖
ស្តាប់ - ០១:២៦
« អ្វីដែលប្រធានាធិបតីសាធារណរដ្ឋបានសម្រេច គឺជាពាក្យសន្យានៅក្នុងសម័យឃោសនាបោះឆ្នោត។ លោកម៉ាក្រុងបានទទូចហើយ ទទូចទៀតពីភាពចាំបាច់ក្នុងការទទួលស្គាល់ជាលក្ខណៈអន្តរជាតិលើអំពើប្រល័យពូជសាសន៍ជនជាតិអាមេនី។ ហើយក្នុងពេលជាមួយគ្នានោះ លោកម៉ាក្រុងក៏ចង់បញ្ជូនសារទៅកាន់រដ្ឋអំណាចនៃប្រទេសតួកគីផងដែរ។
សារដែលលោកម៉ាក្រុងចង់ប្រាប់តួកគីថា សម្ព័ន្ធមិត្តរបស់តួកគីមិនអាចមិនទទួលស្គាល់ការពិតនៃអំពើប្រល័យពូជសាសន៍ដែលតួកគីបាន និងកំពុងបន្តបដិសេធមិនទទួលស្គាល់តាំងពីរាប់សិបឆ្នាំកន្លងមកហើយនោះទេ។ គេអាចនិយាយបានថា លោកម៉ាក្រុងបានប្រកាន់ជំហរម៉ឹងម៉ាត់ និងតឹងតែងជាមួយតួកគី។
តែក្នុងផលប្រយោជន៍តួកគីទៅវិញទេដែលលោកម៉ាក្រុងបានធ្វើយ៉ាងដូចនេះ ព្រោះថា នៅពេលដែលគេមានសម្ព័ន្ធមិត្ត គេត្រូវតែមានភាពក្លាហានហហ៊ាននិយាយអ្វីដែលជាការពិត។ ដើម្បីសម្តែងការគោរពនូវតម្លៃ និងការកាត់បន្ថយភាពតានតឹង វាពិតជាងាយស្រួលណាស់សម្រាប់រដ្ឋាភិបាលតួកគី និងប្រជាជនតួកគីដែលត្រូវទទួលស្គាល់អំពើប្រល័យពូជសាសន៍ និងធ្វើការសុំទោសប្រជាជនអាមេនី។
ថ្ងៃនេះ ខ្ញុំចង់ផ្ញើសារទៅកាន់រដ្ឋាភិបាលតួកគីថា អ្វីៗនៅមិនទាន់យឺតពេលនៅឡើយទេ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ