បារាំង ៖ ប្រធានាធិបតីថ្លែងសុន្ទរកថាជាតិដើម្បីលួងលោមប្រជាពលរដ្ឋ
៥ខែក្រោយចលនាបាតុកម្មរបស់ក្រុមអាវកាក់លឿង និងបីខែក្រោយការតស៊ូមតិជាតិ នៅថ្ងៃព្រហស្បតិ៍ទី ២៥មេសា ឆ្នាំ ២០១៩ វេលាម៉ោង៦ល្ងាច ម៉ោងនៅស្រុកបារាំង លោកប្រធានាធិបតី នឹងថ្លែងសារទៅកាន់ប្រជាជាតិ ប្រាប់អំពីវិធានការដែលរដ្ឋាភិបាលត្រូវធ្វើ។ លោក ម៉ាក្រុង បានដឹងយ៉ាងច្បាស់ថា សុន្ទរកថាជាតិយប់នេះ មានសារៈសំខាន់ខាន់ណាស់ សម្រាប់ផ្តល់សន្ទុះដល់រដ្ឋាភិបាលរបស់លោកវិញផង និងសម្រាប់ការបោះឆ្នោតអឺរ៉ុបផង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
លោកប្រធានាធិបតី នឹងចាប់ផ្តើមដោយ សេចក្តីថ្លែងការណ៍ទៅកាន់ប្រជាជាតិរយៈពេល២០នាទី បន្ទាប់មកទើបបើកឱ្យអ្នកសារព័ត៌មានជាតិនិងបរទេសសួរ។ សន្និសីទកាសែតនឹងប្រព្រឹត្តទៅរយៈពេលប្រមាណ២ម៉ោង ប៉ុន្តែមិនមែនជាការតស៊ូមតិរវាងប្រមុខរដ្ឋនិងពិភពលោកអ្នកសារព័ត៌មានទេ នេះបើតាមការបញ្ជាក់របស់ប្រភពស្និទ្ធប្រធានាធិបតី។
សមាជិករដ្ឋាភិបាល ដែលនាយករដ្ឋមន្ត្រីបានកោះហៅមកប្រជុំ នៅថ្ងៃទី ២៩មេសា ខាងមុខ ដើម្បីសម្រេចផែនការរបស់ប្រមុខរដ្ឋ ឱ្យបានឆាប់រហ័សបំផុតនោះ នឹងបង្ហាញវត្តមានអមលោកប្រធានាធិបតី ក្នុងពេលថ្លែងសុន្ទរកថានេះដែរ។
លទ្ធភាពចាយវាយ ការចូលនិវត្តន៍ ប្រជាធិបតេយ្យ វិមជ្ឈកាល បរិស្ថាន សុខភាព ជនបទ ... ទាំងនេះសុទ្ធសឹងជាប្រធានបទដែលប្រជាពលរដ្ឋបារាំង រង់ចាំស្តាប់ នៅល្ងាចនេះ ថាតើប្រធានាធិបតីនឹងមានដំណោះស្រាយយ៉ាងណា។ ប្រធានបទដ៏រសើបបំផុតមួយទៀត គឺរយៈពេលម៉ោងធ្វើការ។
បើតាមព័ត៌មានបែកលេចធ្លាយ នៅពេលប្រធានាធិបតីបានលុបគម្រោងថ្លែងសុន្ទរកថាដោយហេតុមានអគ្គិភ័យឆេះវិហារ ណូត្រដាមដឺប៉ារីស កាលពីថ្ងៃទី១៥មេសា ២០១៩ លោក ម៉ាក្រុង នឹងមិនធ្វើការប្តូរផ្លាស់អ្វីឱ្យស៊ីជម្រៅទេ ប៉ុន្តែលោកនឹងធ្វើការពន្យល់លម្អិត ឬក៏អាចថែមថយវិធានការមួយចំនួនប៉ុណ្ណោះ។ នេះបើប្រភពស្និទ្ធនឹងវិមានប្រធានាធិបតី ដដែល។
លោកប្រធានាធិបតី នឹងបញ្ជាក់អំពីលក្ខខណ្ឌនៃការបញ្ចុះ ការបង់ពន្ធ សម្រាប់ប្រជាពលរដ្ឋថ្នាក់កណ្តាល អំពីការគិតគូរជាថ្មីដល់អ្នកមានប្រាក់និវត្តរ៍ក្រោម២ពាន់អឺរ៉ូ ឬជាការសន្យាមិនបិទសាលា មិនបិទមន្ទីរពេទ្យក្នុងអាណត្តិរបស់លោកជាដើម។ គេក៏ទំនងជានឹងបានដឹងច្បាស់ អំពីព័ត៌មានដែលថារដ្ឋាភិបាលចង់ពន្យារពេលម៉ោងធ្វើការ ដើម្បីបានថវិកាមកជួយជនចាស់ជរា។
ក្រៅអំពីក្រុមអ្នកបរិស្ថាន ដែលសង្ឃឹមថានឹងបានឮប្រធានាធិបតីមានចំណាត់ការនាំប្រទេសឆ្លងអន្តរកាលថាមពល មេឃុំចៅសង្កាត់ ក៏ជាអ្នករង់ចាំស្តាប់វិធានការរបស់លោក អេម៉ាណុយអែល ម៉ាក្រុងខ្លាំងជាងគេ។ គឺពួកគាត់ ជាអ្នកទទួលសំណើនិងរៀបចំការតស៊ូមតិជាតិ ដើម្បីរំងាប់កំហឹងរបស់ចលនាអាវកាក់លឿង។ ដូច្នេះលោកប្រធានាធិបតី ត្រូវផ្តល់ចម្លើយដែលមានន័យខ្លាំងអាចលួងលោមប្រជាពលរដ្ឋបាន ព្រោះបើតាមការស្ទង់មតិ មានប្រជាពលរដ្ឋបារាំង តែ ប្រមាណ២៤%ប៉ុណ្ណោះ ជឿថាការតស៊ូមតិបីខែកន្លងមកនេះ អាចធ្វើឱ្យស្ថានភាពនយោបាយ សេដ្ឋកិច្ច និងសង្គមបានប្រសើរនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ