អឺរ៉ុបព្រួតគ្នាជំរុញឱ្យអាមេរិកនាំភាពស្ងប់ស្ងាត់ឱ្យតំបន់ឈូងសមុទ្ទពែក្ស
លោក ប៊ុមប៉េអូ (Mike Pompeo)រដ្ឋមន្ត្រីការបរទេសអាមេរិក បានសម្រេចចិត្ត យ៉ាងទាន់ហន់ មកចូលប្រជុំជាមួយអឺរ៉ុប នៅថ្ងៃចន្ទទី ១៣ឧសភា២០១៩ ដើម្បីពិភាក្សាអំពីបញ្ហាបន្ទាន់ៗមួយចំនួន មានអាទិ៍សំណុំរឿងអ៊ីរ៉ង់។ នាឱកាសនេះ បណ្តាប្រទេសអឺរ៉ុប បាននាំគ្នាប្រកាសជំហរច្បាស់បញ្ជាក់ប្រាប់អាមេរិកអំពីហានិភ័យនៃការរឹតបន្តឹងលើអ៊ីរ៉ង់ ថាអាចនាំឱ្យផ្ទុះជម្លោះនៅតំបន់ឈូងសមុទ្ទពែក្សបាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
លោកប្រមុខការទូតអាមេរិក គ្មានចេតនាចូលរួមប្រជុំ ជាមួយរដ្ឋមន្ត្រីការបរទេសអឺរ៉ុប នៅក្រុងព្រុចសែលទេ។ សហភាពអឺរ៉ុបក៏មិនបានត្រៀមលក្ខណៈទទួលដែរ ប៉ុន្តែស្ថានការណ៍តម្រូវ។
ភាពតានតឹងរវាងអ៊ីរ៉ង់និងអាមេរិកបានឡើងប៉ោងស្ទើរប្រេះ ៖ វ៉ាស៊ីនតោនចោទអ៊ីរ៉ង់ថាកំពុងត្រៀមវាយប្រហារលើផលប្រយោជន៍អាមេរិកនៅក្នុងតំបន់ ទើបបញ្ជូននាវាចម្បាំង យន្តហោះទម្លាក់គ្រាប់បែក ទៅឈូងសមុទ្ទពែក្ស នៅថ្ងៃម្សិលមិញនាវាជាច្រើនគ្រឿងរងវិច្ឆេទកម្មនៅក្នុងសមុទ្ទអេមីរ៉ាតអារ៉ាប់រួម ... ក្នុងបរិបទដ៏សែនតានតឹងបែបនេះ ជំនួបពិភាក្សារវាងប្រមុខការទូតអាមេរិកនិងក្រុមប្រមុខការទូតសហភាពអឺរ៉ុប ពិតជាប្រព្រឹត្តទៅដោយលំបាកបំបិនបំផុត។
ប្រមុខការទូតអង់គ្លេស បានស្តីចំៗថា ខ្លាចតែហេតុការណ៍ "វិច្ឆេទកម្ម" ផ្ទុះទៅជម្លោះទេ ! ជំហរដំឡើងគំនាប និងដាក់ទណ្ឌកម្មរបស់អាមេរិកលើអ៊ីរ៉ង់ មិនត្រូវនឹងជំហររបស់អឺរ៉ុបឡើយ ! នេះជាការបន្ថែមរបស់ប្រមុខការទូតបារាំង ជាមួយសំដីបែបបន្ទោសរបស់ប្រមុខការទូតអាល្លឺម៉ង់ថា “យើងត្រូវការនិយាយជាមួយអ៊ីរ៉ង់!”។ គំនិតខុសគ្នា និងខ្វែងគ្នាខ្លាំងមែន តែការចរចាជាមធ្យោបាយដ៏ប្រសើរសម្រាប់សម្រុះសម្រួលគ្នា និងបញ្ចៀសការដំឡើងកំហឹងដាក់គ្នា ! នេះជាប្រសាសន៍របស់លោកស្រីប្រមុខការទូតសហភាពអឺរ៉ុបទៅកាន់សមភាគីអាមេរិក។
តាមការពិតមុនបើកប្រជុំ រដ្ឋមន្ត្រីការបរទេសបារាំង អង់គ្លេស និងអាល្លឺម៉ង់ និងប្រមុខការទូតអឺរ៉ុប បានពិគ្រោះគ្នាជាមុន ដោយសម្រេចប្រកាន់ជំហរ សាមគ្គីភាពអឺរ៉ុប ប្រឆាំងនឹងការប្រឈមមុខគ្នា បញ្ចៀសភាពតានតឹង និងការពារកិច្ចព្រមព្រៀងនុយក្លេអ៊ែរអ៊ីរ៉ង់ ក្រុមប្រទេសទាំងបី ជាភាគីហត្ថលេខីជាមួយរុស្ស៊ី ចិននិង អាមេរិក កាលពីឆ្នាំ២០១៥។
ក្នុងសំឡេងតែមួយ អឺរ៉ុបដែលចង់ថែរក្សាការពារកិច្ចព្រមព្រៀងនុយក្លេអ៊ែរ មិនឱ្យអ៊ីរ៉ង់ដើរចេញ និងព្រួយបារម្ភណាស់ចំពោះវត្តមានចលនាយោធាអាមេរិកនៅក្នុងតំបន់ បានទទូចឱ្យអាមេរិកធ្វើយ៉ាងណានាំភាពស្ងាត់ស្ងាត់ឱ្យតំបន់វិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ