ក្រុមG៧ ប្រជុំគ្នារកហិរញ្ញវត្ថុដើម្បីប្រយុទ្ធប្រឆាំងនឹងជំងឺស៊ីដា របេងនិងគ្រុនចាញ់
នៅថ្ងៃព្រហស្បតិ៍និងថ្ងៃសុក្រនេះ រដ្ឋមន្ត្រីក្រសួងសុខាភិបាល នៃក្រុមប្រទេសមហាអំណាចទាំង៧ ឬហៅថាក្រុមហ្សេ៧ បានមកជួបជុំគ្នានៅទីក្រុងប៉ារីស ប្រទេសបារាំង ដែលជាប្រធានផ្លាស់វេនក្រុមហ្សេ៧។ ជាកិច្ចប្រជុំត្រៀមរៀបចំព្រឹត្តិការណ៍អន្តរជាតិ ដែលប្រព្រឹត្តនៅខែតុលា ដើម្បីប្រមូលហិរញ្ញវត្ថុឱ្យពិភពលោកយកទៅប្រយុទ្ធប្រឆាំងនឹងជំងឺស៊ីដា របេង និងគ្រុនចាញ់។ ពិភពលោកមានកម្មវត្ថុចង់លុបបំបាត់ការរីករាតត្បាតនៃជំងឺទាំងបីឱ្យបាននៅឆ្នាំ២០៣០។
ចុះផ្សាយនៅថ្ងៃ៖
ក្រៅពីបារាំង សហរដ្ឋអាមេរិក អង់គ្លេស អាល្លឺម៉ង់ ជប៉ុន អ៊ីតាលី និងកាណាដា តំណាងក្រុមប្រទេសមហាអំណាចនៅទ្វីបអាហ្វ្រិកម្នាក់ ក៏មកចូលរួមក្នុងកិច្ចប្រជុំនេះដែរ។ កិច្ចប្រជុំដែលរៀបចំឡើងបារាំង ក្នុងក្របខ័ណ្ឌជាប្រធានផ្លាស់វេនហ្សេ៧ និងក្នុងកម្មវត្ថុដ៏ដំបងមួយ គឺប្រមូលផ្តុំគ្រប់ភាគី គ្រប់តួអង្គដែលទំនួលខុសត្រូវខ្ពស់ ឱ្យជុំគ្នាជាស្រេច មុននឹងឈានដល់ការបើកសន្និសីទអន្តរជាតិស្វែងរកហិរញ្ញវត្ថុមកបំពេញហិបមូលនិធិពិភពលោកដើម្បីប្រយុទ្ធប្រឆាំងនឹងជំងឺស៊ីដា របេង និងគ្រុនចាញ់ នៅខែតុលាខាងមុខនិងដែលបារាំងនឹងធ្វើជាម្ចាស់ផ្ទះទទួលជាលើកទីមួយ។
ប្រព្រឹត្តទៅជារៀងរាលបីឆ្នាំម្តង សន្និសីទបានកម្មវត្ថុស្វែងរកហិរញ្ញវត្ថុសម្រាប់រយៈពេលពីឆ្នាំ២០២០-២០២២ ឱ្យបាន១៤ពាន់លានដុល្លារ (ទល់នឹង១២,២ពាន់លាន កាលពីជំនួបប្រជុំក្រុមអ្នកផ្តល់ជំនួយលើកមុន) ប៉ុន្តែបើតាមអង្គការក្រៅរដ្ឋាភិបាល ចំនួនទឹកប្រាក់នេះមិនគ្រប់គ្រាន់ទេ។ សមាគមAides បានបើកយុទ្ធនាការពញ្ញាក់ស្មារតីប្រធានាធិបតីបារាំង តាំងពីថ្ងៃពុធម្សិលមិញមក ឱ្យលោកម៉ាក្រុង ជួយបិទបញ្ចប់ជំងឺស៊ីដា។
មូលនិធិពិភពលោក ដែលជាផ្លៃផ្កានៃភាពជាដៃគូរវាងរដ្ឋ អង្គការក្រៅរដ្ឋាភិបាល វិស័យឯកជន និងអ្នកជំងឺ តែងចំណាយថវិកាប្រមាណជិត៤ពាន់លានដុល្លារក្នុងមួយឆ្នាំៗ វិនិយោគគាំទ្រគម្រោងកម្មវិធីធំៗក្នុងតំបន់របស់អ្នកជំនាញ។ អ្នកផ្តល់វិភាគទានសំខាន់ជាងគេ គឺសហរដ្ឋអាមេរិក បារាំង អង់គ្លេស អាល្លឺម៉ង់ និងជប៉ុន។
ក្រៅអំពីបញ្ហាហិរញ្ញវត្ថុ ជំនួបប្រជុំសុខាភិបាលក្រុមហ្សេ៧ ក៏នឹងត្រូវពិភាក្សាអំពីមធ្យោបាយ ផ្តល់ការព្យាបាលថែទាំសុខភាពបឋម ឱ្យបានកាន់តែប្រសើរឡើង ដល់អ្នកជំងឺ ដោយអាចជួបរកពេទ្យជំនាញដោយផ្ទាល់ និងមិនឆ្ងាយពីកន្លែងរស់នៅ។
នៅពេលកិច្ចប្រជុំសុខភាពហ្សេ៧ បិទបញ្ចប់នៅសុក្រ អង្គការអន្តរជាតិមានជាអាទិ៍អង្គការសុខភាពពិភពលោក នឹងទទួលបន្ទុកកំណត់អំពីបែបបទដែលត្រូវដាក់ឱ្យដំណើរលើប្រព័ន្ធអ៊ីនធ័រនែត ពោលគឺដើម្បីអភិវឌ្ឍន៍និងចែកចាយចំណេះដឹងគ្នា ស្តីការថែទាំសុខភាពបឋម ក្នុងរង្វង់ក្រុមប្រទេសដែលមានសេដ្ឋកិច្ចលូតលាស់ខ្លាំងជាងគេ៧ដំបូង (ហ្សេ៧)ផង និងរំលែកឱ្យក្រុមប្រទេសដែលមានចំណូលមធ្យមនិងទាបបានទទួលផលដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ