នាយករដ្ឋមន្ត្រីអង់គ្លេសព្រមធ្វើប្រជាមតិលើកទីពីរ ដើម្បីស្រោចស្រង់កិច្ចព្រមព្រៀងBrexit
តាំងពីដើមមក លោកស្រីនាយករដ្ឋមន្ត្រីអង់គ្លេសមានជំហរដាច់ខាតមិនត្រូវការរៀបចំប្រជាមតិស្តីពីBrexit ជាលើកទីពីរទេ។ ប៉ុន្តែនៅថ្ងៃម្សិលមិញ លោកស្រី តេរ៉េហ្សា មេ សុទ្ធចិត្តលះបង់គំនិតនេះចោល ដោយបានប្រកាសធ្វើសម្បទាន ព្រមរៀបចំប្រជាមតិស្តីពីBrexit ជាលើកពីរ ប្រសិនបើសភាព្រមអនុម័តកិច្ចព្រមព្រៀងBrexit ដែលលោកស្រីសម្រេចបានជាមួយសហភាពអឺរ៉ុបកាលពីខែវិច្ឆិកា ២០១៨ និងដែលសភាអង់គ្លេសធ្លាប់ច្រានចោលបីដងរួចមកហើយ។ សំណើថ្មីនេះក៏ហាក់ដូចជាពុំទទួលបានការស្វាគមន៍ជាវិជ្ជមានទេ។
ចុះផ្សាយនៅថ្ងៃ៖
ពីរថ្ងៃមុនការបោះឆ្នោតសភាអឺរ៉ុបចូលមកដល់ នាយករដ្ឋមន្ត្រីអង់គ្លេសបានឡើងថ្លែងសុន្ទរកថា ផ្សងសំណាងជាលើកចុងក្រោយ នៅចំពោះមុខសភា ប្រកាសរកឃើញការស្រុះស្រួលនិងសម្បទានពីរធំៗ គឺ ការព្រមរក្សាប្រទេសអង់គ្លេសឱ្យបន្តស្ថិតនៅក្នុងសហភាពពន្ធគយអឺរ៉ុប ជាបណ្តោះអាសន្ន និងពិសេសលទ្ធភាពនៃការបោះឆ្នោតប្រជាមតិជាលើកទីពីរ ប្រសិនបើសភាព្រមអនុម័តគម្រោងច្បាប់ស្តីពីកិច្ចព្រមព្រៀងBrexit ដែលបន្ទាប់មកសភាអង់គ្លេសអាចធ្វើវិសោធនកម្មបាន។
តើមានន័យថាដូចម្តេច ? មានន័យថា រដ្ឋាភិបាលនឹងបញ្ចូលទៅក្នុងគម្រោងកិច្ចព្រមព្រៀងBrexit នូវ ចំណុចភ្ជាប់បន្ថែមមួយថានឹងមានឬអត់ការរៀបចំប្រជាមតិជាលើកទីពីរ។ លោកស្រីមេ បានសន្យាថា បើគម្រោងច្បាប់ស្តីពីកិច្ចព្រមព្រៀងត្រូវបានអនុម័ត នោះនឹងមានការរៀបចំប្រជាមតិ ជាលើកទីពីរដើម្បីបញ្ជាក់យោបល់ពីតំណាងពលរដ្ឋ។ ក្នុងករណីឆ្នោតវិជ្ជមាន ជ្រើសរើសBrexitដដែល រដ្ឋាភិបាលនឹងអនុវត្តដំណើរបំបែកពីអឺរ៉ុបតាមកិច្ចព្រមព្រៀងរបស់លោកស្រីម្តង។ តែបើបដិសេធនោះនឹងគ្មានទេBrexit។
ប៉ុន្តែសំណើសម្រុះសម្រួលរបស់លោកស្រីនាយករដ្ឋមន្ត្រី ហាក់មិនគ្រប់គ្រាន់ ឬមកយឺតបន្តិចទៅហើយ ! ប្រតិកម្មអវិជ្ជមានបានធ្លាក់មកជាបន្តបន្ទាប់តាមប្រព័ន្ធសង្គមតាំងពីលោកស្រីមិនទាន់បញ្ចប់សុន្ទរកថាស្រួលបួលផង។ អ្នកអភិរក្សនិយម ថាឈប់គាំទ្រកិច្ចព្រមព្រៀង ដែលក្បត់ពាក្យសន្យាកាលពីឆ្នាំ២០១៦។ ចំណែក អ្នកសេរីប្រជាធិបតេយ្យដែលជាគាំទ្រការធ្វើប្រជាមតិជាលើកទីពីរ បានរិះគន់ថាជាសេចក្តីប្រកាសដែលនាំមកនូវការភ័ន្តច្រឡំ។ គណបក្សនេះសុខចិត្តអំពាវនាវឱ្យប្រជាពលរដ្ឋអង់គ្លេសទៅចូលរួមបោះឆ្នោតសភាអឺរ៉ុប នៅថ្ងៃព្រហស្បតិ៍ទី ២៣ឧសភាស្អែក ដោយបោះឱ្យបក្សគាំទ្រអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ