ទិវាសមុទ្រពិភពលោកឆ្នាំ ២០១៩ ផ្តោតលើយុទ្ធនាការប្រឆាំងនឹងសំរាមប្លាស្ទិក
ថ្ងៃសៅរ៍ ទី៨ មិថុនាជាទិវាសមុទ្រពិភពលោកដែលប្រធានបទឆ្នាំ ២០១៩ ផ្តោតសំខាន់លើយុទ្ធនាការប្រឆាំងនឹងការកំពុលដោយសំរាមប្លាស្ទិក។ តាមតួលេខផ្តល់ដោយអង្គការសហប្រជាជាតិ មានសំរាមប្លាស្ទិកជាង ៣០០លានតោនត្រូវបានគេបោះចោលរៀងរាល់ឆ្នាំនៅទូទាំងពិភពលោក ហើយបរិមាណដ៏ច្រើនសម្បើមនេះកំពុងបង្កឲ្យមានមហន្តរាយបរិស្ថានយ៉ាងធ្ងន់ធ្ងរ។ បច្ចុប្បន្ននេះ មានសំរាមប្លាស្ទិកប្រមាណជា ១៥០លានតោនកំពុងស្ថិតក្នុងសមុទ្រ ហើយបើគ្មានវិធានការទប់ស្កាត់អ្វីទេ នោះចំនួនសំរាមប្លាស្ទិកក្នុងសមុទ្រនឹងមានច្រើនជាងចំនួនត្រីនៅឆ្នាំ ២០៥០។ ចូរកុំភ្លេចថា សំរាមប្លាស្ទិកក្នុងសមុទ្រនឹងអាចធ្វើឲ្យប៉ះពាល់ខ្លាំងដល់សុខភាពមនុស្ស ព្រោះមនុស្សបរិភោគត្រីសមុទ្រដែលបានស្រូបយកកម្ទេចជាធូលីប្លាស្ទិក។ លោកប៊្រុយណូ ដាវីដ ប្រធានសារមន្ទីរជាតិនៃប្រវត្តិសាស្រ្តធម្មជាតិក្នុងទីក្រុងប៉ារីសបានចាប់អារម្មណ៍ពីទំនាក់ទំនងរវាងមនុស្សលោក និងសមុទ្រ។ តាមលោកដាវីដ ទោះបីជាសមុទ្រមានផ្ទៃធំល្វឹងល្វើយជាងផ្ទៃដីគោក មានត្រីច្រើន និងមានការបង្កាត់ពូជត្រីគ្មានទីបញ្ចប់ក៏ដោយ ក៏សមុទ្រមានកម្រិតរបស់វាដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
« វាពិតជាគួរឲ្យឆ្ងល់ និងចង់ដឹងខ្លាំងណាស់នៅពេលដែលគេនិយាយពីទំនាក់ទំនងរវាងមនុស្ស និងសមុទ្រ។ គេបានដឹងពីផ្ទៃសមុទ្រដែលធំល្វឹងល្វើយគ្មានកោះ គ្មានត្រើយ តែគេមិនស្គាល់ស្ថានភាពនៅបាតសមុទ្រពិតប្រាកដ ព្រោះវាពិបាកចុះទៅណាស់។ គេតែងតែបានគិតតាំងពីដំបូងថា សមុទ្រគឺគ្មានទីបញ្ចប់ និងគ្មានដែនកំណត់។
អស់រយៈពេលជាយូរ រហូតដល់សម័យកាលថ្មីចុងក្រោយ គេតែងនាំគ្នានិយាយថា សមុទ្រគ្មានបញ្ហាអ្វីគួរឲ្យបារម្ភទេ ព្រោះសមុទ្រមានផ្ទៃធំធេងណាស់ មានត្រីច្រើនសម្បើម ហើយការបង្កាត់ពូជរបស់ពពួកត្រី រួមទាំងរុក្ខជាតិផ្សេងទៀតនឹងបន្តមានគ្មានទីបញ្ចប់ដែលមិនគួរខ្វាយខ្វល់អ្វីឡើយ។
តែបន្តិចម្តងៗនារយៈពេលប៉ុន្មានទសវត្សចុងក្រោយនេះ ស្រាប់គេផ្តើមភ្ញាក់ខ្លួន និងបានយល់ដឹងថា ទោះបីជាមានផ្ទៃធំល្វឹងល្វើយយ៉ាងណាក៏ដោយ សមុទ្រក៏មានកម្រិតរបស់វាដែរ។ យើងបានចាប់ផ្តើមដឹងថា សំរាមដែលយើងបានបញ្ជូនទៅកាន់សមុទ្រតាមរយៈទន្លេ និងស្ទឹងកំពុងកើនឡើងកាន់តែច្រើន និងគេបានឃើញនៅគ្រប់កន្លែងទាំងអស់។ ឥឡូវនេះ សមុទ្រហាក់កំពុងក្លាយជាទ្វីបសំរាមប្លាស្ទិកដែលមនុស្សលោកមិនបាននឹកស្មានដល់សោះឡើយកាលពី ១៥ឆ្នាំមុន។
ដូច្នេះគេបានឃើញកាន់តែច្បាស់ក្រឡែតពីកម្រិតដែលសមុទ្រអាចទទួលយកបាន។ នេះអាចជាការទាញសញ្ញាអាសន្នចំពោះយើងម្នាក់ៗ ព្រោះវាក៏បានបង្ហាញពីកម្រិតផែនដីរបស់យើងដែរ។ យើងបានស្គាល់ផែនដីរបស់យើង យើងបានឃើញវាដោយមើលពីឋានព្រះចន្ទ វាជាប៊ូលព័ណ៌ខៀវមួយស្ថិតក្នុងអាកាស។ តែសមុទ្រដែលហាក់មានផ្ទៃយ៉ាងធំសម្បើមក៏មានកម្រិតរបស់វាដែរ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ