ប្រធានាធិបតីបារាំងរម្លឹកពីសមិទ្ធិផលដែលអង្គការពលកម្មអន្តរជាតិសម្រេចបានក្នុងរយៈពេល ១០០ឆ្នាំ
សន្និសីទនៃអង្គការពលកម្មអន្តរជាតិ ILO កំពុងបន្តធ្វើនៅក្នុងទីក្រុងហ្សឺណែវ ប្រទេសស្វ៊ីស។ សន្និសីទប្រចាំឆ្នាំ ២០១៩ បានធ្វើឡើង ចំពេលដែលអង្គការអន្តរជាតិមួយនេះមានអាយុគម្រប់ ១០០ឆ្នាំ។ លក្ខណៈពិសេសរបស់អង្គការពលកម្មអន្តរជាតិ គឺការចូលរួមដោយអ្នកតំណាងមកពីភាគីរដ្ឋាភិបាល សហជីព និងក្រុមហ៊ុនឯកជន រួមជាមួយពលករ។ ថ្លែងនៅក្នុងសន្និសីទនាថ្ងៃអង្គារ ទី១១ មិថុនា ប្រធានាធិបតីបារាំងលោកអេម៉ានុយអែល ម៉ាក្រុងបានរម្លឹកពីសមិទ្ធិផលដែលអង្គការពលកម្មអន្តរជាតិសម្រេចបានក្នុងរយៈពេល ១០០ឆ្នាំកន្លងទៅ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៧
« ១០០ឆ្នាំនៃការតស៊ូ ១០០ឆ្នាំនៃយុត្តិធម៌សង្គម ១០០ឆ្នាំនៃកិច្ចសន្ទនា និងការឲ្យសច្ចាប័នលើ ១៨៩ អនុសញ្ញាដែលបានផ្លាស់ប្តូរជីវិតមនុស្សស្រី ប្រុសក្នុងលោករាប់សិបលាននាក់។ មានអនុសាសន៍ចំនួន ២០២ អនុសាសន៍ត្រូវបានអនុម័ត។ ប្រវត្តិសាស្រ្តរបស់អង្គការពលកម្មអន្តរជាតិ គឺជាប្រវត្តិសាស្រ្តនៃការតស៊ូទាំងអស់នេះឯង។ គឺជាប្រវត្តិសាស្រ្តរបស់និយោជិក និយោជកដែលតាមរយៈអនុសញ្ញា ពួកគេទទួលបានការកំណត់ពេលវេលាធ្វើការងារក្នុងមួយថ្ងៃ ក្នុងមួយសប្តាហ៍។
គឺជាប្រវត្តិសាស្រ្តរបស់កុមារដែលពួកគេអាចទៅសាលារៀន ព្រោះទីកន្លែងរបស់ពួកគេមិនមែននៅក្នុងរោងចក្រទេ តែនៅក្នុងថ្នាក់រៀនជាមួយគ្រូបង្រៀន និងក្តារខៀន។ ខ្ញុំចង់គូសបញ្ជាក់នៅទីនេះថា នាប៉ុន្មានថ្ងៃខាងមុខ ប្រទេសបារាំងនឹងធ្វើជាប្រធានសម្ព័ន្ធ ៨.៧ ដែលជាដៃគូអន្តរជាតិប្រឆាំងនឹងពលកម្មកុមារ និងពលកម្មដោយបង្ខំ។
ជាមួយនឹងការគាំទ្ររបស់យើង រួមទាំងការគាំទ្រផ្នែកហិរញ្ញវត្ថុផង អង្គការនៃកិច្ចសហប្រតិបត្តិការ និងអភិវឌ្ឍន៍សេដ្ឋកិច្ច ឧត្តមស្នងការដ្ឋានសហប្រជាជាតិទទួលបន្ទុកជនភៀសខ្លួន អង្គការ Unicef អង្គការស្បៀងអាហារ និងកសិកម្មពិភពលោក ក្រុមដៃគូសង្គម និងក្រុមអង្គការក្រៅរដ្ឋាភិបាលនឹងចងសម្ព័ន្ធជាមួយអង្គការពលកម្មអន្តរជាតិដើម្បីបិទបញ្ចប់ពលកម្មកុមារ និងពលកម្មដោយបង្ខំ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ