តើយន្តហោះចម្បាំងថ្មីរបស់អឺរ៉ុបមានទម្រង់យ៉ាងដូចម្តេច ?
ចុះផ្សាយនៅថ្ងៃ៖
ស្តាប់ - ០៣:៤៧
គឺជាគម្រោងដ៏ប្រកបដោយមហិច្ឆតាបំផុតរបស់អឺរ៉ុប ក្នុងវិស័យការពារជាតិ។ នៅថ្ងៃចន្ទទី ១៧ មិថុនា ២០១៩ ក្នុងឱកាសបើកសម្ពោធពិព័រណ៍យន្តហោះអន្តរជាតិ លើកទី៥៣ បារាំងនិងអាល្លឺម៉ង់ ព្រមទាំងអេស្ប៉ាញ បានចុះហត្ថលេខាលើកិច្ចព្រមព្រៀងគោល គម្រោងផលតិយន្តហោះចម្បាំង សម្រាប់ពេលអនាគត។ តើយន្តហោះចម្បាំងថ្មីមានទម្រង់យ៉ាងណា ? តើគម្រោងផលិតយន្តហោះនេះមានមហិច្ឆតា និងសារៈសំខាន់យ៉ាងណាខ្លះ ?
បណ្តោយ១៨ម៉ែត្រ ទទឹង (ប្រវែងស្លាបពីចុងម្ខាងទៅចុងម្ខាងទៀត)១៤ម៉ែត្រ រាងរៅប្រហាក់ប្រហែលនឹងយន្តហោះប្រដេញមុនៗ តែទំនើបទាន់សម័យជាង នេះហើយជាអនាគតយន្តហោះចម្បាំងថ្មី ដែលប្រធានាធិបតីបារាំង អបដោយរដ្ឋមន្ត្រីក្រសួងការពារជាតិបារាំង អាល្លឺម៉ង់ និងអេស្ប៉ាញ បានបង្ហាញគំរូជូនសាធារណជន កាលពីថ្ងៃចន្ទ ទី១៧មិថុនា ២០១៩ ក្នុងពិព័រណ៍យន្តហោះអន្តរជាតិ ក្បែរទីក្រុងប៉ារីស។
ផ្តើមគំនិតនៅឆ្នាំ២០១៧ ប្រព័ន្ធប្រយុទ្ធផ្លូវអាកាសអនាគត “Système de Combat aérien du futur” (Scaf) ឈ្មោះបណ្តោះអាសន្នរបស់យន្តហោះចម្បាំង នឹងផលិតឡើងក្នុងទម្រង់ជាការផ្គុំបញ្ចូលគ្នានូវប្រព័ន្ធយន្តហោះចម្បាំងជំនាន់ថ្មី ដ្រូន មីស៊ីលបណ្តែតជំនាន់ក្រោយ និងបង្គំដ្រូនដូចសំបុកឃ្មុំ ដែលតភ្ជាប់បណ្តាញ ទៅយន្តហោះផ្សេងទៀត ទៅផ្កាយរណប ទៅប្រព័ន្ធអូតង់ និងទៅប្រព័ន្ធប្រយុទ្ធលើដី និងលើទឹក។ ជាយន្តហោះពហុទិន្នន័យ ផ្តល់ព័ត៌មានដ៏ច្រើន ច្រើនជ្រុលសម្រាប់អ្នកបើកតែម្នាក់ និងច្រើនជ្រុលដែលមិនអនុញ្ញាតឱ្យអ្នកបើកតែម្នាក់មិនអាចគ្រប់គ្រងបាន។ ទើបត្រូវការបំពាក់បញ្ញាសប្បនិម្មិតឱ្យយន្តហោះចម្បាំងថ្មីនេះ ដើម្បីជួយយវិភាគទិន្នន័យឱ្យអ្នកបើកបរ។ ប៉ុន្តែមេបញ្ជាការធំនៃបេសកកម្មប្រយុទ្ធ និងអ្នកមានសេចក្តីសម្រេចចុងក្រោយ ស្ថិតក្នុងកណ្តាប់ដៃអ្នកបើកបរយន្តហោះចម្បាំងជានិច្ច។
បន្ទាប់ពីបានចុះកិច្ចព្រមព្រៀងលើគម្រោងផលិតយន្តហោះចម្បាំងថ្មីនេះហើយ គេត្រូវការពេលវេលាប្រមាណជាពីរឆ្នាំដើម្បីសិក្សានិងធ្វើតេស្តបច្ចេកវិទ្យា។ យន្តហោះចម្បាំងមួយគ្រឿងដំបូងគេនឹងចាប់ផ្តើមធ្វើការហោះហើរសាកល្បងនៅឆ្នាំ២០២៦ និងផ្តើមចេញធ្វើប្រតិបត្តិការយ៉ាងពេញលេញនៅរវាងឆ្នាំ២០៤០ ដើម្បីជំនួសយន្តហោះចម្បាំងRafaleនិងEuroflighter ដែលនឹងបញ្ចប់បេសកកម្មហោះហើររបស់ខ្លួនត្រឹមឆ្នាំ២០៥០។ ប៉ុន្តែបច្ចេកវិទ្យារបស់យន្តហោះប្រដេញបារាំងRafale និងយន្តហោះចម្បាំងអឺរ៉ុប Euroflighters (អាល្លឺម៉ង់ អង់គ្លេស អ៊ីតាលីនិងអេស្ប៉ាញ) នឹងត្រូវយកមកបញ្ចូលក្នុងប្រព័ន្ធយន្តហោះចម្បាំងSCAFនេះដែរ។
ប្រព័ន្ធយន្តហោះចម្បាំងទំនើបថ្មីនេះ នឹងអាចមានអាយុ៥០ឆ្នាំ ឬវែងជាងនេះ។
គម្រោងផលិតយន្តហោះចម្បាំងសម្រាប់អនាគតនេះត្រូវការចំណាយថវិការាប់សិបពាន់លានអឺរ៉ូ។ ពីពេលនេះដល់ចុងឆ្នាំគម្រោងត្រូវថវិកាប្រមាណ១៥០លានអឺរ៉ូ។ ក្នុងដំណាក់កាដំបូង បារាំងនិងអាល្លឺម៉ង់ត្រូវចេញម្នាក់ពាក់កណ្តាល ចំណែកខាងអេស្ប៉ាញពុំទាន់ត្រូវបានកំណត់នៅឡើយទេ។
សម្រាប់ពេលនេះ យន្តហោះចម្បាំង មានទម្រង់ត្រឹមជាគំរូ និងនៅជាគំនិតនៅឡើយទេ ប៉ុន្តែ SCAF ជាគម្រោងដ៏សំខាន់បំផុតនៃយុទ្ធសាស្ត្រអឺរ៉ុប ប្រឈមនឹងការប្រកួតប្រជែងដ៏ខ្លាំងរបស់អាមេរិកផង និងពិសេសដើម្បីបញ្ជាក់អំពីអធិបតេយ្យភាពអឺរ៉ុបក្នុងវិស័យការពារជាតិផង។ នេះបើតាមការពន្យល់របស់វិមានប្រធានាធិបតីបារាំង។ គម្រោងមួយ គាំទ្រផលិតនិងចុះហត្ថលេខាលើកិច្ចព្រមព្រៀងគោល ដោយបីប្រទេស គឺជាការឆ្លងកាត់ដំណាក់កាលដ៏សំខាន់នៃដំណើរឆ្ពោះទៅកសាងវិស័យការពារជាតិអឺរ៉ុបដែលជាមហិច្ឆតាដ៏ចំបងលោកប្រធានាធិបតី បារាំង ម៉ាក្រុង។
នាំមុខដោយបារាំងនិងអាល្លឺម៉ង់ ហើយទើបបានការចូលរួមពីអេស្ប៉ាញបន្ថែមម្នាក់ទៀតនេះ គម្រោងSCAFអាចនឹងធ្វើឱ្យអាមេរិកអាមេរិកមិនសប្បាយចិត្ត ដោយមិនអាចទម្លាយបច្ចេកវិទ្យានិងសមទ្ធិផលយោធារបស់ខ្លួនមកលក់ឱ្យអឺរ៉ុបបាន។ SCAF ក៏មានគូប្រជែងម្នាក់ ក្នុងតំបន់ គឺTempest របស់អង់គ្លេស។ អឺរ៉ុបចង់មានគម្រោងការពារជាតិតែមួយគត់ដែរ ប៉ុន្តែដោយបញ្ហាBrexit ទើបអ្វីៗប្រែប្រួលដូច្នេះ។ ប៉ុន្តែគេមិនច្រានសេណារីយោខិតរកគ្នាវិញទេ ព្រោះនេះវាអាស្រ័យទៅនឹងសេចក្តីសម្រេចនយោបាយ មិនមែនត្រឹមកំរិតឧស្សាហកម្មឡើយ។ ជាគោលការណ៍បារាំងជាមេដឹកនាំគម្រោង នៅពេលណាមានប្រទេសនៅអឺរ៉ុបរួមកាន់តែច្រើន នោះគម្រោងនឹងកាន់តែមានន័យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ