អឺរ៉ុបកំពុងទទួលរងគ្រោះ ដោយសាររលកកំដៅ ក្តៅខ្លាំង មិនធ្លាប់មាន
ពីត្បូងទៅជើង ពីលិចទៅកើត ប្រទេសមួយចំនួនធំនៅទ្វីបអឺរ៉ុប កំពុងរងគ្របដណ្តប់ ដោយរលកកំដៅ ក្តៅខ្លាំង បក់មកពីវាលខ្សាច់សាហារ៉ា នៅទ្វីបអាហ្រ្វិក។ តាំងពីថ្ងៃព្រហស្បតិ៍ រហូតដល់ថ្ងៃសៅរ៍ស្អែក មិនថា នៅបារាំង អេស្ប៉ាញ អ៊ីតាលី ក្រិក អាល្លឺម៉ង់ ប៉ូឡូញ ឬនៅប្រទេសស្វ៊ីស សំបូរភ្នំទឹកកក សីតុណ្ហភាពក្តៅខ្លាំង កើនឡើងដល់កម្រិតកំពូល ក្នុងរង្វង់ជាង ៤០អង្សា។ ជាមួយអាកាសធាតុក្តៅខ្លាំង បំបែកឯតទគ្គកម្ម យ៉ាងដូច្នេះ អឺរ៉ុបកំពុងប្រឈមនឹង ភ្លើងឆេះព្រៃ បញ្ហាសុខភាព ហើយនិងខ្យល់ពុលអូហ្សូន ដែលកើតចេញមកពីការរួមផ្សំគ្នារវាងសារធាតុគីមី ហើយនិងអាកាសធាតុក្តៅខ្លាំង។
ចុះផ្សាយនៅថ្ងៃ៖
អឺរ៉ុបកំពុងដង្ហក់ខ្យល់ ដោយសារតែអាកាសធាតុក្តៅខ្លាំង មិនធ្លាប់ជួបប្រទះ នៅក្នុងរយៈពេល ៧០ឆ្នាំចុងក្រោយនេះ។ នៅថ្ងៃព្រហស្បតិ៍ ឧបករណ៍ស្ទង់កំដៅ លោតដល់៣៨,៩អង្សា នៅសាធារណរដ្ឋឆែក ៣៨,៦អង្សា នៅអាល្លឺម៉ង់ និង៣៨,២អង្សា នៅប្រទេសប៉ូឡូញ។ នៅថ្ងៃពុធ អាកាសធាតុក្តៅខ្លាំងបានបណ្តាលឲ្យមានភ្លើងឆេះព្រៃ ជាង ៣ពាន់ហិចតា នៅអេស្ប៉ាញ។ គ្រោះមហន្តរាយភ្លើងឆេះព្រៃ នឹងអាចរាលដាលតទៅទៀត នៅពេលកំដៅ កាន់តែឡើងក្តៅ ខ្លាំង បំផុត នៅថ្ងៃសុក្រ និងថ្ងៃសៅរ៍ស្អែកនេះ។ នៅអ៊ីតាលី វិញ អាជ្ញាធរអះអាងថា បុរសអនាថា រស់នៅតាមផ្លូវ ម្នាក់ បានស្លាប់ ដោយសារខ្យល់គរ ដែលបណ្តាលមកអាកាសធាតុក្តៅខ្លាំង។
អាកាសធាតុក្តៅខ្លាំង កើតមុនកាលកំណត់ ហើយនិងជាប់ៗគ្នា ប៉ុន្មានថ្ងៃយ៉ាងដូច្នេះ គឺមិនធ្លាប់កើតមានទេ នៅអឺរ៉ុប។ ប្រទេសស្វ៊ីស អូទ្រីស ដែលសំបូរភ្នំទឹកកក ក៏ស្គាល់រសជាតិ កំដៅខ្លាំង ដែលអ្នកវិទ្យាសាស្រ្តវាយតម្លៃថា មានប្រភពចេញមកពីវាលខ្សាច់សាហារ៉ា។
រលកកំដៅងាយនឹងធ្វើឲ្យប្រជាជននៅអឺរ៉ុបរងគ្រោះ ព្រោះថា ក្រៅតែពីខ្យល់ក្តៅ ពួកគេត្រូវប្រឈមស្រូបខ្យល់ ពុលបរិយាកាស ខ្យល់ពុលអូហ្សូន ដែលកើនឡើងខ្លាំង នៅពេលអាកាសធាតុក្តៅខ្លាំង។
នៅប្រទេសបារាំង រដ្ឋាភិបាលបានចាត់វិធានការជាច្រើន ដើម្បីជៀសវាង គ្រោះថ្នាក់បាត់បង់ជីវិតមនុស្សដោយសារកំដៅក្តៅខ្លាំងដូចដែលបារាំងបានជួប កាលពីឆ្នាំ ២០០៣ ដែលកាលណោះ សីតុណ្ហភាព ៤៤,១អង្សា បានសម្លាប់ ជីវិតមនុស្ស ១៥ ០០០នាក់។ នៅថ្ងៃព្រហស្បតិ៍ ដោយសារអាកាសធាតុ ឡើងដល់កម្រិតពិបាកទ្រាំ សាលារៀនជាច្រើន នៅជុំវិញ ទីក្រុងប៉ារីស និងនៅតាមទីក្រុងធំៗមួយចំនួនបានបិទទ្វារ ចំណែកការប្រលងសញ្ញាប័ត្រ មធ្យមសិក្សា ត្រូវបានលើកពេលទៅធ្វើនៅថ្ងៃចន្ទដើមសប្តាហ៍ក្រោយ។
តាមអ្នកឧតុនិយមបារាំង កំដៅThermomètre អាចកើនឡើងខ្លាំងបំផុត នៅថ្ងៃសុក្រនេះ រវាង ៤២ និង៤៤អង្សា ដែលនឹងធ្វើឲ្យបារាំង បំបែកឯតគ្គកម្ម កាលពី ឆ្នាំ ២០០៣ ដែលសីតុណ្ហភាព ឡើងដល់ ៤៤,១អង្សា បានសម្លាប់មនុស្ស ១៥ ០០០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ