អូទ្រីស៖កិច្ចប្រជុំស្តីពីកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥ ដោយគ្មានវត្តមានអាមេរិក
នៅថ្ងៃសុក្រ ទី២៨ មិថុនា កិច្ចប្រជុំស្តីពីកិច្ចព្រមព្រៀងនុយក្លេអ៊ែរអ៊ីរ៉ង់ចុះហត្ថលេខាឆ្នាំ ២០១៥ រៀបចំក្នុងទីក្រុងវីយែន ប្រទេសអូទ្រីស។ គឺជាកិច្ចប្រជុំរវាងក្រុមប្រទេសហត្ថលេខីដែលនៅសេសសល់ បន្ទាប់ពីប្រធានាធិបតីអាមេរិកលោកដូណាល់ ត្រាំបានដកអាមេរិកចេញពីកិច្ចព្រមព្រៀងក្នុងឆ្នាំ ២០១៨។ ប្រទេសហត្ថលេខីនៅសេសសល់ដែលមានវត្តមាននៅក្នុងកិច្ចប្រជុំពេលនេះ គឺអ៊ីរ៉ង់ បារាំង អាល្លឺម៉ង់ អង់គ្លេស ចិន និងប្រទេសរុស្ស៊ី។ គួររម្លឹកថាក្រោយពីបានដកអាមេរិកចេញពីកិច្ចព្រមព្រៀង លោកត្រាំក៏បានដាក់ទណ្ឌកម្មឡើងវិញលើអ៊ីរ៉ង់ដែរ។ នៅត្រង់ចំណុចនេះ អ៊ីរ៉ង់បានស្តីបន្ទោសក្រុមប្រទេសហត្ថលេខីផ្សេង ពិសេសអឺរ៉ុបពីបទមិនបានជួយការពារអ៊ីរ៉ង់នៅចំពោះមុខទណ្ឌកម្មអាមេរិក។ លោកអាបាស មូសាវី អ្នកនាំពាក្យក្រសួងការបរទេសអ៊ីរ៉ង់បានព្រមានថា កិច្ចប្រជុំរវាងក្រុមប្រទេសហត្ថលេខានៅសេសសល់ពេលនេះជាកិច្ចប្រជុំចុងក្រោយដើម្បីស្រោចស្រង់កិច្ចព្រមព្រៀង។ លោកហ្រ្វង់ស័រ នីកូឡូ អតីតឯកអគ្គរដ្ឋទូតបារាំងប្រចាំអ៊ីរ៉ង់បានយល់ឃើញថា អ្វីដែលអ៊ីរ៉ង់ចង់បានពីកិច្ចប្រជុំពេលនេះ គឺការជួយគាំទ្រសេដ្ឋកិច្ចអ៊ីរ៉ង់ពីសំណាក់ប្រទេសហត្ថលេខីដែលនៅសេសសល់។
ចុះផ្សាយនៅថ្ងៃ៖
ស្តាប់ - ០១:១១
« ពិតណាស់ អ្វីដែលអ៊ីរ៉ង់រង់ចាំពីកិច្ចប្រជុំមួយនេះ គឺចង់ឃើញក្រុមប្រទេសហត្ថលេខីនៅសេសសល់ចូលរួមជួយសម្រាលទណ្ឌកម្មដែលដាក់ដោយអាមេរិក។ តែអ្វីដែលច្បាស់នៅចំពោះមុខនេះ ក្រុមប្រទេសអឺរ៉ុបមិនអាចធ្វើអ្វីបានភ្លាមៗទេ។ យន្តការណ៍មួយដែលក្រុមប្រទេសអឺរ៉ុបបានគិតគូរដើម្បីអាចបន្តធ្វើពាណិជ្ជកម្មជាមួយអ៊ីរ៉ង់នោះក៏នៅទាន់បានដាក់ឲ្យដំណើរការដែរ ហើយបើតាមមើលទៅ គេត្រូវការពេលវេលាច្រើនសប្តាហ៍បន្ថែមទៀតទើបអាចប្រើប្រាស់យន្តការណ៍មួយនេះបាន។
ក៏ប៉ុន្តែ ដំណោះស្រាយអាចនឹងមានមកពីប្រទេសរុស្ស៊ី ឬប្រទេសចិន។ តែអ្វីជាការកត់សម្គាល់នោះគឺថា ក្នុងពេលដែលចិនកំពុងមានសង្រ្គាមពាណិជ្ជកម្មត ទល់ខ្លាំងនឹងអាមេរិកនោះ ចិនប្រហែលជាមិនចង់យកហានិភ័យបន្ថែមទៅដាក់ខ្លួនឡើយ។ អ៊ីចឹងនៅសល់ប្រទេសរុស្ស៊ីដែលនៅពេលថ្មីៗនេះបាននិយាយថា ខ្លួនអាចជួយអ៊ីរ៉ង់ក្នុងការនាំប្រេងចេញ។ អ៊ីចឹងបើមានច្រកចេញ គឺមានពីខាងប្រទេសរុស្ស៊ី »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ