ជនជាតិអ៊ីតាលីលោកដាវីដ សាសូលីជាប់ឆ្នោតជាប្រធានសភាអឺរ៉ុប
សភាអឺរ៉ុបមានប្រធានថ្មីឈ្មោះដាវីដ សាសូលីជាជនជាតិអ៊ីតាលី។ មានអាយុ ៦៣ឆ្នាំ និងជាសមាជិកសភាអឺរ៉ុបនៃគណបក្សកណ្តាលឆ្វេងនិយម លោកដាវីដ សាសូលីត្រូវបានក្រុមអ្នកតំណាងរាស្រ្តអឺរ៉ុបបោះឆ្នោតគាំទ្រនាថ្ងៃពុធ ទី៣ កក្កដា។ លោកសាសូលីចូលជំនួសកន្លែងលោកអង់តូនីញ៉ូ តាយ៉ានីដែលជាជនជាតិអ៊ីតាលីដូចគ្នា។ ការជាប់ឆ្នោតជាប្រធានសភារបស់លោកដាវីដ សាសូលីបានធ្វើឡើង បន្ទាប់ពីប្រមុខរដ្ឋ និងប្រមុខរដ្ឋាភិបាលអឺរ៉ុបទាំង ២៨ប្រទេសសមាជិកបានឯកភាពគ្នាជាផ្លូវការនាថ្ងៃអង្គារ ទី២ កក្កដានៅក្នុងជម្រើសបេក្ខជនសម្រាប់តំណែងសំខាន់ចំនួន៤ គឺប្រធានគណៈកម្មការអឺរ៉ុប ប្រធានធនាគារកណ្តាលអឺរ៉ុប ប្រធានក្រុមប្រឹក្សាអឺរ៉ុប និងតំណែងអ្នកតំណាងជាន់ខ្ពស់ទទួលបន្ទុកកិច្ចការបរទេស។ តើលោកដាវីដ សាសូលីមានប្រវត្តិរូបសង្ខេបអ្វីខ្លះ?
ចុះផ្សាយនៅថ្ងៃ៖
ស្តាប់ - ០២:២៤
គេត្រូវរងចាំការបោះឆ្នោតលើកទី២ ទើបលោកដាវីដ សាសូលីទទួលបានសំឡេងគាំទ្រភាគច្រើនដាច់ខាតដល់ទៅ ៣៤៥សំឡេងពីក្រុមអ្នកតំណាងរាស្រ្តអឺរ៉ុបរួមប្រជុំគ្នាក្នុងទីក្រុង Strasbourg ប្រទេសបារាំងនាថ្ងៃពុធ ទី៣ កក្កដា។ ការជាប់ឆ្នោតរបស់លោកដាវីដ សាសូលីបានអនុញ្ញាតឲ្យប្រទេសអ៊ីតាលីបន្តរក្សាបានតំណែងមួយក្នុងចំណោមតំណែងសំខាន់ទាំង៣ របស់អឺរ៉ុប បន្ទាប់ពីអ៊ីតាលីបានបាត់បង់ប្រធានគណៈកម្មការអឺរ៉ុប និងតំណែងប្រមុខការទូតអឺរ៉ុប។ ចាប់កំណើតនៅថ្ងៃទី៣០ ឧសភា ឆ្នាំ ១៩៥៦ ក្នុងទីក្រុង Florence និងបន្ទាប់ពីការសិក្សាផ្នែកវិទ្យាសាស្រ្តនយោបាយ លោកដាវីដ សាសូលីបានផ្តើមអាជីពជាអ្នកកាសែតដោយសហការជាមួយកាសែតតូចៗ និងទីភ្នាក់ងារសារព័ត៌មានមួយចំនួន។
ក្នុងឆ្នាំ ១៩៩២ លោកដាវីដ សាសូលីបានចូលបម្រើការងារនៅក្នុងកាណាល់វិទ្យុ ទូរទស្សន៍រដ្ឋឈ្មោះ RAI និងបានក្លាយជាអ្នកនិយាយព័ត៌មានពេលយប់លើកញ្ចក់ទូរទស្សន៍។ គឺពេលនោះហើយដែលលោកដាវីដផ្តើមល្បីឈ្មោះខ្លាំងនៅក្នុងចំណោមពលរដ្ឋអ៊ីតាលីរាប់លាននាក់ និងត្រូវបានតែងតាំងជានាយករង។ នៅឆ្នាំ ២០០៩ លោកដាវីដបានផ្តើមចូលប្រឡូកក្នុងឆាកនយោបាយ ខណៈពេលដែលអតីតចៅហ្វាយក្រុងរ៉ូមលោក Walter Veltroni បានរៀបចំច្របាច់គណបក្សធំពីរបញ្ចូលគ្នា គឺគណបក្សឆ្វេងនិយម និងគណបក្សកណ្តាលឆ្វេងនិយមដោយប្រសូត្រចេញគណបក្សតែមួយមានឈ្មោះគណបក្សប្រជាធិបតេយ្យ។
ឈរឈ្មោះជាបេក្ខជននៅក្នុងការបោះឆ្នោតសភាអឺរ៉ុបក្នុងឆ្នាំ ២០០៩ លោកដាវីដ សាសូលីបានជាប់ឆ្នោតនៅក្នុងបញ្ជីឈ្មោះគណបក្សប្រជាធិបតេយ្យជាមួយនឹងសំឡេងគាំទ្រជាង ៤០០ ០០០សំឡេង។ តាមរយៈជោគជ័យមួយនេះ លោកដាវីដ សាសូលីបានបោះបង់ចោលទាំងស្រុងនូវអាជីពជាអ្នកកាសែត និងចាប់យកអាជីពជាអ្នកនយោបាយតែមួយនៅក្នុងសភាអឺរ៉ុប។ ក្នុងឆ្នាំ ២០១៣ លោកដាវីដ សាសូលីបានព្យាយាមធ្វើនយោបាយក្នុងស្រុកដោយឈរឈ្មោះជាបេក្ខជនចៅហ្វាយក្រុងរ៉ូម តែបានទទួលបរាជ័យ។ បន្ទាប់មកក្នុងឆ្នាំ ២០១៤ លោកដាវីដបានជាប់ឆ្នោតម្តងទៀតជាតំណាងរាស្រ្តអឺរ៉ុប រួចបានក្លាយជាអនុប្រធានសភាអឺរ៉ុបទទួលបន្ទុកថវិកា និងនយោបាយអឺរ៉ុប មេឌីទែររ៉ាណេ។ ថ្ងៃទី៣ កក្កដា ឆ្នាំ ២០១៩ ក៏បានឡើងតំណែងមួយកម្រិតទៀតជាប្រធានសភាអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ