លោកដូណាល់ ត្រាំ ផ្ទុះកំហឹង ដាក់នាយករដ្ឋមន្ត្រីអង់គ្លេស
មិត្តភាពដ៏ចំណាស់ កំពុងរងភាពអាប់អួរ ! ជាពិសេសគឺរវាងលោកប្រធានាធិបតីអាមេរិក និងប្រមុខដឹកនាំរដ្ឋាភិបាលអង់គ្លេស តែម្តង។ ប្រធានាធិបតីអាមេរិក លោក ដូណាល់ ត្រាំ បានផ្ទុះកំហឹងដាក់លោកស្រីនាយករដ្ឋមន្ត្រី អង់គ្លេស ហៀបផុតតំណែង តេរ៉េហ្សា មេ យ៉ាងខ្លាំង និងដោយចំៗតែម្តង។ ជម្លោះការទូត បានឆេះរោលឡើង ក្រោយពីសារព័ត៌មានបានចុះផ្សាយសម្តី បែបបណ្តុះបង្អាប់របស់ឯកអគ្គរាជទូតអង់គ្លេស លើរូបលោកប្រធានាធិបតីអាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
លោក ដូណាល់ ត្រាំ បានបញ្ចេញប្រតិកម្មរិះគន់លោកស្រីនាយករដ្ឋមន្ត្រី ហៀបផុតអំណាច យ៉ាងចាស់ដៃ ដោយប្រើពាក្យធ្ងន់ៗបំផុត បន្ទាប់ពីលោកស្រីមេ បានផ្តល់ការគាំទ្រដល់ឯកអគ្គរដ្ឋទូតអង់គ្លេសប្រចាំវ៉ាស៊ីនតោន ដែលបានចាត់ទុករដ្ឋបាលលោកត្រាំ ថា អសមត្ថភាព គ្មានសណ្តាប់ធ្នាប់ គ្មានទិសដៅត្រឡប់ត្រឡិន។
“ខ្ញុំសូមរិះគន់ចំណាត់ការរបស់លោកស្រី មេ ក្នុងសំណុំរឿងBrexit ដែលបានបង្កឱ្យមានភាពរញ៉េរញ៉ៃ។ នេះជាសំណេររបស់លោកត្រាំ ដោយបន្ថែមទៀត ថា “តែដំណឹងល្អគឺអង់គ្លេសនឹងមាននាយករដ្ឋមន្ត្រីក្នុងពេលឆាប់ៗ”។ លោកដូណាល់ ត្រាំ ក៏បានវាយប្រហារឯកអគ្គរដ្ឋទូតអង់គ្លេសប្រចាំទីក្រុងវ៉ាស៊ីនតោនដែរ ថា “ខ្ញុំមិនស្គាល់ទូតនេះទេ តែគ្មាននរណាស្រលាញ់ គ្មាននរណាចូលចិត្តទេនៅសហរដ្ឋអាមេរិក ! យើងគ្មានទំនាក់ទំនងជាមួយឡើយ!”។
តើដើមហេតុកើតឡើងយ៉ាងដូចម្តេច បានជាជំរុញឱ្យប្រធានាធិបតីអាមេរិកខឹងសម្បារនឹងអង់គ្លេសខ្លាំងយ៉ាងដូច្នេះ ?
តាមការពិត ប្រធានាធិបតីត្រាំ បានជួបសន្ទនាជាមួយលោក គីម ដារ៉ូច Kim Darroch ជាច្រើនលើក។ បើតាមសារព័ត៌មានអាមេរិក ឯកអគ្គរាជទូតរូបនេះ ក៏បានជួបលោក ចន ប៊ុលតុន ទីប្រឹក្សាសន្តិសុខជាតិរបស់សេតវិមាន ជាញឹកញាប់ដែរ។ តែតាមប្រព័ន្ធសារទ្វីត លោក ដូណាល់ ត្រាំ បានប្រកាសថាជំនួបទាំងនោះត្រូវបានលុបចោល។ លោកសង្ឃឹមលើការតែងតាំងឯកអគ្គរដ្ឋទូតថ្មី ក្រោយពេលអង់គ្លេសមាននាយករដ្ឋមន្ត្រី។
សូមបញ្ជាក់ថា ក្រោយជាប់ឆ្នោត នៅឆ្នាំ២០១៦ភ្លាម ប្រធានាធិបតីអាមេរិក បានប៉ុនប៉ង ដាក់សម្ពាធលើក្រុងឡុងដ៍ក្នុងជម្រើសតែងតាំងឯកអគ្គរដ្ឋទូត ដោយចង់ឃើញលោក មកកាត់តំណែងនៅវ៉ាស៊ីនតោន តែមិនបានសម្រេច។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ