ស្តាប់ ថតទុក Podcast
  • 00h00 - 01h00 GMT
    កម្មវិធីព័ត៌មាន 17/11 00h00 GMT
  • 06h00 - 07h00 GMT
    កម្មវិធីព័ត៌មាន 17/11 06h00 GMT
  • 12h00 - 13h00 GMT
    កម្មវិធីព័ត៌មាន 16/11 12h00 GMT

អ៊ីរ៉ង់​រករឿង​ចង់​ចាប់​នាវា​ដឹក​ប្រេង​អង់គ្លេស នៅ​ច្រក​សមុទ្ទ Ormuz

អ៊ីរ៉ង់​រករឿង​ចង់​ចាប់​នាវា​ដឹក​ប្រេង​អង់គ្លេស នៅ​ច្រក​សមុទ្ទ Ormuz
 
នាវា​ចម្បាំង​អង់គ្លេស Royal Navy Type 23 HMS Montrose នៅ​សមុទ្ទ​អូម៉ង់ © Reuters

នាវា​យោធា​អ៊ីរ៉ង់ ៥​ គ្រឿង បាន​សាកល្បងបង្អាក់​​ដំណើរ​របស់​នាវា​ដឹកប្រេង​អង់គ្លេស នៅ​ច្រក​​អកមូ តំបន់​ដែន​ទឹកប្រកប​ដោយ​​យុទ្ធ​សាស្ត្របំផុត កាលពី​ថ្ងៃ​ពុធ​ម្សិលមិញ។ សំណាង​ល្អ​ នាវា​ដឹកប្រេងអង់គ្លេស​ មាន​នាវា​យោធា​ជា​អង្គរក្ស​តាមការពារ ទើប​អាច​បន្ត​ដំណើរ​ទៅ​មុខ​បាន​​តាម​សម្រួល​វិញ។ នេះ​បើ​តាម​ប្រភព​ព័ត៌មាន​អាមេរិក និង​អង់គ្លេស​។ ប៉ុន្តែ​អ៊ីរ៉ង់ បាន​ឆ្លើយ​បដិសេធនៅថ្ងៃ​ព្រហស្បតិ៍​នេះ ថា​ក្នុង​រយៈ​ពេល​២៤​ម៉ោងចុងក្រោយ​នេះ នាវាល្បាត​អ៊ីរ៉ង់​គ្មាន​បាន​ជួប​នាវា​បរទេសទេ។

បើ​តាម​ប្រសាសន៍​របស់​អ្នក​ទទួល​ខុស​ត្រូវ​អាមេរិក លើក​មក​ផ្សព្វផ្សាយ​ដោយ​ទូរទស្សន៍​CNN មាន​នាវាយោធា​​ របស់កងកម្លាំង​ឆ្មាំ​បដិវត្តន៍​អ៊ីរ៉ង់ ៥គ្រឿងបាន​បើក​មកចូល​​កៀកនឹង​នាវា​ដឹកប្រេងអង់គ្លេស ដោយបញ្ជា និង​គៀង​​នាវា​British Heritage ឱ្យ​ប្តូរ​ទិស ​ទៅ​ឈប់​នៅ​​ក្នុង​ដែន​ទឹក​អ៊ីរ៉ង់ ជិត​នោះ។ តែ​ជា​សំណាង​ល្អ នាវាដឹកប្រេង​អង់គ្លេស​មាន​នាវាយោធា​នៃ​កង​កម្លាំង​​ Royal Navy តាមការពារ។ បើ​តាម​តំណាង​រដ្ឋាភិបាល​អង់គ្លេស និង​រូបភាព​វីដេអូ​ ថត​ពីលើ​អាកាស​ដោយ​​យន្តហោះ​អាមេរិក​ នាវា​ចម្បាំង​អង់គ្លេស HMS Montrose បាន​បង្ហោះ​សារ​សំឡេង​សម្លុត​​ព្រមាន និង​បាន​លើក​កាណុង ភ្ជង់​តម្រង់​នាវា​អ៊ីរ៉ង់តែ​ម្តង ទើប​នាវាយោធា​អ៊ីរ៉ង់​ខ្លបខ្លាច ​បក​ក្រោយ​បើក​ចេញ​ទៅ​វិញ។ ក្រសួង​ការពារ​ជាតិ​អង់គ្លេស​មិន​ធ្វើ​អត្ថាធិប្បាយ​អ្វី ទាំង​អស់​។

អ៊ីរ៉ង់​សងសឹក​អង់គ្លេស ?

ប៉ុន្តែ​អង់គ្លេស​បាន​សម្តែង​ការ​ព្រួយ​បារម្ភ​យ៉ាង​ខ្លាំង និង​បានអំពាវនាវ​ឱ្យ​អាជ្ញាធរ​អ៊ីរ៉ង់​សម្រួល​ឱ្យ​មាន​ភាព​ធូរស្បើយ។​ ហេតុការណ៍​នេះ​កើត​ឡើង​តែ​មួយ​ថ្ងៃ​ ក្រោយ​សេចក្តីព្រមាន​របស់​ប្រធានាធិបតី​អ៊ីរ៉ង់ រ៉ូហានី អំពី​ផលវិបាក​នៃ​ការ​​ឃាត់​នាវា​អ៊ីរ៉ង់ ក្នុង​ដែន​ទឹក​អង់គ្លេស កាលពី​សប្តាហ៍​មុន​។ តើ​នេះ​ជា​ទង្វើ​សងសឹក​របស់​អ៊ីរ៉ង់​លើ​អង់គ្លេសឬ ? សម្រាប់​អ្នក​ទទួល​ខុស​ត្រូវ​អាមេរិក អ្វី​ដែល​អ៊ីរ៉ង់កំពុងធ្វើ​ពេល​នេះ គឺ​ជា​យាយី សម្លុត​បំភ័យ និង​ជា​ការ​ប៉ុនប៉ង​ជ្រៀតជ្រែក​រំខាន​ចរាចរណ៍​ដឹកជញ្ជូន​​ផ្លូវ​​សមុទ្ទ​ ដោយ​សេរី។

ច្រកសមុទ្រ​អកមូ ​គ្រប់គ្រង​ដោយ​ប្រទេស​អ៊ីរ៉ង់ និង​ប្រទេស​អូម៉ង់។ ជា​ច្រកសមុទ្ទ​ដ៏​តូច​មួយ ដែលមាន​ទទឹង​​ប្រមាណតែ ៥០គីឡូម៉ែត្រ និង​ទឹក​ជ្រៅ​បំផុត​ត្រឹម​៦០​ម៉ែត្រ។​ ជាង​នេះ​ទៅ​ទៀត ​អកមូ ជា​ច្រក​តែ​​មួយ​គត់ ​​ដែល​នាំ​ទៅ​កាន់​ឈូងសមុទ្រពែក្ស​ ជា​ជង្រុក​ប្រេង។

តែ​ អកមូ​ជា​ច្រកសមុទ្រ​យុទ្ធសាស្រ្ត​សម្រាប់​ពាណិជ្ជកម្ម​ប្រេងឆៅ និង​ឧស្ម័ន​ ពិភពលោក។ ជា​រៀងរាល់​ថ្ងៃ មាន​ប្រេងឆៅ​ជិត ១៧លានបារីល​បាន​ដឹក​ចេញ​តាម​ច្រក​សមុទ្រ​អកមូ ពោល​ជិត ៣០% នៃ​ផលិតផល​ប្រេងឆៅ​ក្នុង​លោក​ដែល​ដឹក​ជញ្ជូន​តាម​ផ្លូវសមុទ្រ។

​ក្រុង​តេហេរ៉ង់​ធ្លាប់​គំរាម​បិទច្រក​នេះ​​ជា​ច្រើនលើក​ច្រើន​សា​ហើយ។ អ៊ីរ៉ង់​ធ្លាប់​គំរាម​បិទ​ច្រក​នេះ​ម្តង​ហើយនៅ​​ឆ្នាំ ២០១១ ក្នុង​ពេល​មាន​ភាព​​ប្រឈម​មុខ​ខ្លាំង​ទល់​នឹង​បស្ចិមលោក។ ក្រោយ​ការ​ប្រកាស​ដក​ខ្លួន​ចេញ​ពី​កិច្ចព្រមព្រៀង​នុយក្លេអ៊ែរ​អ៊ីរ៉ង់​ និង​ប្រកាស​ដាក់​​ទណ្ឌកម្ម​លើ​អ៊ីរ៉ង់​មក ភាព​តាន​តឹង​បាន​ឡើង​ប៉ោង​ខ្លាំង។ មេបញ្ជាការ​ឆ្មាំ​បដិវត្តន៍​អ៊ីរ៉ង់បាន​ព្រមាន ​​បិទ​ច្រក​សមុទ្រ​Ormuz ជា​ថ្មី។ ឧប្បត្តិហេតុ​វាយប្រហារ​លើ​នាវា​ដឹកប្រេងក៏​មាន​​កើត​ឡើង​ជា​ញឹកញាប់ ដែល​អាមេរិក​ចោទ​​ដោយ​ចំៗ​ថា​ជា​ស្នាដៃ​របស់​អ៊ីរ៉ង់។ ហើយ​អ៊ីរ៉ង់​តែង​បដិសេធ​ជា​និច្ច។ ហេតុការណ៍ម្សិលមិញ​នេះ​ ក៏​តេអេរ៉ង់​ច្រាន​ចោល​ដែរ។

បង្កើតសម្ព័ន្ធ​អន្តរជាតិ​​ដើម្បីការពារ​​​នាវាដឹកប្រេង

ប្រឈម​នឹង​ស្ថានការណ៍​បែប​នេះ កាលពី​ម្សិលមិញ អាមេរិក​បាន​បង្ហើប​ចេតនា​ចង់​បង្កើត​សម្ព័ន្ធ​សមុទ្ទ​អន្តរជាតិ ដើម្បី​ធានា​សេរីភាព​នៃចរាចរណ៍​នៅ​តំបន់​ឈូង​សមុទ្ទ​នេះ​ ពោល​គឺ​គ្រប់​នាវា​ដឹក​ប្រេង​ នឹង​ត្រូវ​មាន​នាវា​យោធា​ការពារ​។ អាមេរិក​​សង្ឃឹម​ថា​នឹង​អាច​ប្រមូល​ប្រទេស​សម្ព័ន្ធ​មិត្ត​ជា​ច្រើន​ឱ្យ​រួបរួម​​កម្លាំង​ជា​ធ្លុង​មួយ ប្រឈម​នឹង​អ៊ីរ៉ង់ បើ​ទោះ​បី​ជា​សម្ព័ន្ធមិត្ត​អាមេរិក​ដូច​ជា​មិន​សូវ​អឺអើ​យ៉ាងណា​ក៏​ដោយ។ អាមេរិក​ធ្លាប់​បាន​ធ្វើ​ប្រតិបត្តិការ​ការពារ​នាវា​ដឹកប្រេង នៅ​ក្នុង​តំបន់​ឈូង​សមុទ្ទ​ពែក្ស​នេះរួច​មក​ហើយ។ កាលសម័យ​សង្គ្រាម​អ៊ីរ៉ង់-អ៊ីរ៉ាក់ នាវា​ដឹកប្រេង​កូវ៉ែត​ បាន​ធ្វើ​ចរាចរណ៍ ដោយ​ពាក់​ទង់ជាតិ​អាមេរិក​ផង។

បើ​តាម​គម្រោង​ អាមេរិក​សង្ឃឹម​ថា​នៅ​រវាង​ពីរ​បី​សប្តាហ៍​ទៀត គេ​នឹង​អាច​បាន​ដឹង​ថា​ប្រទេស​ណា​ខ្លះ​​មាន​ឆន្ទៈ​នយោបាយ​គាំទ្រ​គំនិត​ផ្តួច​ផ្តើម​អាមេរិក​នេះ។ អាមេរិកគិត​ការ​នេះ​ដោយ​​ធ្វើការ​ជាមួយ​យោធា​ដោយ​ផ្ទាល់។ អេមីរ៉ាតអារ៉ាប់រួម និង​អារ៉ាប៊ីសាអូឌីត ទំនង​ជា​ព្រម​សហការ​ជាមួយ​អាមេរិ​ក​មុន​គេ។ ឥណ្ឌា​បាន​បញ្ជូន​នាវា​ចម្បាំង​ពីរគ្រឿង​រួចមក​ហើយ មក​កាន់​តំបន់​ឈូង​សមុទ្ទ​នេះ ដើម្បី​ការ​ពារ​នាវាដឹកប្រេង​ឥណ្ឌា។ សម្ព័ន្ធមិត្ត​អាមេរិក​ដែល​មាន​មូលដ្ឋាន​ទ័ព​​នៅ​ក្នុង​តំបន់​ស្រាប់​ហើយ​ គឺ​បារាំង​និង​អង់គ្លេស៕


ទាក់ទង​នឹង​ប្រធានបទ​នេះ

  • ព្រឹត្តិការណ៍អន្តរជាតិប្រចាំថ្ងៃ

    អ៊ីរ៉ង់ប្រាប់​អង់គ្លេសឲ្យ​​ដោះលែង​ កប៉ាល់ដឹកប្រេង​របស់ខ្លួន ជាប្រញាប់

    ស្វែងយល់បន្ថែម

  • ព្រឹត្តិការណ៍អន្តរជាតិប្រចាំថ្ងៃ

    អ៊ីរ៉ង់-អាមេរិក៖ ទីប្រឹក្សា​កិច្ចការ​បរទេស​បារាំង​ទៅ​អ៊ីរ៉ង់ ដើម្បី​បើកផ្លូវ​សម្របសម្រួល

    ស្វែងយល់បន្ថែម

  • រុស្ស៊ី អំពាវនាវ​ទាំង​ព្រួយបារម្ភ ឲ្យ​បន្ត​កិច្ចសន្ទនា ជុំវិញ​កម្មវិធី​នុយក្លេអ៊ែរ​អ៊ីរ៉ង់

    ស្វែងយល់បន្ថែម

  • ព្រឹត្តិការណ៍អន្តរជាតិប្រចាំថ្ងៃ

    អ៊ីរ៉ង់បន្តប្រើអ៊ុយរ៉ាញ៉ូមជាអាវុធដើម្បីសងសឹកនឹងទណ្ឌកម្មសេដ្ឋកិច្ចរបស់អាមេរិក

    ស្វែងយល់បន្ថែម

  • AIEA-អ៊ីរ៉ង់

    AIEA នឹងបើកកិច្ចប្រជុំវិសាមញ្ញានៅថ្ងៃទី១០ កក្កដាតាមសំណើរបស់សហរដ្ឋអាមេរិក

    ស្វែងយល់បន្ថែម

  1. 1
  2. 2
  3. 3
  4. ...
  5. បន្ទាប់ >
  6. ចុងក្រោយ >
កម្មវិធីផ្សាយផ្សេងទៀត
 
សូមអភ័យទោស យើងមិនអាច​ភ្ជាប់​ទៅ​ទំព័រ​ដែល​លោកអ្នក​ស្នើសុំ​បានទេ