ដោយទទួលមីស៊ីលរុស្ស៊ី តួកគីកំពុងផ្គើននឹងពាក្យគំរាមរបស់អាមេរិក
កេស ដាក់ប្រព័ន្ធខែលមីស៊ីលរុស្ស៊ី បានទៅដល់ប្រទេសតួកគី ហើយ កាលពីថ្ងៃ សុក្រម្សិលមិញ។ ទិញមីស៊ីលរុស្ស៊ី សម្រាប់ប្រព័ន្ធការពារដែនអាកាស រដ្ឋាភិបាលតួកគីផ្គើនដាក់ អាមេរិក ដែលបានគំរាមរួចហើយពីការដាក់ទណ្ឌកម្ម ដូចជាផាត់តួកគីចេញពីកិច្ចសន្យាទិញយន្តហោះចម្បាំងរបស់អាមេរិក F35 ជាដើម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៦
យន្តហោះរុស្សី ដឹកប្រព័ន្ធខែលមីស៊ីលប្រភេទ S-400 បានចុះចតនៅមូលដ្ឋានទ័ពតួកគី នៅរដ្ឋធានី អង់ការ៉ា កាលពីថ្ងៃសុក្រ។ តាមសេចក្តីថ្លែងការណ៍របស់ក្រសួងការពារជាតិតួកគី នេះជាផ្នែកមួយ នៃការបញ្ជូនទំនិញ ពីខាងភាគីរុស្ស៊ី នៅក្នុងពេលផ្នែកផ្សេងទៀតដើម្បីដំឡើងប្រព័ន្ធខែលមីស៊ីលទាំងមូល នឹងមកដល់តួកគី នៅប៉ុន្មានថ្ងៃខាងមុខ។
នៅទីក្រុងម៉ូស្គូ ប្រភពស្និទ្ធិនឹងកងទ័ពរុស្ស៊ីបាននិយាយប្រាប់ទីភ្នាក់ងារព័ត៌មានរដ្ឋរុស្ស៊ី TASS ថា បន្ទាប់ពីយន្តហោះទី២ទៅដល់តួកគីនៅប៉ុន្មានថ្ងៃទៀត រុស្ស៊ី នឹងបញ្ជូនទំនិញ មីស៊ីល ១២០ដើម ប្រភេទផ្សេងៗគ្នាទៅតួកគី នៅចុងរដូវក្តៅនេះ។ តាមទីភ្នាក់ងារព័ត៌មានTASS ដដែល ទាហានតួកគីជាង២០នាក់បានទទួលការបណ្តុះបណ្តាល ឲ្យចេះគ្រប់គ្រង ប្រើប្រព័ន្ធខែលមីស៊ីលរុស្ស៊ី នៅអំឡុងខែឧសភា ចំណែក ទាហាន៨០នាក់ផ្សេងទៀត នឹងទទួលវគ្គបណ្តុះបណ្តាលនៅខែ កក្កដា និងសីហានេះ។
មីស៊ីលរុស្ស៊ី បានទៅដល់ទឹកដីតួកគី នៅបន្ទាប់ពីរដ្ឋាភិបាលតួកគី កាលពីថ្ងៃពុធ បានទាត់ចោល ជាថ្មី ការព្រមានរបស់អាមេរិក នៅក្នុងរឿងជជេសទិញ ប្រព័ន្ធខែលមីស៊ីល ពីរុស្ស៊ី។ តួកគីបានអំពាវនាវកុំឲ្យអាមេរិកដាក់ទណ្ឌកម្មមកលើខ្លួន បើសិនមិនចង់សម្លាប់សម្ព័ន្ធភាពទ្វេរភាគី តួកគី អាមេរិក។
ទីក្រុងវ៉ាស៊ីនតោនវិញ បានប្រឆាំងដាច់ខាត មិនឲ្យតួកគី ទិញប្រព័ន្ធខែលមីស៊ីលរុស្ស៊ី ក្នុងហេតុផលថា មីស៊ីលប្រឆាំងមីស៊ីលរបស់រុស្ស៊ី មិនសមស្របនឹងគោលនយោបាយរបស់អង្គការអូតង់ ដែលតួកគីជាសមាជិក។ មួយវិញទៀត អាមេរិកបារម្ភខ្លាចថា ក្រុមអ្នកជំនាញដែលបង្រៀន ទាហានតួកគី ឲ្យចេះប្រើប្រព័ន្ធខែលមីស៊ីល នឹងអាចលួចចូលទៅទម្លាយអាថ៌កំបាំងបច្ចេកវិទ្យា របស់យន្តហោះចម្បាំងអាមេរិក F35 ដែលតួកគីចង់ទិញ ទៅបំពាក់ឲ្យកងទ័ពរបស់ខ្លួនផងដែរនោះ។
នៅដើមខែមិថុនា អាមេរិកបានប្រកាសជាផ្លូវការ ដាក់ឱសានវាទរហូតដល់ថ្ងៃទី ៣១កក្កដា ឲ្យតួកគី ផ្លាស់ប្តូរចិត្តលែងទិញ ទទួលប្រព័ន្ធខែលមីស៊ីល រុស្ស៊ី បើមិនដូច្នោះទេ អាមេរិកនឹងដាក់ទណ្ឌកម្ម ឈប់លក់យន្តហោះចម្បាំង ដ៏ទំនើប ឲ្យតួកគី។
នៅមួយខែក្រោយការគំរាមរបស់អាមេរិក និងនៅក្រោយ ជំនួបជាមួយលោកដូណាល់ ត្រាំ នៅទីក្រុងវ៉ាស៊ីន លោកប្រធានាធិបតីតួកគី អ៊ែរដូហ្កាន បានអះអាងថា លោកនៅតែទិញប្រព័ន្ធខែលមីស៊ីលរុស្ស៊ី និងមិនចុះញ៉មខ្លាចការដាក់ទណ្ឌកម្មរបស់អាមេរិក។
សម្រាប់អ្នកជំនាញនយោបាយ Nick Heras ដែលបម្រើការនៅមជ្ឈមណ្ឌលសម្រាប់សន្តិសុខថ្មីរបស់អាមេរិក វាមិនមែនជារឿងសម្ងាត់ទេ ដែលតួកគីចង់បានប្រព័ន្ធខែលមីស៊ីលរុស្ស៊ី សម្រាប់យកបំពាក់ឲ្យកងទ័ពរបស់ខ្លួន។ ដើម្បី ហេតុផលសន្តិសុខជាតិ តួកគីត្រូវការប្រព័ន្ធខែលមីស៊ីល ដែលមានសមត្ថភាព ខ្ពស់។ ប្រព័ន្ធខែលមីស៊ីល របស់រុស្ស៊ី ប្រភេទ S-400ឆ្លើយតបគ្រប់លក្ខណៈចង់បានរបស់តួកគី ព្រោះវាគ្របដណ្តប់ការពារទាំងស្រុង ដែនអាកាសតួកគី ពីការវាយប្រហារពីខាងក្រៅ។ បញ្ហានៅពេលនេះ គឺនៅត្រង់ថា តួកគី ដោយទិញមីស៊ីលរុស្ស៊ី ដែលជាគូប្រជែងរបស់អាមេរិក តួកគីកំពុងដើរឃ្លាតឆ្ងាយពីអាមេរិកដែលជាសម្ព័ន្ធមិត្ត និងអូតង់ ដែលតាមពិត មានកាតព្វកិច្ច ត្រូវការពារតួកគី ពីការវាយប្រហារពីខាងក្រៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ