សហភាពអឺរ៉ុបដាក់ទណ្ឌកម្មតួកគីដែលចូលទៅជីកខួងបូមឧស្ម័ននៅសមុទ្រស្ហ៊ីប
ចុះផ្សាយនៅថ្ងៃ៖
ស្តាប់ - ០៦:២៥
សហភាពអឺរ៉ុប និងតួកគី បានដំឡើងសំលេងដាក់គ្នា ជាថ្មី នៅក្នុងរឿងជីងខួងបូមឧស្ម័ន ដ៏ចម្រូងចម្រាស នៅដែនសមុទ្រស្ហ៊ីប ក្នុងសមុទ្រមេឌីទែរ៉ាណេ។ នៅថ្ងៃចន្ទទី ១៥ កក្កដា សហភាពអឺរ៉ុបបានសម្រេច ដាក់ទណ្ឌកម្មលើតួកគី ដែលអឺរ៉ុបបានចោទប្រកាន់ថា បានចូលទៅខួងបូមឧស្ម័ន ដោយខុសច្បាប់ ក្នុងដែនសមុទ្ររបស់ប្រទេសស្ហ៊ីប ដែល ជាសមាជិករបស់សហភាពអឺរ៉ុប។ នៅថ្ងៃអង្គារទី ១៦ កក្កដា តួកគី តាមរយៈ ក្រសួងការបរទេសបានប្រតិកម្មតបទៅវិញថា ទណ្ឌកម្មរបស់អឺរ៉ុបនឹងមិនអាចរារាំង បង្អាក់សកម្មភាពខួងបូមឧស្ម័នរបស់កប៉ាល់តួកគី នៅក្នុងសមុទ្រស្ហ៊ីបបាននោះទេ។
សហភាពអឺរ៉ុប កាលពីថ្ងៃចន្ទ បានប្រកាសចាត់វិធានការជាច្រើនដើម្បីដាក់ទណ្ឌកម្មតួកគី ដែលបានចូលទៅ រុករកឧស្ម័ន ដោយខុសច្បាប់ នៅក្នុងដែនសមុទ្ររបស់ប្រទេសកោះស្ហ៊ីប។ ប៉ុន្តែ នៅថ្ងៃអង្គារនេះ តួកគីបានអះអាងថា ទណ្ឌកម្មរបស់សហភាពអឺរ៉ុប នឹងមិនធ្វើឲ្យតួកគីផ្លាស់ប្តូរ ចិត្ត បញ្ឈប់ សកម្មភាពរុករកប្រេង នៅក្នុងសមុទ្រមេឌីទែរ៉ាណេនោះទេ។
សហភាពអឺរ៉ុបសម្រេចដាក់ទណ្ឌកម្មទៅលើតួកគី ដើម្បី ការពារប្រទេសកោះស្ហ៊ីប ដែលជាសមាជិករបស់សហភាពអឺរ៉ុប។ ភាពតានតឹងរវាងតួកគី និងសហភាពអឺរ៉ុបបានកើតមានកាន់តែខ្លាំង ចាប់តាំងពីតួកគី បានបញ្ជូនកប៉ាល់ ទៅជីកបូមឧស្ម័ន ដោយខុសច្បាប់ នៅក្នុងដែនសមុទ្រ របស់ប្រទេសស្ហ៊ីប កាលពីចុងខែមិថុនាកន្លងទៅ។ ដោយដាក់ទណ្ឌកម្ម ដំឡើងសំលេងដាក់តួកគី សហភាពអឺរ៉ុបមិនមែនធ្វើឡើង ដើម្បីគ្រាន់តែ ការពារប្រទេសសមាជិក ស្ហ៊ីបតែប៉ុណ្ណោះទេ ប៉ុន្តែសហភាពអឺរ៉ុប ក៏ចង់ការពារផលប្រយោជន៍របស់ក្រុមហ៊ុន របស់ប្រទេសសមាជិកអឺរ៉ុបផ្សេងទៀត ដូចជា បារាំង អ៊ីតាលី ជាដើម ដែលកំពុងចុះកិច្ចសន្យា រុករកប្រេង ជាមួយរដ្ឋាភិបាលស្ហ៊ីប។
សម្រាប់សហភាពអឺរ៉ុប ការដែលតួកគី បញ្ជូនកប៉ាល់ជីកបូមឧស្ម័នទី ២ទៅកាន់ដែនសមុទ្រស្ហ៊ីប កាលពីថ្ងៃពុធ សប្តាហ៍មុន គឺជារឿងខុសច្បាប់ និងដែលគេមិនអាចទទួលយកបានទេ។
ដើម្បី ពិន័យ តួកគី ក្នុងរឿងចូលទៅរំលោភ ខួងបូមឧស្ម័ន នៅក្នុងដែនសមុទ្រស្ហ៊ីប សហភាពអឺរ៉ុប នៅថ្ងៃចន្ទ ម្សិលមិញ បានសម្រេចវិធានការ ដាក់ទណ្ឌកម្មលើតួកគី ទាំងក្នុងផ្នែក ការទូត ហើយនិងសេដ្ឋកិច្ច។ ជារួម សហភាពអឺរ៉ុបនឹងកាត់ផ្តាច់ ថវិកាជំនួយ ជាង ១៤៥លានអឺរ៉ូ ដែលតួកគី ត្រូវទទួលបានពីមូលនិធិ អឺរ៉ុប នៅឆ្នាំ ២០២០ខាងមុខ នៅក្នុងនាមដែលតួកគី ត្រូវប្រុងប្រៀបខ្លួនចូលជាសមាជិករបស់សហភាពអឺរ៉ុប។
សហភាពអឺរ៉ុបបានអំពាវនាវផងដែរ ឲ្យធនាគារវិនិយោគ អឺរ៉ុប ពិនិត្យសើរើឡើងមើលលក្ខខណ្ឌខ្ចីប្រាក់ មុននឹងផ្តល់ប្រាក់កម្ចី ដល់គម្រោងវិនិយោគរបស់តួកគី។
ក្រៅតែពីដាក់ទណ្ឌកម្មសេដ្ឋកិច្ច សហភាពអឺរ៉ុបបានសម្រេចផងដែរ ថា នឹងកាត់បន្ថយ ការពិភាក្សា នៅលំដាប់ថ្នាក់កំពូល ជាមួយភាគីតួកគី។
តួកគីមិនខ្វល់ខ្លាចទណ្ឌកម្មរបស់សហភាពអឺរ៉ុប
ស្ថិតនៅក្នុងសមុទ្រមេឌីទែរ៉ាណេ ចន្លោះ ប្រទេសអេហ្ស៊ីប និងតួកគី ប្រទេសកោះស្ហ៊ីបត្រូវបាន ពុះចែកចេញជា២ភាគ ចាប់តាំង ពីមានការចូលឈ្លានពានរបស់ទាហានតួកគី នៅឆ្នាំ ១៩៧៤ នៅក្រោយរដ្ឋប្រហារមិនបានសម្រេច ដែលមានបំណងចង់ភ្ជាប់កោះស្ហ៊ីប ទៅប្រទេសក្រិក។ ចាប់តាំងពីពេលនោះមក តំបន់ភាគខាងជើង ឬស្មើនឹង១ភាគ៣ នៃទឹកដីសរុបរបស់ស្ហ៊ីប គ្រប់គ្រងដោយសាធារណរដ្ឋតួកគី នៅស្ហ៊ីប គាំទ្រ ដោយរដ្ឋាភិបាលក្រុងអង់ការ៉ា ចំណែកឯតំបន់ភាគខាងត្បូង គ្រប់គ្រងដោយរដ្ឋាភិបាលស្ហ៊ីបសព្វថ្ងៃ ដែលជាសមាជិករបស់សហភាពអឺរ៉ុប និងដែលទទួលស្គាល់ដោយអង្គការសហប្រជាជាតិ។
កន្លងមក ដើម្បីការពារផលប្រយោជន៍របស់ខ្លួន តួកគីតែងតែចេញមុខរារាំងមិនឲ្យនាវារុករកប្រេងណា ចូលទៅកៀកដែនសមុទ្រសេដ្ឋកិច្ចផ្តាច់មុខ ក្បែរកោះស្ហ៊ីបខាងជើង ដែលខ្លួន ត្រួតត្រា នោះទេ។ តួកគីថែមទាំងប្រឆាំងដាច់ខាត និងទាមទារឲ្យរដ្ឋាភិបាលស្ហ៊ីប បញ្ឈប់ការរុករកឧស្ម័ន នៅក្នុងដែនសមុទ្រប្រទេសស្ហ៊ីបទាំងមូល ដរាបណាការចរចារវាងស្ហ៊ីបខាងជើង និងស្ហ៊ីបខាងត្បូង នៅតែបន្ត មិនទាន់មានដំណោះស្រាយអ្វី។
ពីមុនមក គេធ្លាប់គិតថាប្រសិនបើស្ហ៊ីបមានធនធានថាមពលធម្មជាតិ នោះវានឹងអាចជួយជំរុញឱ្យប្រទេសកោះស្ហ៊ីបងាយបង្រួបបង្រួមគ្នាបាន ប៉ុន្តែសព្វថ្ងៃនេះ ការរកឃើញជង្រុកឧស្ម័ន បាតសមុទ្ទ កំពុងតែក្លាយទៅជាឧបសគ្គដ៏ចំបងនៃការចរចារវាងស្ហ៊ីបខាងជើងនិងខាងត្បូង ហើយនិងបានបង្កឲ្យមានភាពតានតឹង និងការប្រឈមមុខកាន់តែខ្លាំង រហូតដល់ឥលូវនេះ រាលដាលដល់មានជម្លោះ តួកគីជាមួយសហភាពអឺរ៉ុបទៀត។
សម្រាប់ក្រសួងការបរទេសតួកគី ទណ្ឌកម្មរបស់សហភាពអឺរ៉ុបគ្មានទម្ងន់ រារាំងឲ្យតួកគីឈប់ ខួងបូមឧស្ម័ននៅសមុទ្រស្ហ៊ីបនោះទេ។ តួកគីនៅបានចោទប្រកាន់សហភាពអឺរ៉ុបថា លំអៀង កាន់ជើងតែរដ្ឋាភិបាលស្ហ៊ីប ខាងត្បូង ដោយមិនខ្វល់ពីប្រយោជន៍សុខទុក្ខរបស់ប្រជាជនស្ហ៊ីប ខាងជើង។
ដើម្បីទប់ទល់តួកគី រដ្ឋាភិបាលស្ហ៊ីបស្វែងរកជំនួយពីប្រទេសអឺរ៉ុប
រដ្ឋាភិបាលស្ហ៊ីប មានសិទ្ធិគ្រប់គ្រងតែលើតំបន់ទឹកសមុទ្រ ២ភាគ៣តែប៉ុណ្ណោះ។ ដើម្បីទប់ទល់នឹងតួកគី ដែលមានអំណាចកម្លាំងយោធា រដ្ឋាភិបាលស្ហ៊ីបមិនអាចវាយបកវិញនឹងតួកគី ដោយប្រើកម្លាំងបាយនោះទេ ប៉ុន្តែ តាមកម្លាំងនយោបាយការទូត។ ស្ហ៊ីបបានរកជំនួយ ពីសហភាពអឺរ៉ុប និងសហគមន៍អន្តរជាតិ ឲ្យជួយខ្លួន។ មួយវិញទៀត តាមគំនិតដ៏ឆ្លាតមួយទៀត រដ្ឋាភិបាលស្ហ៊ីប បានទាញប្រទេសធំៗផ្សេងទៀត ដូចជាបារាំង ឬអាមេរិកជាដើម ឲ្យចូលក្នុងសំណុំរឿងដណ្តើមឧស្ម័នជាមួយតួកគីដែរ។ ស៊្ហីបបានចេញច្បាប់អនុញ្ញាតឲ្យក្រុមហ៊ុនរបស់បារាំង និងអ៊ីតាលី ដូចជាតូតាល់ និងអេនី រួមជាមួយក្រុមហ៊ុនបូមប្រេងអាមេរិកាំងផងឲ្យទៅ ចូលធ្វើអាជីវកម្ម ខួងបូមឧស្ម័នក្នុងដែនទឹករបស់ខ្លួនដែរ។ ថ្មីៗនេះ នៅក្រោយ រដ្ឋាភិបាលបញ្ជូនកប៉ាល់ខួងទៅក្នុងសមុទ្រស្ហ៊ីប រដ្ឋាភិបាលបារាំងបានដំឡេងសំឡេងព្រមានម្តងហើយ រដ្ឋាភិបាលតួកគី កុំឲ្យបង្កជម្លោះ ភាពតានតឹងក្នុងតំបន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ