នាយករដ្ឋមន្ត្រីអង់គ្លេស៖ ការចាកចេញរបស់អង់គ្លេសពីសហភាពអឺរ៉ុបគឺជាឱកាសសេដ្ឋកិច្ចដ៏ធំមួយ
នាយករដ្ឋមន្ត្រីអង់គ្លេសថ្មីគឺលោកបូរីស ចនសុន នៅថ្ងៃសៅរ៍ទី២៧ កក្កដា បាននិយាយថា Brexit គឺជាឱកាសសេដ្ឋកិច្ចដ៏ធំមួយ សម្រាប់ប្រទេសអង់គ្លេស។ តាមរយៈការលើកឡើងនេះ គេអាចយល់បានថា សម្រាប់លោកបូរីស ចនសុន ការចាកចេញរបស់អង់គ្លេសពីសហភាពអឺរ៉ុប គឺជារឿងល្អ។ ប៉ុន្តែ គេមិនត្រូវភ្លេចទេថា គឺដោយសារតែបញ្ហា Brexit នេះហើយ ដែលធ្វើឲ្យអតីតនាយករដ្ឋមន្ត្រីអង់គ្លេសគឺលោកស្រីតេរេសា មេ ខ្ទាតចេញពីតំណែងនោះ។
ចុះផ្សាយនៅថ្ងៃ៖ កែប្រែថ្ងៃទី៖
និយាយនៅក្នុងពេលថ្លែងសុន្ទរកថាមួយនៅទីក្រុង Manchester លោកបូរីស ចនសុន សន្យាថា នឹងប្រឹងប្រែងបង្កើននូវកិច្ចចរចាលើកិច្ចព្រមព្រៀងពាណិជ្ជកម្មជាមួយសហភាពអឺរ៉ុប។ មិនតែប៉ុណ្ណោះនាយករដ្ឋមន្ត្រីអង់គ្លេសថ្មីរូបនេះ ក៏បានសន្យាបង្កើននូវច្រកផ្លូវដោះដូរពាណិជ្ជកម្ម ដើម្បីជំរុញសេដ្ឋកិច្ចរបស់អង់គ្លេស ឲ្យកាន់តែក្លៀវក្លាលើសមុន។
សម្រាប់លោកបូរីស ចនសុន ការលែងលះពីសហភាពអឺរ៉ុប គឺជាការនាំយកមកវិញនូវភាពម្ចាស់ការរបស់អង់គ្លេស។ ការចាកចេញនេះ គឺជាឱកាសសេដ្ឋកិច្ចដ៏ធំមួយ ដែលអនុញ្ញាតឲ្យអង់គ្លេសមានលទ្ធភាព ធ្វើអ្វីដែលអង់គ្លេសមិនត្រូវបានអនុញ្ញាតិឱ្យធ្វើអស់ជាច្រើនទសវត្សរ៍កន្លងមកហើយ។ នេះគឺជាការបញ្ជាក់បន្ថែមរបស់លោកបូរីស ចនសុន។
ដោយឡែក នៅពេលមានគេចោទសួរអំពីការរំពឹងទុករបស់លោក ទាក់ទងនឹងកិច្ចចរចាBrexit លោកចនសុន បានលើកឡើងថា លោកមានឆន្ទៈសហការជាមួយសហភាពអឺរ៉ុបប៉ុន្តែលោកចង់បើកការចរចាធ្វើកិច្ចព្រមព្រៀងថ្មីមួយ។
លោកថាលោកចង់ សើរើឡើងវិញនូវកិច្ចព្រមព្រៀងចាស់ដែលសម្រេចដោយលោកស្រីមេ ជាមួយសភាពអឺរ៉ុប ពាក់ព័ន្ធនឹងបញ្ហាព្រំដែនរបស់អៀរឡង់ខាងជើង និងសាធារណរដ្ឋអៀរឡង់ដែលជាប្រទេសសមាជិកសហភាពអឺរ៉ុបមួយដែរ។
តែទោះជាបែបនេះក្តី សភាពអឺរ៉ុប នៅគ្រាកន្លងមក បានឆ្លើយប្រាប់ទៅកាន់លោកនាយករដ្ឋមន្ត្រីអង់គ្លេសថ្មីហើយថា កិច្ចចរចាសាជាថ្មីស្តីអំពីកិច្ចព្រមព្រៀង Brexit នឹងមិនអាចកើតមាននោះទេ។
គួររំឭកជូនថា នាយករដ្ឋមន្ត្រីថ្មីថ្មោងអង់គ្លេស ដែលទើបឡើងកាន់តំណែងនៅថ្ងៃពុធ ទី២៤ កក្កដានេះ គឺលោកបូរីស ចនសុន ធ្លាប់បានអះអាងដែរថា លោកនឹងដឹកនាំរដ្ឋាភិបាលមួយ ដែលពុះពារ យើងនឹងព្យាយាមដោះស្រាយបញ្ហាដែលមានចំពោះមុខ។ មិនតែប៉ុណ្ណោះ លោកចនសុន ទើបតែបានសន្យានាពេលថ្មីៗនេះដែរថា លោកនឹងដឹកនាំអង់គ្លេស ឲ្យចាកចេញពីសហភាពអឺរ៉ុបឲ្យខានតែបាន ទោះបីគ្មានឬគ្មានកិច្ចព្រមព្រៀងក៏ដោយ ឲ្យបានត្រឹមថ្ងៃផុតកំណត់នាថ្ងៃទី ៣១ តុលា ខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ