ច្បាប់ពន្ធGAFA៖ លោកដូណាល់ត្រាំ បរិហារភាពឆ្កួតលីលារបស់ប្រធានាធិបតីបារាំង
ប្រធានាធិបតីអាមេរិក នៅថ្ងៃសុក្រម្សិលមិញ បានគំរាមដំឡើងពន្ធបន្ថែម លើស្រាបារាំង ដើម្បីសងសឹកនឹងបារាំង ដែលទើបអនុម័តច្បាប់ថ្មី សំដៅយកពន្ធលើប្រាក់ចំណូលរបស់ក្រុមហ៊ុនបច្ចេកវិទ្យាអាមេរិកាំង។ វិមានអេលីហ្សេ វិញ បានអះអាងថា នៅក្នុងកិច្ចសន្ទនាតាមទូរស័ព្ទជាមួយលោកដូណាល់ ត្រាំ នៅថ្ងៃសុក្រ ប្រធានាធិបតី បារាំង លោកអេម៉ានុយអែល ម៉ាក្រុងបានលើកឡើងពីសារៈសំខាន់នៃការបង្កើតច្បាប់អន្តរជាតិ ដើម្បីយកពន្ធពីក្រុមហ៊ុនឌីជីថល។
ចុះផ្សាយនៅថ្ងៃ៖
ស្តាប់ - ០២:៥១
លោកប្រធានាធិបតីអាមេរិក ដូណាល់ ត្រាំ បានដំឡើងសំឡេងខ្លាំងៗ រិះគន់បារាំងដែលទើបបង្កើតច្បាប់ GAFA យកពន្ធលើប្រាក់ចំណូលរបស់ក្រុមឌីជីថលអាមេរិកាំង។ នៅក្នុងសារទ្វីតធ័រ កាលពីថ្ងៃសុក្រ លោកដូណាល់ ត្រាំបានសរសេរបរិហារ ភាពឆ្កួតលីលារបស់ប្រធានាធិបតី បារាំង ហើយនិងគំរាមសងសឹកវិញ ទៅលើស្រាបារាំង ដែលនាំចូលទៅអាមេរិក។
សេតវិមានបានប្រកាសថា នៅថ្ងៃសុក្រ លោកដូណាល់ ត្រាំ បាននិយាយពិភាក្សា តាមទូរស័ព្ទ ជាមួយ ប្រធានាធិបតី បារាំង លោកម៉ាក្រុង ពីច្បាប់បារាំង យកពន្ធលើប្រាក់ចំណូលរបស់ក្រុមហ៊ុនបច្ចេកវិទ្យា។ វិមានប្រធានាធិបតី បារាំង នៅថ្ងៃសៅរ៍នេះ បានបញ្ជាក់បន្ថែមថា នៅក្នុងកិច្ចសន្ទនាជាមួយ លោកដូណាល់ ត្រាំ លោកអេម៉ានុយអែល ម៉ាក្រុង បានអះអាងថា ការបង្កើតច្បាប់ យកពន្ធលើប្រាក់ចំណូលរបស់ក្រុមហ៊ុនឌីជីថល ជារឿងផលប្រយោជន៍រួម ប៉ុន្តែ មិនមែនជារឿងរបស់បារាំងតែម្នាក់នោះទេ។ បារាំង ដែលរៀបចំជំនួបកំពូលក្រុមប្រទេសមហាអំណាចឧស្សាហកម្ម G 7នៅខែសីហាខាងមុខ ចង់ឲ្យគេបង្កើតកិច្ចព្រមព្រៀងថ្នាក់អន្តរជាតិមួយ ដើម្បី យកពន្ធលើក្រុមហ៊ុនបច្ចេកវិទ្យា។
លោកដូណាល់ ត្រាំ គំរាមចង់សងសឹក ដំឡើងពន្ធ លើស្រាបារាំង ដោយសារលោកមិនសប្បាយចិត្តនឹងព្រឹទ្ធសភាបារាំង ដែលកាលពី ២សប្តាហ៍មុន បានបោះឆ្នោតអនុម័តច្បាប់ថ្មីមួយ ដើម្បីចាប់តម្រូវឲ្យក្រុមហ៊ុនបច្ចេកវិទ្យាអ៊ីនធ័រនិត ទាំងអស់ ដែលរកចំណូលបាននៅលើទឹកដីបារាំង បង់ពន្ធជូនរដ្ឋបារាំង។
បារាំង គឺជាប្រទេសទីមួយ នៅអឺរ៉ុប ដែលមានច្បាប់របៀបនេះ។ តាមច្បាប់ថ្មី រដ្ឋបារាំងមានសិទ្ធិ ទារពន្ធ ៣% នៃប្រាក់ចំណូលដែលក្រុមហ៊ុនឌីជីថល រកបាន មកពីការផ្សាយពាណិជ្ជកម្ម ពីការលក់ទិន្នន័យលើអ៊ីនធ័រនែត ដើម្បីផ្សាយពាណិជ្ជកម្ម និងការតភ្ជាប់ទិន្នន័យ របស់អ្នកប្រើប្រាស់ នៅតាម គេហទំព័រអ៊ីនធ័រនែតជាដើម។ គេវាយតម្លៃ ច្បាប់ថ្មីនេះ នឹងអនុញ្ញាតឲ្យរដ្ឋបារាំង ប្រមូលពន្ធ បាន ៤០០លានអឺរ៉ូ ក្នុងឆ្នាំនេះ និងអាចឡើងដល់៦៥០លានអឺរ៉ូ នៅឆ្នាំ២០២០។ ក្រុមហ៊ុនបរទេស យ៉ាងហោច ៣០ នឹងអាចជាប់សំណាញ់របស់ច្បាប់បារាំង ក្នុងនោះមានក្រុមហ៊ុនអាមេរិកាំង ធំៗ ដូចជា Google Apple Amazon Facebook ជាដើម។
រដ្ឋបាលលោកដូណាល់ត្រាំ ដែលធ្លាប់បង្ហាញការមិនពេញចិត្តនឹងច្បាប់បារាំង ដែលមានលក្ខណៈ រើសអើង និងបានព្រមានធ្វើការស៊ើបអង្កេត មុននឹងចាត់វិធានការសងសឹកណាមួយ។ ឆ្លើយសំណួររបស់អ្នកកាសែត នៅសេតវិមាន កាលពីថ្ងៃសុក្រ លោកដូណាល់ ត្រាំ ដែលមិនបរិភោគគ្រឿងស្រវឹង អះអាងថា ស្រាអាមេរិកាំងឆ្ងាញ់ជាងស្រាបារាំង និងថា លោកចូលចិត្តស្រាអាមេរិកាំង ដោយសាររូបរាងរបស់វា។ ពាក្យគំរាមដំឡើងពន្ធលើស្រាបារាំង ធ្លាប់ត្រូវបានលោកដូណាល់ ត្រាំ ពន្លយឲ្យដឹងម្តងហើយ កាលពីខែមិថុនាកន្លងទៅ។ ប្រធានាធិបតីអាមេរិកាំង បានលើកឡើងពីភាពអយុត្តិធម៌ ក្នុងការប្រកួតប្រជែង របស់អ្នកផលិតស្រាអាមេរិកាំង ដែលបានត្អូញត្អែពីអត្រាពន្ធតិច លើស្រាបារាំងនាំចូលទៅ អាមេរិក ក្នុងពេលបារាំង យកពន្ធច្រើនលើស្រាបរទេសដែលនាំចូលទៅបារាំង។
ការដំឡើងពន្ធ បន្ថែម លើស្រាបារាំង នឹងអាចប៉ះពាល់ដល់ឧស្សាហកម្មផលិតស្រាបារាំង ដោយសារថា អាមេរិក ជាទីផ្សារដ៏ធំ ស្រូបយក១ភាគបី នៃស្រាបារាំង ដែលនាំចេញទៅបរទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ