មនុស្សជាតិជំពាក់បំណុលផែនដីកាន់តែច្រើនថ្ងៃឡើងៗ
ថ្ងៃទី២៩កក្កដានេះ ជាថ្ងៃដែលមនុស្សជាតិរស់នៅដោយប្រើប្រាស់ធនធានធម្មជាតិលើសពីអ្វីដែលភពផែនដីមានសមត្ថភាពផលិតបានក្នុងមួយឆ្នាំ ២០១៩។ ចាប់ពីថ្ងៃនេះទៅ រហូតដល់ថ្ងៃទី៣១ធ្នូ មនុស្សជាតិរស់ក្នុងបំណុលរបស់ភពផែនដី។ នេះបើតាមរបាយការណ៍របស់អង្គការក្រៅរដ្ឋាភិបាលអាមេរិក Global Footprint Network។ រយៈពេលដែលមនុស្សជំពាក់បំណុលផែនដី កាន់តែវែងឡើងៗ ជាលំដាប់ ឬ ចំនួនថ្ងៃដែលមនុស្សប្រើប្រាស់ធនធានធម្មជាតិផលិតដោយផែនដីក្នុងមួយឆ្នាំៗ មានកាន់តែខ្លីទៅៗ ជាលំដាប់ គិតចាប់តាំងពីឆ្នាំ១៩៧០មក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៨
មនុស្សជាតិ ជំពាក់ផែនដី មានន័យថា មនុស្សលោកបានប្រើអស់រលីងនូវអ្វីដែលធម្មជាតិមានសមត្ថភាពផលិត សម្រាប់និងក្នុងរយៈពេលមួយឆ្នាំ (ដីដាំដុះ ព្រៃ មច្ឆា ...)។ មនុស្សជាតិនេសាទត្រីកាន់តែច្រើន កាប់ព្រៃឈើកាន់តែខ្លាំង ធ្វើកសិកម្មលើដីកាន់តែធំ និងស្រូបទឹកលើសពីអ្វីដែលផែនដីអាចមានសមត្ថភាពផលិតក្នុងមួយឆ្នាំៗ។ មិនតែប៉ុណ្ណោះ មនុស្សជាតិបានបញ្ចេញឧស្ម័នកាបូនិក ក្នុងបរិមាណដ៏ច្រើន ដែលព្រៃ និងទឹកសមុទ្ទស្រូបលែងអស់ និងសល់ច្រើននៅក្នុងបរិយាកាស ទើបធ្វើឱ្យផែនដីឡើងកម្តៅកាន់តែខ្លាំងឡើងៗ។
វិសមភាពចំពោះផែនដី
ដោយគ្មានការភ្ញាក់ផ្អើល គឺក្រុមប្រទេសអភិវឌ្ឍន៍ និងជឿនលឿន ជាអ្នកស្រូបប្រមូលធនធានធម្មជាតិរបស់ភពផែនដីច្រើនជាងគេ។ កាតាហូបអស់ផលដែលផែនដីផលិតបាន តាំងពីថ្ងៃទី១១កុម្ភៈ អាមេរិក តាំងពី ថ្ងៃទី ១៥មិនា -បារាំង នៅថ្ងៃទី ១៤ឧសភា -ចិន នៅថ្ងៃ១៦មិថុនា ប្រេស៊ីលនៅថ្ងៃស្អែក (៣១កក្កដា) តែបើរស់តាមរបៀបភូមា គឺអាចដល់ថ្ងៃទី ២៥ធ្នូ និង២៦ធ្នូ សម្រាប់កៀស៊ីគីស្ថាន។ តែបើគិតជាមធ្យមភាគពិភពលោក មនុស្សជាតិជាប់បំណុលផែនដីចាប់ពីថ្ងៃនេះតទៅហើយ។
មានន័យថា ក្នុងមួយឆ្នាំមាន១២ខែ តែមនុស្សលោកបានប្រើប្រាស់ធនធានដែលផែនដីផលិតបានក្នុងរយៈពេលតែ៧ខែ។ បើមនុស្សបន្តរក្សារបៀបរបបរស់នៅបែបនេះដដែល ទាល់តែមានផែនដី (១,៧៥) ជិតពីរទើបអាចឆ្លើយតបទៅនឹងសេចក្តីត្រូវការរបស់មនុស្សលោកបាន។ ហើយបើមនុស្សជាតិប្រកាន់យករបៀបរបបរស់នៅដូចជនជាតិអាមេរិកឬអូស្ត្រាលី ដែលទទួលទានសាច់ច្រើន ធ្វើដំណើរតាមយន្តហោះ តាមរថយន្តច្រើន នោះគេត្រូវការមានភពផែនដីដល់ទៅ៥ ទើបគ្រប់គ្រាន់។ បើរស់តាមបែបបារាំង គេត្រូវការមានផែនដីជិតបីទៀតមកបន្ថែម ហើយបើរស់តាមបែបចិន គេមានភពផែនដីជាងពីរ និងប្រសើរបំផុតគឺខ្សែជីវិតឥណ្ឌា ដែលហូបអស់ធនធានធម្មជាតិពិភពលោកតែ៦០%ប៉ុណ្ណោះ។
អ្វីជាកាត់សម្គាល់ខ្លាំង បើតាមការគណនារបស់អង្គការក្រៅរដ្ឋាភិបាលអាមេរិក Global Footprint Network មនុស្សជាតិទាំងមូលរស់ជំពាក់បំណុលផែនដីកាន់តែវែងឡើងៗ និងធ្លាក់មកដល់ខែកក្កដា ជាលើកទីមួយ។ នៅឆ្នាំ ១៩៧០ មនុស្សជាតិហូបលើសសមត្ថភាពតែពីរថ្ងៃប៉ុណ្ណោះ។ នៅឆ្នាំ១៩៨០ មនុស្សជាតិជំពាក់បំណុលផែនដីតាំងពីថ្ងៃទី ៤វិច្ឆិកា តាំងពី១១តុលានៅឆ្នាំ១៩៩០- ២៣កញ្ញានៅឆ្នាំ២០០០សីហា- ៧សីហានៅឆ្នាំ២០១០ និង ១សីហា កាលពីឆ្នាំទៅ ២០១៨។
តើមានដំណោះស្រាយទេ ?
ចាប់រស់នៅក្នុងបំណុលចាប់ពីថ្ងៃទី ២៩កក្កដា ទៅ មានតម្លៃជានិម្មិត្តរូបមែន តែផលវិបាក មានសភាពធ្ងន់ធ្ងរនិងជាក់ច្បាស់ណាស់ទៅលើប្រព័ន្ធអេកូសាស្ត្រ ការប្រែប្រួលអាកាសធាតុ និងរលត់ផុតពូជនៃពពួកសត្វនិងរុក្ខជាតិ។ របាយការណ៍របស់ក្រុមអ្នកជំនាញអង្គការសហប្រជាជាតិបានចេញអនុសាសន៍ច្បាស់លាស់ណាស់ ៖ កាត់បន្ថយការបញ្ចេញឧស្ម័នផ្ទះកញ្ចក់ ដើរចេញពីថាមពលធ្យូងថ្ម ប្តូរគំរូផលិតផលកសិឧស្សាហកម្ម ...
បើតាម Global Footprint Network កាត់បន្ថយឧស្ម័នផ្ទះកញ្ចក់៥០% នឹងបន្ថយបំណុលផែនដីបាន៩៣ថ្ងៃ។ កាត់បន្ថយ ការទទួលទានសាច់ពាក់កណ្តាល សងបំណុលផែនដីបាន១៥ថ្ងៃ។ នេះបើតាមWWF៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ