អាមេរិកគៀងគរសម្ព័ន្ធមិត្តឲ្យចូលរួមក្នុងបេសកកម្ម ការពារសន្តិសុខ នៅច្រកសមុទ្រ Ormuz
សហរដ្ឋអាមេរិក នៅថ្ងៃអង្គារទី៣០កក្កដា បានស្នើសុំជាផ្លូវការ ឲ្យរដ្ឋាភិបាលអាល្លឺម៉ង់ ចូលរួមក្នុងបេសកកម្មការពារសន្តិសុខ នៅច្រកសមុទ្រ Ormuz។ តាមអ្នកនាំពាក្យរបស់ស្ថានទូតអាមេរិកប្រចាំទីក្រុងប៊ែរឡាំង អាមេរិកចង់ឲ្យអាល្លឺម៉ង់ចូលរួមជាមួយបារាំង និងអង់គ្លេស ក្នុងការធានាសន្តិសុខដល់ចរាចរណ៍ដឹកប្រេង នៅច្រកសមុទ្រOrmuz កំពុងកើតមានវិបត្តិដ៏តានតឹងរវាងអាមេរិក និងអ៊ីរ៉ង់។
ចុះផ្សាយនៅថ្ងៃ៖
អ្នកនាំពាក្យរបស់ស្ថានទូតអាមេរិកប្រចាំក្រុងប៊ែរឡាំង បានអះអាងថា អាមេរិកបានស្នើសុំជាផ្លូវការ នៅថ្ងៃអង្គារ ម្សិលមិញ ឲ្យអាល្លឺម៉ង់ ចូលរួមជាមួយបារាំង និងអង់គ្លេស ដើម្បីធានាការពារសន្តិសុខ នៅច្រកសមុទ្រ Ormuz ជាទីដែលអ៊ីរ៉ង់បានចាប់រឹបអូសកប៉ាល់ដឹកប្រេងអង់គ្លេស ២គ្រឿង កាលពីពាក់កណ្តាលខែកក្កដាកន្លងទៅ។
ការស្នើសុំជាផ្លូវការរបស់អាមេរិក ធ្វើឡើងនៅក្រោយ អាល្លឺម៉ង់ តាមរយៈរដ្ឋមន្រ្តីការបរទេស បានបង្ហាញអរិភាព មិនចង់ចូលរួម នៅក្នុងសម្ព័ន្ធយោធាការពារ ច្រកសមុទ្រ Ormuz ដែលដឹកនាំដោយអាមេរិក។ នៅក្នុងបទសម្ភាសន៍ជាមួយកាសែតក្នុងស្រុកអាល្លឺម៉ង់ កាលពីថ្ងៃសៅរ៍ រដ្ឋមន្រ្តីការបរទេសអាល្លឺម៉ង់ បានបញ្ជាក់ថា អាល្លឺម៉ង់នឹងមិនចូលរួម ក្នុងយុទ្ធសាស្រ្តរបស់អាមេរិកដែលចង់ដាក់សម្ពាធជាអតិបរមានោះទេ។ អាល្លឺម៉ង់អាចចូលរួម តែនៅក្នុងក្របខ័ណ្ឌអឺរ៉ុបតែប៉ុណ្ណោះ។ ហើយអាល្លឺម៉ង់ត្រូវចូលរួម នៅក្នុងរូបភាពបែបណានោះ គឺអាស្រ័យទៅលើបេសកកម្ម ដែលគូសវាសដោយសហភាពអឺរ៉ុប។
សូមអាន៖ ដើមបូព៌ា៖ អង់គ្លេសបញ្ជូននាវាចម្បាំងទី២ ទៅការពារចរាចរណ៍នៅឈូងសមុទ្រពែក្ស
អ្នកនាំពាក្យរបស់ស្ថានទូតអាមេរិក វិញលើកឡើងថា សមាជិករដ្ឋាភិបាលអាល្លឺម៉ង់ធ្លាប់បានបញ្ជាក់ច្បាស់ថា គេត្រូវធានាចរាចរណ៍ ផ្លូវទឹក នៅច្រកសមុទ្រ។ ចំណោទសួរនៅត្រង់ថា តើអ្នកណាជាអ្នកចេញមុខធានាការពារសន្តិសុខនោះ?
ទៅតាមសំណើរបស់អតីតរដ្ឋមន្រ្តីការបរទេសអង់គ្លេស ដែលមានកប៉ាល់២គ្រឿងរបស់ខ្លួន ត្រូវអ៊ីរ៉ង់ចាប់កាក់ទុក នៅច្រកសមុទ្រ Ormuz បារាំងអ៊ីតាលី និងដាណឺម៉ាកបានយល់ព្រមព្រៀងជាគោលការណ៍បើកភ្លើងខៀវ ឲ្យមានបេសសកម្មកងទ័ពជើងទឹកអឺរ៉ុបដើម្បីការពារសន្តិសុខនៅច្រកសមុទ្រOrmuz។ រដ្ឋមន្រ្តីការបរទេសបារាំងវិញ បាននិយាយថា បារាំងអង់គ្លេស និងអាល្លឺម៉ង់នឹងចូលរួម ក្នុងបេសកកម្មតាម និងឃ្លាំមើល សន្តិសុខ ជើងទឹក នៅក្នុងតំបន់ឈូងសមុទ្រ។ អាមេរិកដែលបានប្រកូកប្រកាស ឲ្យសម្ព័ន្ធមិត្ត ដូចជាជប៉ុន កូរ៉េខាងត្បូង ចូលរួមក្នុងប្រតិបត្តិការ ធានាសន្តិសុខនៅOrmuz ដែរនោះបានចាត់ទុក បេសកកម្មរបស់អឺរ៉ុបថា ជាការចូលរួមបំពេញបន្ថែមឲ្យការផ្តួចផ្តើមរបស់អាមេរិក។
រដ្ឋាភិបាលអ៊ីរ៉ង់វិញបានបង្ហាញសាជាថ្មី ជំហរប្រឆាំងដាច់ខាតនឹងវត្តមានកប៉ាល់យោធាបរទេស នៅក្នុងឈូងសមុទ្រ ក្នុងហេតុផលថា មានតែប្រទេសនៅតំបន់ឈូងសមុទ្រពែរ្សដែលមានសិទ្ធិការពារដែនសមុទ្រOrmuz។ សម្រាប់ប្រធានាធិបតី អ៊ីរ៉ង់ បេសកកម្មកងទ័ពបរទេសណាមួយ នឹងមិនជួយការពារធានាសន្តិសុខនោះទេ ប៉ុន្តែ ផ្ទុយទៅវិញ ជាប្រភពនៃភាពតានតឹង និងធ្វើឲ្យវិបត្តិនៅច្រកសមុទ្រOrmuz កាន់តែធ្លាក់ធ្ងន់ធ្ងរជាងនេះទៅទៀត។
ជាច្រកចេញចូលពីឈូងសមុទ្រពែរ្សទៅ ច្រកសមុទ្រ Oman ច្រកសមុទ្រ Ormuz ដែលចែកគ្នា រវាងប្រទេសអ៊ីរ៉ង់ និងអេមីរ៉ាតអារ៉ាប់រួម ជាច្រកចេញចូលនៃការដឹកជញ្ជូនប្រេងតាមផ្លូវសមុទ្រ ប្រមាណ៣០ភាគរយ នៅក្នុងពិភពលោក។ ច្រកសមុទ្រ Ormuz បានធ្លាក់ក្នុងវិបត្តិ តានតឹងអាមេរិក និងអ៊ីរ៉ង់ នៅក្រោយ ពេលអ៊ីរ៉ង់ បាញ់ទម្លាក់យន្តហោះដ្រូនរបស់អាមេរិក។ អាមេរិកដែលបានចោទប្រកាន់អ៊ីរ៉ង់ ថាជាអ្នកនៅពីក្រោយ ការវាយប្រហារទៅលើកប៉ាល់ដឹកប្រេង ៦គ្រឿង កាលពីខែមិថុនា។ ការចោទប្រកាន់ដែលអ៊ីរ៉ង់ បដិសេធ មិនទទួលយក រហូតមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ