អាកាសធាតុ៖កក្កដា ឆ្នាំ ២០១៩ ជាខែដែលមានសីតុណ្ហភាពក្តៅខ្លាំងមិនធ្លាប់មាន
នៅថ្ងៃចន្ទ ទី៥ សីហា អង្គការអឺរ៉ុបមួយឈ្មោះ Copernicus Climate Change Service បានឲ្យដឹងថា កក្កដា ឆ្នាំ ២០១៩ ជាខែដែលមានសីតុណ្ហភាពក្តៅខ្លាំងមិនធ្លាប់មាននៅក្នុងលោក។ លោកហ្សង់ ណូអែល តេប៉ូ ប្រធានកម្មវិធីឃ្លាំមើលបម្រែបម្រួលអាកាសធាតុបានយល់ឃើញថា នេះជាសញ្ញាមួយគួរឲ្យបារម្ភដែលបញ្ជាក់ពីការឡើងកម្តៅនៅក្នុងភពផែនដីដែលបង្កឡើងដោយសកម្មភាពរបស់មនុស្សលោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
« ខែកក្កដា ឆ្នាំ ២០១៩ ជាខែដែលមានលក្ខណៈពិសេសខុសប្លែកពីធម្មតាដោយមានសីតុណ្ហភាពស្មើ ឬលើសតិចតួច បើធៀបនឹងខែកក្កដា ឆ្នាំ ២០១៦។ នេះជាចំណុចកត់សម្គាល់ទី១ រីឯចំណុចកត់សម្គាល់ទី២ ដែលមានសារៈសំខាន់ក្នុងផ្នែកវិទ្យាសាស្រ្ត និងជាក្តីបារម្ភសម្រាប់មនុស្សលោកនោះ គឺគេត្រូវសម្លឹងមើលសម្រាប់រយៈពេលវែង។
ការលើកឡើងក្នុងខែមួយពិតជាមិនគ្រប់គ្រាន់ទេសម្រាប់ការវាយតម្លៃជាលក្ខណៈទូទៅស្តីពីការបម្រែបម្រួលអាកាសធាតុលើភពផែនដី។ ចំណាប់អារម្មណ៍ក្នុងខែកក្កដា ឆ្នាំ ២០១៩ តែមួយបានផ្តោតលើឧតុនិយមច្រើនជាងអាកាសធាតុ។ តែបើគេសម្លឹងមើល ៤ឆ្នាំចុងក្រោយពីឆ្នាំ ២០១៥ ដល់ឆ្នាំ ២០១៨ គឺជារយៈពេលដែលមានសីតុណ្ហភាពក្តៅខ្លាំងមិនធ្លាប់មាន។
បើគេត្រឡប់ក្រោយឲ្យឆ្ងាយជាងនេះ ពោលក្នុងសម័យមុនឧស្សាហកម្ម សីតុណ្ហភាពលើភពផែនដីបច្ចុប្បន្នបានឡើង ១អង្សារ។ ក្រុមអ្នកជំនាញអន្តររដ្ឋាភិបាលស្តីពីការប្រែប្រួលអាកាសធាតុបានទាញសញ្ញាអាសន្នថា បើសីតុណ្ហភាពកើនលើសពី ១,៥អង្សារ ភពផែនដីនឹងរងផលវិបាកធ្ងន់ធ្ងរដែលគេមិនអាចវាស់វែងបាន។ បន្ទាប់មក សហគមន៍ក្រុមអ្នកជំនាញក៏បានយល់ឃើញដូចគ្នាថា ឧស្ម័នផ្ទះកញ្ចក់ជាដើមចមនៃការឡើងកម្តៅក្នុងភពផែនដី។ នេះជាហេតុផលច្បាស់លាស់មិនអាចប្រកែកបានឡើយ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ