អង្គការសុខភាពពិភពលោក៖គិតតាំងពីខែមករា ជំងឺកញ្ជ្រឹលបានកើនមួយជាបីនៅក្នុងលោក
នៅថ្ងៃអង្គារ ទី១៣ សីហា អង្គការសុខភាពពិភពលោកហៅកាត់ជាភាសាអង់គ្លេស WHO បានផ្សព្វផ្សាយរបាយការណ៍មួយស្តីពីស្ថានភាពជំងឺកញ្ជ្រឹលក្នុងលោក។ របាយការណ៍បានឲ្យដឹងថា ពីថ្ងៃទី១ មករាដល់ថ្ងៃទី៣១ កក្កដា ឆ្នាំ ២០១៩ នេះ មានកើតជំងឺកញ្រឹ្ជលចំនួន ៣៦៤ ៨០៨ករណី ពោលច្រើនជាងជិត ៣ដង បើធៀបនឹងឆ្នាំ ២០១៨ ក្នុងរយៈពេលដូចគ្នាដែលមានតែ ១២៩ ២៣៩ករណី។ តាមអង្គការ WHO នេះជាតួលេខមួយដ៏ខ្ពស់ខ្លាំងមិនធ្លាប់មានគិតតាំងពីឆ្នាំ ២០០៦ ហើយអាហ្រ្វិកជាទ្វីបដែលមានកើតជំងឺកញ្ជ្រឹលច្រើនជាងគេ។
ចុះផ្សាយនៅថ្ងៃ៖
ស្តាប់ - ០២:២៥
តាមអង្គការសុខភាពពិភពលោក សាធារណរដ្ឋប្រជាធិបតេយ្យកុងហ្គោ ម៉ាដាហ្កាស្កា និងអ៊ុយក្រែនជាប្រទេសដែលមានកើតជំងឺកញ្ជ្រឹលច្រើនជាងគេ។ បន្ទាប់មក នៅមានប្រទេសអង់ហ្គោឡា កាមេរូន ឆាដ កាហ្សាក់ស្ថាន នីហ្សេរីយ៉ា ស៊ូដង់ខាងត្បូង ស៊ូដង់ ហ្វីលីពីន និងប្រទេសថៃ។ តែ WHO បានសម្កាល់ឃើញថាក្នុងរយៈពេលប៉ុន្មានខែកន្លងទៅ និងដោយមានយុទ្ធនាការចាក់វ៉ាក់សាំងប្រឆាំងជំងឺកញ្ជ្រឹលជាបន្ទាន់ ចំនួនករណីជំងឺកញ្ជ្រឹលនៅម៉ាដាហ្កាស្កាបានធ្លាក់ចុះគួរឲ្យចាប់អារម្មណ៍។ ចំណែកសហរដ្ឋអាមេរិកបានស្គាល់កំណើនករណីជំងឺកញ្រ្ជឹលមិនធ្លាប់មាន គិតតាំងពី ២៥ឆ្នាំ។
នៅក្នុងតំបន់អឺរ៉ុបសម្រាប់ ៦ខែក្នុងឆ្នាំ ២០១៩ នេះ ចំនួនករណីជំងឺកញ្ជ្រឹលមានជិត ៩០ ០០០ករណី ពោលមានច្រើនជាងពេញមួយឆ្នាំ ២០១៨ ដែលមានចំនួន ៨៤ ៤៦២ករណី។ បើនិយាយជាលក្ខណៈទូទៅនៅតាមតំបន់វិញ តំបន់អាហ្រ្វិកបានស្គាល់កំណើនករណីជំងឺកញ្ជ្រឹលគុណ ១ ជា ១០ តំបន់អាស៊ីប៉ាស៊ីហ្វិកខាងលិចមានកំណើន ២៣០% និង ៥០% នៅក្នុងតំបន់មេឌីទែរ៉ាណេខាងកើត។ ដោយឡែកនៅក្នុងតំបន់អាស៊ីអាគ្នេយ៍ និងអាមេរិក អង្គការសុខភាពពិភពលោកបានកត់សម្កាល់ឃើញការធ្លាក់ចុះករណីជំងឺកញ្ជ្រឹលចំនួន ១៥%។
តែ WHO បានយល់ឃើញថា ចំនួនករណីជំងឺកញ្ជ្រឹលពិតប្រាកដនៅក្នុងលោកអាចនឹងមានច្រើនជាងតួលេខផ្លូវការ ព្រោះក្នុងចំនួន ១០ករណី មានមិនដល់ ១ករណីផងដែលត្រូវបានគេប្រកាសឲ្យដឹងជាផ្លូវការ។ គួរជម្រាបថា កញ្ជ្រិលជាជំងឺមួយក្នុងចំណោមជំងឺឆ្លងខ្លាំងក្នុងលោក ហើយការស្លាប់ភាគច្រើនដោយកញ្រ្ជឹលក៏ដោយសារតែការព្យាបាលជួបផលវិបាកផ្សេងៗទៀត។ តាមអង្គការសុខភាពពិភពលោក ជំងឺឆ្លងរាត្បាតមួយនេះច្រើនផ្ទុះខ្លាំងនៅក្នុងបណ្តាប្រទេសដែលមិនសូវមានការចាក់ថ្នាំវ៉ាក់សាំង។ WHO បានយល់ឃើញថា មនុស្សគ្រប់រូបមានអាយុពីជាង ៦ខែឡើងទៅត្រូវចាក់ថ្នាំវ៉ាក់សាំងប្រឆាំងកញ្រ្ជឹលមុននឹងធ្វើដំណើរទៅកាន់តំបន់ដែលមានវត្តមានជំងឺកញ្ជ្រឹល។ អង្គការសុខភាពពិភពលោកបានផ្តល់អនុសាសន៍ឲ្យអ្នកដំណើរគ្រប់រូបត្រូវចាក់ថ្នាំវ៉ាក់សាំងប្រឆាំងកញ្រ្ជឹលឲ្យបានយ៉ាងតិច ១៥ថ្ងៃ មុននឹងធ្វើដំណើរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ