គ្រោះធម្មជាតិ បំផ្លាញ គិតជាទឹកប្រាក់ អស់ជាងបួនម៉ឺនលានដុល្លារ នៅឆមាសទីមួយឆ្នាំ២០១៩
គ្រោះនិងមហន្តរាយធម្មជាតិ ដែលជាស្នាដៃរបស់មនុស្ស បានបង្កឱ្យមានការបាត់បង់ជីវិត និងបាត់ខ្លួនមនុស្សជាង ៥ពាន់នាក់ និងធ្វើឱ្យមានការខាតបង់សេដ្ឋកិច្ចអស់ ៤៤០០០លានដុល្លារអាមេរិក ក្នុងរយៈពេលតែ៦ខែដំបូង នៃឆ្នាំ២០១៩ គិតក្នុងកំរិតពិភពលោកទាំងមូល។ នេះបើតាមការសិក្សាបឋមរបស់ក្រុមហ៊ុនធានារ៉ាប់រងស្វីស Swiss Re។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
ការខាតបង់ដែលធ្ងន់ធ្ងរនឹងសំខាន់ជាងគេ គឺបណ្តាលមកពីខ្យល់ព្យុះសង្ឃរា និងទឹកជំនន់ ដែលមានកើតឡើងនៅគ្រប់ជ្រុងនៃភពផែនដី។ នេះបើតាមសេចក្តីពន្យល់បំភ្លឺក្នុងរបាយការណ៍របស់ស៊្វីស ដែលភ្នាក់ងារសារព័ត៌មានបារាំងAFP ទទួលបាន។ ខ្យល់ព្យុះIdai ដែលបានបោកបក់យ៉ាងកំណាច ពាំនាំទឹកភ្លៀងបង្កជាទឹកជំនន់យ៉ាងធ្ងន់ធ្ងរ នៅ ប្រទេសម៉ូសំប៊ិច ម៉ាឡាវី ស៊ីមបាវ៉េ និងម៉ាដាហ្កាស្កា ជាគ្រោះធម្មជាតិដ៏សាហាវជាងគេ ដោយបានសម្លាប់មនុស្សអស់ជាងមួយពាន់នាក់។ នេះបើតាមរបាយការណ៍Swiss Re ដដែល។
ជាសរុប ក្នុងរយៈពេល៦ខែដំបូងនៃឆ្នាំ២០១៩ មានមនុស្សជាង៥ពាន់នាក់ បានបង់ជីវិត ឬបាត់ខ្លួន នៅក្នុងគ្រោះមហន្តរាយធម្មជាតិផ្សេងៗ ទល់នឹង៣៩០០នាក់ កាលពីឆ្នាំ២០១៨គិតក្នុងរយៈពេល៦ខែដំបូងដូចគ្នា។ បើតាមតួលេខរបស់ភ្នាក់ងារSwiss Re ដែលកត់ត្រាការខូចខាតដោយគ្រោះមហន្តរាយធម្មជាតិតាំងពី៥០ឆ្នាំមក ឆ្នាំ២០១៨ ជាឆ្នាំដែលមានការបាត់បង់ទាបជាងបំផុតមួយ។
និយាយអំពីការខាតបង់សេដ្ឋកិច្ចវិញ បើតាមរបាយការណ៍លម្អិតរបស់Swiss Re គ្រោះធម្មជាតិនៅដើមឆ្នាំ២០១៩ បានធ្វើឱ្យមានការខាតបង់ជាថវិកា កំរិត៤០ពាន់លានដុល្លារ និង៤ពាន់លានដុល្លារ ជាការខាតបង់បង្កឡើងដោយមនុស្ស ដូចជាធ្វើឱ្យមានគ្រោះថ្នាក់ឧស្សាហកម្មជាដើម។ល។ ប៉ុន្តែ ការខាតបង់ជាសាច់ប្រាក់អស់៤៤០០០លានដុល្លារសម្រាប់រយៈពេលមួយឆមាសដំបូង នៅមានកំរិតទាបជាងបរិមាណនៃខាតបង់ជាមធ្យមក្នុងរយៈពេល១០ឆ្នាំចុងក្រោយនេះទេ។ កាលពីឆ្នាំ២០១៨ ការខាតបង់សេដ្ឋកិច្ចបង្កដោយគ្រោះមហន្តរាយធម្មជាតិ បានឡើងដល់៥១០០០លាន។
ហេតុអ្វីបានជាដូច្នោះ ? បើ Swiss Re មូលហេតុ គឺមកពី គ្រោះធម្មជាតិដ៏កំណាចៗនៅឆមាសទីមួយនៃឆ្នាំ២០១៩ បានកើតឡើងនៅក្នុងទ្វីបអាហ្វ្រិក និងឥណ្ឌា ទីដែលមានប្រព័ន្ធធានារ៉ាប់រងទន់ខ្សោយបំផុត ឬក៏គ្មានសោះតែម្តងផង។ ក្រុមហ៊ុនធានារ៉ាប់រងចំណាយសងត្រឹមតែប្រមាណ៤២%នៃទឹកប្រាក់ខាតបង់សរុបប៉ុណ្ណោះ។ តួលេខនេះសបញ្ជាក់ឱ្យឃើញជាថ្មី អំពីកង្វះខាតផ្នែកធានារ៉ាប់រងយ៉ាងខ្លាំងនៅតាមបណ្តាប្រទេសក្រីក្រកំពុងអភិវឌ្ឍន៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ