បារាំង-ប្រេស៊ីល៖លោកម៉ាក្រុងបានវាយបកចាស់ដៃលើលោកបុលសូណារ៉ូក្នុងរឿងឆេះព្រៃអាម៉ាហ្សូន
សង្រ្គាមពាក្យសម្តីរវាងប្រធានាធិបតីបារាំងលោកម៉ាក្រុង និងសមភាគីប្រេស៊ីលលោកបុលសូណារ៉ូកំពុងបន្តមានយ៉ាងផុសផុល។ នៅរសៀលថ្ងៃសុក្រ ទី២៣ សីហា លោកម៉ាក្រុងបានចោទលោកបុលសូណារ៉ូដោយយល់ឃើញថា ប្រធានាធិបតីប្រេស៊ីលរូបនេះបានភូតភរលើកិច្ចសន្យារបស់ខ្លួនក្នុងប្រយោជន៍បរិស្ថាន និងថានៅក្នុងករណីនេះ បារាំងនឹងប្រឆាំងលើកិច្ចព្រមព្រៀងដោះដូរសេរីដ៏ចម្រូងចម្រាសរវាងសហភាពអឺរ៉ុប និង ទីផ្សាររួមខាងត្បូងហៅកាត់ Mercosur ដែលមានប្រេស៊ីល អាហ្សង់ទីន អ៊ុយរូហ្កាយ និងប៉ារ៉ាហ្កាយជាប្រទេសសមាជិក។ ប្រតិកម្មខ្លាំងៗរបស់លោកម៉ាក្រុងបានធ្វើឡើង បន្ទាប់ពីលោកបុលសូណារ៉ូបានចោទលោកម៉ាក្រុងពីបទបានលូកដៃក្នុងរឿងភ្លើងឆេះព្រៃអាម៉ាហ្សូននៅប្រេស៊ីល។
ចុះផ្សាយនៅថ្ងៃ៖
ចម្លើយរបស់លោកម៉ាក្រុងចំពោះលោកបុលសូណារ៉ូបានធ្វើឡើងតាមរយៈសេចក្តីថ្លែងការណ៍របស់វិមានអេលីហ្សេដែលមានខ្លឹមសារយ៉ាងដូច្នេះថា « ផ្អែកលើឥរិយាបថរបស់ប្រេស៊ីលនារយៈពេលប៉ុន្មានសប្តាហ៍ចុងក្រោយនេះ ប្រធានាធិបតីនៃសាធារណរដ្ឋបានសម្គាល់ឃើញថា ប្រធានាធិបតីបុលសូណារ៉ូបានភូតភរគាត់នាឱកាសជំនួបកំពូល G២០ ក្នុងទីក្រុងអូសាកា ប្រទេសជប៉ុន »។ សេចក្តីថ្លែងការណ៍របស់វិមានអេលីហ្សេដដែលបានយល់ឃើញថា ប្រធានាធិបតីប្រេស៊ីលលោកបុលសូណារ៉ូបានសម្រេចមិនគោរពតាមកិច្ចសន្យារបស់ខ្លួនក្នុងបញ្ហាអាកាសធាតុក៏ដូចជាបញ្ហាជីវចម្រុះ។ នៅក្នុងលក្ខខណ្ឌនេះ បារាំងប្រឆាំងនឹងកិច្ចព្រមព្រៀងដោះដូរសេរីដ៏ចម្រូងចម្រាសរវាងសហភាពអឺរ៉ុប និង ទីផ្សាររួមខាងត្បូងដែលហៅកាត់ Mercosur នេះបើយោងតាមវិមានប្រធានាធិបតីបារាំង។
ក្រៅពីបារាំង ប្រទេសអៀរឡង់តាមរយៈនាយករដ្ឋមន្រ្តីលោក Leo Varadkar ក៏បានគំរាមក្នុងថ្ងៃសុក្រ ទី២៣ សីហាពីការបោះឆ្នោតប្រឆាំងនឹងកិច្ចព្រមព្រៀងដោះដូរសេរីរវាងសហភាពអឺរ៉ុប និង Mercosur នេះដែរ ប្រសិនបើប្រេស៊ីលមិនការពារព្រៃអាម៉ាហ្សូនដែលកំពុងប្រឈមនឹងអណ្តាតភ្លើងយ៉ាងសន្ធោសន្ធៅពេលនេះទេ។ ទន្ទឹមគ្នានេះ ប្រមុខរដ្ឋាភិបាលអាល្លឺម៉ង់លោកស្រីមែរកិល និងសមភាគីកាណាដាលោក Justin Trudeau ដែលជាសមាជិកក្នុងក្រុមប្រទេស G៧ ដែរបានយល់ឃើញថា វាជារឿងចាំបាច់ដែលគេត្រូវលើយករឿងភ្លើងឆេះព្រៃអាម៉ាហ្សូនទៅនិយាយនៅក្នុងជំនួបកំពូល G៧។
គួរបញ្ចាក់ថា ការវាយបករបស់លោកម៉ាក្រុង រួមទាំងលោក Leo Varadkar លើលោកបុលសូណារ៉ូពេលនេះបានធ្វើឡើង ខណៈពេលដែលភ្លើងកំពុងបន្តឆាបឆេះលើព្រៃអាម៉ាហ្សូន និងដែលលោកបុលសូណារ៉ូកំពុងរងសម្ពោធជាតិ អន្តរជាតិពីគ្រប់ទិសទី ពិសេសក្រោយពីលោកបានទម្លាក់ការទទួលខុសត្រូវលើក្រុមអង្គការក្រៅរដ្ឋាភិបាលថាជាអ្នកដុតព្រៃអាម៉ាហ្សូន។ គួររម្លឹកថានៅថ្ងៃព្រហស្បតិ៍ ទី២២ សីហា លោកម៉ាក្រុងបានសរសេរនៅក្នុងបណ្តាញសង្គម Twitter ដោយប្រដូចភ្លើងឆេះព្រៃអាម៉ាហ្សូនទៅនឹងភ្លើងឆេះផ្ទះមនុស្សលោក និងបានចាត់ទុកជាវិបត្តិអន្តរជាតិមួយ។ តែលោកបុលសូណារ៉ូឆេះកន្ទុយដោយចោទលោកម៉ាក្រុងពីបទជ្រៀតជ្រែកក្នុងកិច្ចការផ្ទៃក្នុងរបស់ប្រេស៊ីល និងថា គំនិតរបស់លោកម៉ាក្រុងជាគំនិតអាណានិគមនិយម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ