អនុសញ្ញា CITES ហាមមិនឲ្យមានការលក់ នាំចេញសត្វដំរី ពីតំបន់អាហ្វ្រិក
សត្វដំរី អាហ្រ្វិកនឹងលែងអាចត្រូវគេលក់ជួញដូរទៅបរទេស។ ជាមួយនឹងការបោះឆ្នោត គាំទ្ររបស់ប្រទេសចំនួន ៨៧ កាលពីថ្ងៃអង្គារម្សិលមិញ អនុសញ្ញា ស្តីពីពាណិជ្ជកម្ម អន្តរជាតិលើប្រភេទសត្វ និងរុក្ខជាតិ ប្រឈមនឹងការគំរាមផុតពូជ ដែលបានបើកកិច្ចប្រជុំកំពូលនៅទីក្រុងហ្សឺណែវ ប្រទេសស្វ៊ីស បានសម្រេច ជាផ្លូវការ ហាម មិនឲ្យមានការចាប់ និងលក់បញ្ជូនសត្វដំរីអាហ្វ្រិក ទៅបរទេស ឬ សូម្បី ទៅកាន់សួនសត្វ។
ចុះផ្សាយនៅថ្ងៃ៖
អនុសញ្ញាថ្មី ស្តីពីការជួញដូរសត្វព្រៃក្នុងពិភពលោក បានដាក់បំរាម ហាមមិនឲ្យមានការលក់ដូរ បញ្ចេញសត្វដំរី ពីតំបន់អាហ្វ្រិក។ បោះឆ្នោត គាំទ្រដោយប្រទេស ចំនួន ៨៧ កាលពីថ្ងៃអង្គារ នៅទីក្រុងហ្សឺណែវ អនុសញ្ញាស្តីពីពាណិជ្ជកម្ម អន្តរជាតិលើប្រភេទសត្វ និងរុក្ខជាតិព្រៃ ដែលប្រឈមនឹងការជិតផុតពូជ ហៅកាត់ថា CITES បានចែង ហាមមិនឲ្យគេចាប់សត្វដំរីព្រៃ អាហ្វ្រិក ដើម្បីយកទៅចិញ្ចឹម នៅតាមសួនសត្វ ឬយកទៅបង្វឹកជាសត្វសម្រាប់សំដែងនៅរោងសៀក នៅក្នុងពិភពលោក។
តាមអត្ថបទរបស់អនុសញ្ញា សត្វដំរី អាហ្វ្រិកត្រូវរស់នៅក្នុងជំរកព្រៃរបស់វា នៅអាហ្វ្រិក។ យ៉ាងណាក៏ដោយ សហភាពអឺរ៉ុបបានចូលរួមកែប្រែបន្តិច ដោយបានបង្កើតករណី លើកលែងដែលថា សត្វដំរី អាហ្វ្រិក ត្រូវរស់នៅក្នុងព្រៃធម្មជាតិ ដែលវាកើតធំដឹងក្តី ប៉ុន្តែ គេអាចយកវាចេញពីកន្លែងកំណើត ក្នុងហេតុផលណាដែលជួយ ថែរក្សា អភិរក្សសត្វដំរីអាហ្រ្វិក។ កំណែទម្រង់របស់សហភាពអឺរ៉ុបបានបញ្ជាក់ច្បាស់ៗផងដែរថា គេនៅតែអាចដោះដូរ បញ្ជូន សត្វដំរីអាហ្វ្រិក ដែលកំពុងរស់នៅ រួចហើយ នៅតាមសួនសត្វ នៅក្រៅទឹកដីអាហ្រ្វិក។
ការសម្រេចហាមមិនឲ្យលក់ បញ្ចេញសត្វដំរីអាហ្វ្រិក ត្រូវបានប្រទេសចំនួន ២៩បោះ២ឆ្នោតប្រឆាំង ក្នុងនោះ ស៊ីមបាវ៉េដែលចេញមុខ ប្រឆាំងខ្លាំងជាងគេ។ ប្រឆាំងព្រោះថា ចាប់តាំងពីឆ្នាំ ២០១២ ស៊ីមបាវ៉េ បានចាប់ និងលក់នាំចេញ កូនសត្វដំរី ជាង ១០០ក្បាលទៅឲ្យសួនសត្វនៅប្រទេសចិន។ នេះបើតាមអង្គការការពារសត្វព្រៃ Humane Society International។
នៅក្នុងកិច្ចប្រជុំ រយៈពេល១២ថ្ងៃ អនុសញ្ញាស្តីពីពាណិជ្ជកម្ម អន្តរជាតិលើប្រភេទសត្វ និងរុក្ខជាតិព្រៃ ដែលប្រឈមនឹងការជិតផុតពូជ ហៅកាត់ថា CITES បានចេញបម្រាមថ្មីៗ ជាច្រើន ដើម្បី ការពារ អភិរក្សសត្វព្រៃ ដែលមានតាំងពីសត្វកវែង ហ្សីរ៉ាវ ត្រីឆ្លាម និងសត្វភេទឹកសាបជាដើម។
នៅថ្ងៃ ចន្ទ ប្រទេសជិត ១០០ បានបោះឆ្នោត ហាមផ្តាច់ទាំងស្រុងមិនឲ្យមានពាណិជ្ជកម្ម អន្តរជាតិ ទិញ លក់ សត្វភេ ដែលកំពុងពេញនិយមនៅប្រទេសជប៉ុន ជាទី ដែលសត្វភេអាស៊ី ត្រូវបានទិញ លក់ និងចិញ្ចឹមជាសត្វមិត្តរបស់មនុស្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ