ព្រៃអាម៉ាហ្សូន៖ យូណេស្កូអំពាវនាវឲ្យពង្រឹងយន្តការដើម្បីការពារសម្បត្តិរួមរបស់មនុស្សជាតិ
ក្រុមប្រទេសមានព្រៃអាម៉ាហ្សូន នៅថ្ងៃសុក្រម្សិលមិញ បានបើកជំនួបកំពូលនៅប្រទេសកូឡុំប៊ី ដើម្បីស្វែងរកវិធានការ ការពារ និងអភិរក្សព្រៃអាម៉ាហ្សូន ព្រៃត្រូពិកធំជាងគេនៅលើពិភពលោក ដែលសព្វថ្ងៃ កំពុងរងបំផ្លាញ ដោយភ្លើងឆេះព្រៃ។ ទន្ទឹមនឹងការបើកជំនួបកំពូលរបស់ក្រុមប្រទេស មានព្រៃអាម៉ាហ្សូន អគ្គនាយិកាអង្គការយូណេស្កូ បានអំពាវនាវឲ្យរដ្ឋាភិបាលចូលរួម ពង្រឹងយន្តការរបស់អនុសញ្ញាបេតិកភណ្ឌពិភពលោក ដើម្បី អាចការពារសម្បត្តិធម្មជាតិរួមរបស់មនុស្សជាតិ ឲ្យបានល្អប្រសើរជាងនេះ។
ចុះផ្សាយនៅថ្ងៃ៖ កែប្រែថ្ងៃទី៖
តើមនុស្សជាតិអាចការពារព្រៃប្រឹក្សា ដែលជាសម្បត្តិធម្មជាតិរួមរបស់ខ្លួនដែរឬទេ? សំណួរនេះ ត្រូវបានគេចោទសួរជាថ្មី នៅពេលក្រុមប្រទេសអាមេរិកឡាទីន ចំនួន ៦ កំពុងត្រៀមបើកជំនួបកំពូល ស្តីពីព្រៃអាម៉ាហ្សូន។ ព្រៃ ត្រូពិកអាម៉ាហ្សូន ដែលជាសួតរបស់ផែនដី ប៉ុន្តែ ដែលកំពុងរងបំផ្លាញ ដោយសារភ្លើងឆេះព្រៃ និងការកាប់បំផ្លាញ។
ជំនួបកំពូលស្តីពីព្រៃអាម៉ាហ្សូន នឹងគ្មានវត្តមានចូលរួមរបស់ប្រធានាធិបតីប្រេស៊ីល ដែលកំពុងរងការរិះគន់ថា យឺតយ៉ាវ គ្មានចេតនាចង់ពន្លត់ភ្លើងឆេះព្រៃ អាម៉ាហ្សូន ក្នុងទឹកដីប្រេស៊ីល។
សម្រាប់លោកស្រី Audrey Azoulay អគ្គនាយិការអង្គការយូណេស្កូ យន្តការដើម្បីការពារព្រៃធម្មជាតិ ដែលជាសម្បត្តិរួមរបស់មនុស្សជាតិ មានរួចហើយ ដូចជាអនុសញ្ញាបេតិកភណ្ឌពិភពលោក ឬ បណ្តាញតំបន់ជីវមណ្ឌល Biosphère របស់អង្គការយូណេស្កូជាដើម។ អ្វីដែលគេត្រូវបន្ត គឺគ្រាន់តែពង្រឹង និងអនុវត្តយន្តការទាំងនោះ ឲ្យបានច្បាស់លាស់ និងម៉ត់ចត់តែប៉ុណ្ណោះ។
លោកស្រី អគ្គនាយិការរបស់យូណេស្កូអំពាវនាវចង់ឲ្យគ្រប់រដ្ឋាភិបាលក្នុងលោក ផ្តល់សច្ចាប័នលើយន្តការរបស់យូណេស្កូ បន្ថែម បង្កើនតំបន់ព្រៃអភិរក្ស ហើយនិងពង្រឹងមធ្យោបាយដើម្បីតាមដាន ការពារបន្ថែមទៀត។
ដោយចាត់បញ្ចូលក្នុងបញ្ជីបេតិកភណ្ឌពិភពលោក យូណេស្កូបានបង្កើនទំហំព្រៃបៃតង ហើយនិងសម្បត្តិវប្បធម៌ជាច្រើន ដែលគេត្រូវចូលរួមការពារ និងអភិរក្ស។ ជីវមណ្ឌល ១២កន្លែង របស់ព្រៃអាម៉ាហ្សូន ហើយនិងព្រៃអាម៉ាហ្សូន ប្រមាណ ៦លានហិចតា ពោលគឺស្មើនឹង១%នៃទំហំព្រៃអាម៉ាហ្សូនសរុប ត្រូវបានចាត់ចូលក្នុងបញ្ជីការពារបេតិកភណ្ឌរបស់អង្គការយូណេស្កូ។
យូណេស្កូ អាចជួយ គាំទ្រ តម្រង់ទិស ប៉ុន្តែ មិនអាចទទួលខុសត្រូវ ធ្វើការជំនួស ម្ចាស់រដ្ឋនីមួយៗនោះទេ។ នេះជាការរំលឹករបស់ប្រធានមជ្ឈមណ្ឌលបេតិកភណ្ឌពិភពលោករបស់យូណេស្ក។ សម្រាប់យូណេស្កូ ដើម្បី ដោះស្រាយបញ្ហា ក្នុងរយៈពេល យូរអង្វែង គេត្រូវគិតគូរ បង្កើតគម្រោង ដែលជួយ ផ្សព្វផ្សាយចំណេះដឹងស្តីពីសារៈសំខាន់នៃព្រៃធម្មជាតិ ដល់ប្រជាជនម្ចាស់ស្រុក។ មួយវិញទៀត គេត្រូវគិតគូរផងដែរ ពីមធ្យោបាយដ៏សំខាន់មួយ ដែលគេត្រូវផ្តល់ទៅឲ្យប្រជាជនដែលរស់នៅជុំវិញ ព្រៃអាម៉ាហ្សូន ដើម្បីឲ្យពួកគេបានប្រាក់ចំណូលថ្មី ដោយមិនចាំបាច់ត្រូវជីករ៉ែ កាប់ដើមឈើ ឬដុតព្រៃ ដើម្បីយកដី ធ្វើចំការ ឬចិញ្ចឹមសត្វ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ