អ៊ីរ៉ង់ប្រកាសប្រើម៉ាស៊ីនទំនើបដើម្បីបង្កើនបរិមាណស្តុកសារធាតុអ៊ុយរ៉ាញ៉ូម
ទៅតាមការសន្យារបស់ខ្លួន អ៊ីរ៉ង់ នៅថ្ងៃសៅរ៍ទី ៧កញ្ញានេះ បានប្រកាសដាក់ឲ្យប្រើប្រាស់ម៉ាស៊ីនទំនើប ៤០គ្រឿង ដើម្បី ចម្រើនសារធាតុអ៊ុយរ៉ាញ៉ូម។ នេះជាចំណាត់ការថ្មីមួយទៀតរបស់អ៊ីរ៉ង់ ដើម្បី កាត់បន្ថយ ការគោរពសន្យា របស់អ៊ីរ៉ង់ ដែលមានចែងនៅក្នុងកិច្ចព្រមព្រៀងនុយក្លេអ៊ែរអ៊ីរ៉ង់ ឆ្នាំ ២០១៥។ ចាប់តាំងពីខែ ឧសភាមក អ៊ីរ៉ង់បានកាត់បន្ថយការគោរព កិច្ចសន្យា របស់ខ្លួន ដែលមានចែងនៅក្នុងកិច្ចព្រមព្រៀង នៅបន្ទាប់ពីអាមេរិកដកខ្លួនចេញពីកិច្ចព្រមព្រៀង និងបណ្តាប្រទេសហត្ថលេខី នៅអឺរ៉ុប មិនអាចជួយការពារអ៊ីរ៉ង់ ពីការដាក់ទណ្ឌកម្មសេដ្ឋកិច្ចរបស់អាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
តាមអ្នកនាំពាក្យរបស់ទីភ្នាក់ងារថាមពលនុយក្លេអ៊ែរអ៊ីរ៉ង់ ម៉ាស៊ីនចម្រើនធាតុអ៊ុយរ៉ាញ៉ូម ទំនើបថ្មី ចំនួន ៤០គ្រឿងត្រូវបានដាក់ឲ្យដំណើរការ តាំងពីថ្ងៃសុក្រម្សិលមិញ។ ជាមួយ ម៉ាស៊ីនចម្រើនធាតុអ៊ុយរ៉ាញ៉ូម ដែលមានកម្លាំងខ្លាំងជាងម៉ាស៊ីនមុនៗ អ៊ីរ៉ង់មានគោលដៅ បង្កើនបរិមាណស្តុក សារធាតុអ៊ុយរ៉ាញ៉ូម ដែលចម្រើនរួចហើយ នៅក្នុងឃ្លាំងរបស់ខ្លួន។
ការដាក់ឲ្យដំណើរការម៉ាស៊ីនទំនើប ដើម្បីចម្រើនធាតុអ៊ុយរ៉ាញ៉ូម គឺជាការរំលោភកិច្ចព្រមព្រៀងនុយក្លេអ៊ែរឆ្នាំ ២០១៥ ដែលបានតម្រូវឲ្យអ៊ីរ៉ង់ ប្រើប្រាស់តែម៉ាស៊ីនជំនាន់ទី១ប៉ុណ្ណោះ ដើម្បី ចម្រើនធាតុអ៊ុយរ៉ាញ៉ូម។
រងគំនាបទណ្ឌកម្មសេដ្ឋកិច្ចរបស់អាមេរិក ដែលបានដកខ្លួនចេញពីកិច្ចព្រមព្រៀង នុយក្លេអ៊ែរ និងអសកម្មរបស់ប្រទេសហត្ថលេខីអឺរ៉ុបផ្សេងទៀត ដែលមិនអាចជួយការពារអ៊ីរ៉ង់ពី ទណ្ឌកម្មសេដ្ឋកិច្ចរបស់អាមេរិក អ៊ីរ៉ង់បានប្រកាសដោះដៃបន្តិចម្តងៗ ពីការគោរពតាមកិច្ចសន្យា ដែលមានចែងនៅក្នុងកិច្ចព្រមព្រៀង។ នៅថ្ងៃទី ១កក្កដាកន្លងទៅ អ៊ីរ៉ង់បានប្រកាសពីបរិមាណស្តុកសារធាតុអ៊ុយរ៉ាញ៉ូម លើសពីចំនួនដែលកំណត់ដោយកិច្ចព្រមព្រៀង។ នៅខែដដែល អ៊ីរ៉ង់ បានប្រកាសចម្រើនសារធាតុអ៊ុយរ៉ាញ៉ូមរបស់ខ្លួន ដល់កម្រិត ៣,៦ភាគរយ។
តាមអ្នកនាំពាក្យរបស់ទីភ្នាក់ងារថាមពលអ៊ីរ៉ង់ បច្ចុប្បន្ននេះ អ៊ីរ៉ង់ គ្មានផែនការដើម្បីចម្រើនធាតុអ៊ុយរ៉ាញ៉ូម ឲ្យដល់២០ភាគរយនោះទេ។ ប្រសិនបើអ៊ីរ៉ង់ សម្រេចចិត្តធ្វើនៅថ្ងៃណាមួយ អ៊ីរ៉ង់ ត្រូវចម្រើនធាតុអ៊ុយរ៉ាញ៉ូម ឲ្យដល់កម្រិត ៤,៥%ជាមុនសិន។
សកម្មភាពចម្រើនធាតុអ៊ុយរ៉ាញ៉ូម អាចបង្កើនអ៊ីសូតូបទៅត្រឹម ៣% ឬ៤% ដើម្បីយកទៅប្រើប្រាស់ សម្រាប់រោងចក្រអគ្គិសនីនុយក្លេអ៊ែរ។ ក៏ប៉ុន្តែ បើគេចម្រើនធាតុអ៊ុយរ៉ាញ៉ូម រហូតទៅដល់កម្រិត ៩០% នោះគេអាចយកវាទៅផលិតអាវុធនុយក្លេអ៊ែរបាន។
អ៊ីរ៉ង់លែងគោរពកិច្ចសន្យាមួយចំនួនរបស់កិច្ចព្រមព្រៀង ប៉ុន្តែ ភាគីអ៊ីរ៉ង់នៅតែ រក្សាតម្លាភាព ពោលគឺនៅតែអនុញ្ញាតឲ្យទីភ្នាក់ងារថាមពលបរមាណូ អន្តរជាតិ AIEA ចូលទៅតាមដានសកម្មភាពរោងចក្រនុយក្លេអ៊ែរក្នុងទឹកដីអ៊ីរ៉ង់ ដូចមុនដដែល។ តាមគម្រោង ប្រធានទីភ្នាក់ងារ AIEAនឹងជួបពិភាក្សាជាមួយភាគីអ៊ីរ៉ង់ នៅថ្ងៃអាទិត្យស្អែកនេះ។ នៅចំពោះមុខអ៊ីរ៉ង់ ដែលដកខ្លួន លែង គោរពកិច្ចសន្យាទៅតាមកិច្ចព្រមព្រៀង បារាំង អង់គ្លេស និងអាល្លឺម៉ង់ ដែលជាហត្ថលខីនៃកិច្ចព្រមព្រៀង បានទុកក្តីសង្ឃឹមខ្លាំងលើការងារត្រួតពិនិត្យ របស់AIEA ដើម្បី បង្ការកុំឲ្យអ៊ីរ៉ង់ អាចលួចធ្វើសកម្មភាពចម្រើនធាតុអ៊ុយរ៉ាញ៉ូម សម្រាប់គោលដៅយោធា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ