តារាវិទូរកឃើញទឹកនៅភពមួយ ក្រៅប្រព័ន្ធព្រះអាទិត្យ
ការស្រាវជ្រាវរបស់អ្នកវិទ្យាសាស្រ្តដើម្បី ស្វែងរកភពដែលគេអាចរស់នៅបាន កំពុងផ្តល់ពន្លឺព្រាលៗ។ តាមការសិក្សាមួយ ដែលចុះផ្សាយ នៅក្នុងទស្សនាវដ្តី Nature Astronomy កាលពីថ្ងៃពុធម្សិលមិញ តារាវិទូ បានអះអាងថា គេរកឃើញ ជាលើកទី១ ចំហាយទឹក នៅពីលើភពមួយ ដែលស្ថិតនៅក្រៅប្រព័ន្ធព្រះអាទិត្យ។ រកឃើញមានចំហាយទឹក នៅពីលើភព ក្នុងតំបន់ដែលអាចរស់នៅបាន ជាដំណាក់កាលថ្មីមួយទៀតរបស់អ្នកវិទ្យាសាស្រ្ត ដែលកំពុងស្រាវជ្រាវរកជីវិត នៅក្រៅភពផែនដី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
ភពដែលតារាវិទូរកឃើញមានចំហាយទឹក មានឈ្មោះថា K2-18bដែលស្ថិតនៅក្រៅប្រព័ន្ធព្រះអាទិត្យ និងដែលស្ថិតនៅចម្ងាយ ១១០ឆ្នាំពន្លឺពីភពផែនដី។ ភព K2-18b ត្រូវបានតេឡេស្កុប អវកាសអាមេរិក Kepler រកឃើញនៅឆ្នាំ ២០១៥។ នេះជាលើកទី១ ដែលគេរកឃើញមានចំហាយទឹក នៅក្នុងបរិយាកាសរបស់ភពមួយ ដែលស្ថិតនៅក្នុងតំបន់អាចមានអំណោយផលដល់ជីវិត ដែលភាសាបារាំងហៅថា la zone habitable។
ភពមួយ ដែលស្ថិតនៅក្នុងតំបន់ដែលអំណោយផលដល់ជីវិត មានន័យថា ភពនោះ ស្ថិតនៅមិនជិត ផ្កាយពេក ឬព្រះអាទិត្យរបស់វា ដែលធ្វើឲ្យមានសីតុណ្ហភាពក្តៅពេក ហើយក៏មិននៅឆ្ងាយពីផ្កាយពេក ដែលធ្វើឲ្យមានសីតុណ្ហភាពត្រជាក់ពេក។ ពោលគឺវាស្ថិតនៅក្នុងតំបន់ដែលមានសីតុណ្ហភាពសមល្មម អាចឲ្យទឹកមានសភាពរាវ ដែលអាចអំណោយផល នៃការកកើតជីវិត ដូចភពផែនដីរបស់យើង។
តាមក្រុមតារាវិទូ របស់សកលវិទ្យាល័យទីក្រុងឡុងដ៍ ដែលជាអ្នកស្រាវជ្រាវរកឃើញខាងលើ គេនៅមិនទាន់ហ៊ានកំណត់ទេថា មានទឹករាវ នៅលើផ្ទៃភព K2-18b ប៉ុន្តែ ការរកឃើញ ចំហាយទឹក នៅក្នុងបរិយាកាសរបស់ភព ក្រៅប្រព័ន្ធព្រះអាទិត្យ មួយនេះ អាចឲ្យជឿថា វាអាចទៅរួចដែល ភពនេះមានទឹករាវ ដូចផែនដី។
តារាវិទូបានសំគាល់ឃើញមានចំហាយទឹកនៅលើភពក្រៅផែនដី K2-18b តាមរយៈការសិក្សាលើទិន្នន័យដែលបានមកពីតេឡេស្កុបអវកាស ហឺបល ពីឆ្នាំ ២០១៦ ដល់ឆ្នាំ ២០១៧។
គឺការសិក្សាទៅលើ ពន្លឺរបស់ផ្កាយ ដែលឆ្លងកាត់បរិយាកាសនៃភព ក្រៅប្រព័ន្ធព្រះអាទិត្យ អាចឲ្យគេសន្និដ្ឋានបានពីសញ្ញានៃម៉ូលេគុលរបស់ចំហាយទឹក។
អ្វីដែលគេរកឃើញនៅលើភពក្រៅប្រព័ន្ធព្រះអាទិត្យ គ្រាន់តែជាចំហាយទឹកនៅក្នុងបរិយាកាសរបស់ភព។ គេនៅមិនទាន់ដឹងច្បាស់ តើមានទឹក រាវនៅលើផ្ទៃដីរបស់ភពដែរឬទេ។ និងថា តើអាចមានជីវិតលូតលាស់ នៅលើភពនោះដែរឬយ៉ាងណានោះទេ។
គេនៅទន្ទឹងរង់ចាំដាក់ឲ្យដំណើរការតេឡេស្កុបអវកាសទំនើបថ្មី មួយទៀត នាពេលខាងមុខ គឺតេឡេស្កុប ចេមស៍វេប ដើម្បីធ្វើការសិក្សាលម្អិត ទៅលើភពនេះ និងភពដទៃទៀត ដែលគេបានរកឃើញនៅក្រៅប្រព័ន្ធព្រះអាទិត្យកន្លងមក។
ទីភ្នាក់ងារអវកាសណាសា ធ្លាប់បានរកឃើញ មានភព នៅក្រៅប្រព័ន្ធព្រះអាទិត្យ ចំនួន ១០៣០ ប៉ុន្តែ មានតែភពមួយចំនួនតូច ដែលត្រូវបានជ្រើសរើស មកសិក្សា វិភាគដើម្បី ដឹងថា តើភពទាំងនោះ មានលក្ខខណ្ឌ អំណោយផលដូចភពផែនដីដែរឬទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ