ដាណឺម៉ាក ដាំដើមឈើ១លានដើមបានមកពីកម្មវិធីទូរទស្សន៍ដើម្បីអាកាសធាតុ
កម្មវិធីប្រមូលមូលនិធិតាមទូរទស្សន៍ ដែលផ្តួចផ្តើមធ្វើដើម្បីអាកាសធាតុ ជាលើកទីមួយបង្អស់ នៅលើពិភពលោក បានអនុញ្ញាតឱ្យដាណឺម៉ាក ប្រមូលថវិកាបាន ពីរលានបួនសែនអឺរ៉ូ។ តាមរយៈថវិកានេះ ដាណឺម៉ាក នឹងអាចដាំដើមឈើ បាន១លានដើម នៅចុងខែតុលាខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
អ្នកផ្តួចផ្តើមគំនិតរំពឹងថាកម្មវិធីប្រមូលមូលនិធិដើម្បីអាកាសធាតុតាមទូរទស្សន៍ Téléthon នឹងអាចប្រមូលថវិកាបានចំនួន២៧០០០០០០អឺរ៉ូ។ កម្មវត្ថុវិះតែសម្រេច ព្រោះនៅទីបំផុត ដាណឺម៉ាក បានទទួលជំនួយ ២លានបួនសែនអឺរូ សម្រាប់យកទៅទិញកូនឈើដាំបាន១លានដើម នៅទូទាំងប្រទេស។ ជាងនេះទៅទៀត ២០%នៃមូលនិធិប្រមូលបាន នឹងត្រូវរក្សាទុកសម្រាប់បុព្វហេតុថែរក្សានិងអភិរក្សព្រៃឈើដែលមានស្រាប់នៅដាណឺម៉ាក និងនៅបរទេស។
នេះជាចូលរួមចំណែកដ៏តិចតួចណាស់ បើគិតលំដាប់ពិភពលោក តែជាចំនួនដ៏ច្រើនបំផុត បើយោលទៅលើចំនួនប្រជាជនដាណឺម៉ាក ដែលមានប្រមាណ៥លាននាក់ប៉ុណ្ណោះ ! ពលរដ្ឋដាណឺម៉ាក ៨៣% ចាត់ទុកការប្រែប្រួលអាកាសធាតុជាបញ្ហាដ៏ធ្ងន់ធ្ងរ។ ហើយដើម្បីប្រយុទ្ធប្រឆាំងនឹងបញ្ហាអាកាសធាតុ គ្មានអ្វីប្រសើរជាងការដាំដើមឈើឡើយ នេះបើតាមការបញ្ជាក់របស់អ្នកស្រាវជ្រាវ ព្រោះដើមឈើ និងរុក្ខជាតិ ជាអ្នកស្រូបឧស្ម័នកាបូនិកដែលបង្កឱ្យមានឧស្ម័នផ្ទះកញ្ចក់ និងបញ្ចេញអុកស៊ីហ្សែន ដែលមនុស្សលោកត្រូវការដើម្បីដកដង្ហើម។ បណ្តុះព្រៃឈើ គ្របដណ្តប់ផែនដីប្រៀបដូចជាជួយបង្កើនធនធានឱ្យពិភពលោក។
នេះជាលើកទីមួយហើយ ដែលទូរទស្សន៍មានរៀបចំកម្មវិធីថវិកា ស្តីពីបញ្ហាអាកាសធាតុ។ កម្មវិធីតេឡេតុង ធ្លាប់មានធ្វើក្នុងបណ្តាប្រទេសជាច្រើននៅអឺរ៉ុប និងស្ទើរជារៀងរាល់ឆ្នាំដែរកន្លងមក តែដើម្បីបានមូលនិធិយកទៅប្រើប្រាស់ក្នុងវិស័យស្រាវជ្រាវវេជ្ជសាស្ត្រ និងជំងឺកម្រប៉ុណ្ណោះ។ នាយកមូលនិធិGrowing Trees Network ដែលចូលរួមក្នុងកម្មវិធីតេឡេតុងនេះដែរ បានពន្យល់ថា កម្មវិធីប្រមូលមូលនិធិដើម្បីអាកាសធាតុនេះ ជាវិធីបញ្ច្រាបព័ត៌មានដល់ពលរដ្ឋអំពីកាយវិការដ៏សាមញ្ញៗ នៃប្រយុទ្ធប្រឆាំងនឹងវិបត្តិអាកាសធាតុ។
ការដាំដើមឈើ ដែលបានមកពីការប្រមូលវិភាគទាន នឹងត្រូវចាប់ផ្តើមនៅចុងខែតុលាដល់ចុងខែវិច្ឆិកា នៅតំបន់ណាដែលភូមិឃុំ ឬរដ្ឋ ឬវិហារ កាតូលិក ស្ម័គ្រចិត្តឱ្យដីដាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ