លោកម៉ាក្រុងទៅអ៊ីតាលីដើម្បីផ្សះផ្សាទំនាក់ទំនងប្រទេសទាំងពីរឡើងវិញ
ចុះផ្សាយនៅថ្ងៃ៖
ស្តាប់ - ០៦:០២
នៅថ្ងៃនេះ ប្រធានាធិបតីបារាំង លោក អេម៉ាណុយអែល ម៉ាក្រុង ត្រូវអញ្ជើញទៅបំពេញទស្សនកិច្ចនៅប្រទេសអ៊ីតាលី រយៈពេលពីរបីម៉ោង ដើម្បីមានជំនួបជាមួយប្រមុខរដ្ឋាភិបាលអ៊ីតាលី ដែលទើបប្តូរផ្លាស់សមាសភាពរដ្ឋាភិបាលចម្រុះថ្មី ដោយគ្មានរូបអ្នកជាតិនិយមជ្រុល ម៉ាតេអូ សាល់វីនី Matteo Salvini។ សម្រាប់បារាំង នេះជាឱកាសថ្មី បង្ខិតប៉ារីស និងរ៉ូម ឱ្យងាកមកគ្នាវិញផង និងជាឱកាសផ្សះផ្សាទំនាក់ទំនងដែលតានតឹងនឹងគ្នាខ្លាំង នារយៈប៉ុន្មានខែចុងក្រោយនេះមកផង។
សញ្ញានៃភាពចម្រូងចម្រាសរវាងបារាំងនិងអ៊ីតាលី បានចាប់លេចឡើង នៅក្នុងឆ្នាំ ២០១៧ ក្នុងរវាងតែប៉ុន្មានសប្តាហ៍ប៉ុណ្ណោះ ជុំវិញ សំណុំរឿងបី ៖ លំហូរអន្តោប្រវេសន៍ ស្ថានភាពនៅលីប៊ី និងនយោបាយឧស្សាហកម្ម ដោយបារាំងបានគំរាមខ្ទប់មិនឱ្យក្រុមហ៊ុនអ៊ីតាលីទិញហ៊ុនក្រុមហ៊ុនបារាំង។ ជម្លោះប្រេះឆា ត្រូវបានផ្សះផ្សា ដោយមានកិច្ចខិតខំប្រឹងប្រែងផ្នែកការទូតយ៉ាងខ្លាំង។
នៅចុងខែមីនា ឆ្នាំ២០១៨ ឧប្បត្តិហេតុ នៅតាមព្រំដែន បានរុញច្រានបារាំងនិងអ៊ីតាលី ឱ្យធ្លាក់ក្នុងភាពតានតឹងយ៉ាងខ្លាំង ជាថ្មី រហូតមានការកោះហៅឯកអគ្គរដ្ឋទូតចូលបំភ្លឺផង។ មិនបានប៉ុន្មានថ្ងៃ អ៊ីតាលីមានរដ្ឋាភិបាលចម្រុះថ្មី។ អ្នកជាតិនិយមជ្រុល នៃចលនាផ្កាយ៥ បានឈ្នះឆ្នោត។ លោក ម៉ាតេអូ សាល់វីនី បានក្លាយជារដ្ឋមន្ត្រីក្រសួងមហាផ្ទៃអ៊ីតាលី។ ការវាយប្រហារដោយពាក្យសំដីដាក់គ្នា បានកើតមានលើគ្រប់វិស័យ រហូតដល់បារាំងកោះហៅឯកអគ្គរដ្ឋទូតបារាំងប្រចាំក្រុងរ៉ូមត្រលប់ចូលស្រុកវិញ។ បុរសខ្លាំងទីពីររបស់អ៊ីតាលី បានមកគាំទ្រចលនាអាវកាក់លឿងនៅបារាំងទៀត។ ជាភាពតានតឹងដែលពុំធ្លាប់កើតមានទេ គិតចាប់ពីសង្គ្រាមលោកលើកទីពីរមក។
នៅពីក្រោយភាពតានតឹងឡើងដល់កំរិតកំពូល ប្រធានាធិបតីអ៊ីតាលីដែលមានតួនាទីជាកិត្តិយស បានបើអំណាចដ៏មានកំរិតរបស់លោក ប្រឆាំងនឹងជំហរនយោបាយរបស់រដ្ឋាភិបាល។ នៅទីបំផុត រដ្ឋាភិបាលអ៊ីតាលី ក្រោមការដឹកនាំ របស់លោកនាយករដ្ឋមន្ត្រី កុងតេ Conteដដែល បានប្តូរផ្លាស់សមាសភាពរដ្ឋមន្ត្រីខ្លះ និងលែងមានរូបលោក សាល់វីនី ក្នុងជួររដ្ឋាភិបាល។ រដ្ឋាភិបាលថ្មីនេះ បានបន្ទន់កាយវិការ និងបានបង្ហាញកាយវិការសម្របសម្រួលជាមួយបារាំង ទទួលស្វាគមន៍ លោក ម៉ាក្រុង ក្នុងនាមប្រមុខដឹកនាំបរទេស មុនគេបង្អស់។
អ៊ីចឹងហើយបានជាបារាំង ក៏ចង់ផ្តល់សំណាងដល់រដ្ឋាភិបាលអ៊ីតាលីថ្មីនេះវិញ។ ម្យ៉ាងទៀត ការស្តារទំនាក់ទំនងជាមួយអ៊ីតាលី ជាអាទិភាពចំបងមួយរបស់បារាំង។ ដើម្បីជាសារផ្សះផ្សា កាលពីខែឧសភា បារាំងបានអញ្ជើញប្រធានាធិបតីអ៊ីតាលីឱ្យមកប្រារព្វខួប៥០០ឆ្នាំនៃមរណភាពរបស់វិចិត្រករអ៊ីតាលីស្លាប់នៅបារាំង លោក ឡេអូណា ដឺវាំងស៊ី។ នៅថ្ងៃនេះ បារាំងចង់បំភ្លេចភាពតានតឹងកន្លងមក ហើយចាប់ផ្តើមថ្មីជាមួយរដ្ឋាភិបាលថ្មីរបស់អ៊ីតាលី។
អន្តោប្រវេសន៍បង្ខិតបារាំងនិងអ៊ីតាលី ចូលកៀកគ្នា
ជាមួយលោកនាយករដ្ឋមន្ត្រីអ៊ីតាលី លោក ម៉ាក្រុង មានរឿងច្រើនត្រូវជជែកដោះស្រាយគ្នា ៖ បញ្ហាអឺរ៉ុប គណៈកម្មការអឺរ៉ុបថ្មី លីប៊ី ដោយមិនរំលងឡើយ រឿងសេដ្ឋកិច្ចនិងអន្តោប្រវេសន៍។ លោក ម៉ាក្រុង ចង់ឆ្លៀតទាញប្រយោជន៍ពីបរិបទនយោបាយអ៊ីតាលីនេះ ជំរុញសំណុំរឿងសេដ្ឋកិច្ចនិងថវិកា ឱ្យបានទៅមុខ។ បារាំងនិងអ៊ីតាលី មានជំហរស្ទើរដូចគ្នាលើផ្នែកសេដ្ឋកិច្ចនិងនយោបាយថវិកា ត្រូវការគាំទ្រគ្នាទៅវិញទៅមក ! ប្រទេសទាំងពីរត្រូវការកាន់ដៃគ្នា ក្រែងអាចទាមទារឱ្យក្រុមប្រទេសអ្នកប្រកាន់នយោបាយត្បិតត្បៀតថវិកា ដូចយ៉ាងអាល្លឺម៉ង់ និងក្រុមប្រទេសអឺរ៉ុបខាងជើងព្រមបន្ធូរបន្ថយនយោបាយត្បិតត្បៀតថវិកា បានខ្លះ។
ចំពោះបញ្ហាអន្តោប្រវេសន៍ ដែលជាដើមចមដ៏សំខាន់មួយនៃភាពតានតឹងបារាំង-អ៊ីតាលី ក្នុងសម័យលោក សាល់វីនី ជារដ្ឋមន្ត្រីក្រសួងមហាផ្ទៃ ក៏ជាអ្នកបង្ខិតប្រទេសទាំងពីរឱ្យចូលកៀកគ្នាវិញដែរ។ អ៊ីតាលី ចង់មានប្រព័ន្ធចែកចាយអន្តោប្រវេសន៍ស្រង់បានពីសមុទ្ទមេឌីទែរ៉ាណេ ជាស្វ័យប្រវត្តិ។ សំណើនេះបានការគាំទ្រពីបារាំងហើយ។ បានន័យថា ប៉ារីសនិងរ៉ូម មានការព្រមព្រៀងគ្នា លើប្រព័ន្ធចែកចាយអន្តោប្រវេសន៍បណ្តោះអាសន្ន ក្នុងពេលរង់ចាំមានកិច្ចព្រមព្រៀងថ្នាក់អឺរ៉ុប ដែលនឹងត្រូវប្រជុំសម្រេចនៅថ្ងៃទី២៣កញ្ញាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ