អង់គ្លេស របួស៥នាក់ ក្នុងការវាយប្រហារដោយកាំបិតនៅក្នុងមណ្ឌលពាណិជ្ជកម្ម
ប៉ូលិសប្រយុទ្ធប្រឆាំងភេរវកម្មទទួលបើកអង្កេតភេរវកម្មភ្លាម ក្រោយពីមានហេតុការណ៍វាយប្រហារមនុស្សដោយកាំបិត នៅកណ្តាលផ្សារទំនើបមួយនៃក្រុងManchester ភាគខាងជើងប្រទេសអង់គ្លេស។ មានអ្នករងរបួសយ៉ាងហោចណាស់ ៥នាក់។ ជនដៃដល់អាយុខ្ទង់សែប្លាយ ដែលទំនងធ្វើសកម្មភាពទោល ត្រូវបានចាប់ខ្លួន ពីបទប្រព្រឹត្តភេរវកម្ម។
ចុះផ្សាយនៅថ្ងៃ៖ កែប្រែថ្ងៃទី៖
ការវាយប្រហារបានកើតឡើងនៅវេលាម៉ោង១១និង១៥នាទីម៉ោងនៅប្រទេសអង់គ្លេស នាថ្ងៃសុក្រទី ១១តុលានេះ នៅក្នុងមជ្ឈមណ្ឌលពាណិជ្ជកម្ម ដែលជំរុញឱ្យអាជ្ញាធរចាត់វិធានការការពារសន្តិសុខក្រុងយ៉ាងសន្ធឹកសន្ធាប់។ សាក្សីជាច្រើន បានរៀបរាប់ថា ជនដៃដល់ប្រដាប់ដោយកាំបិតនៅនឹងដៃ រត់សំដៅទៅចាក់ហ្វូងមនុស្សដោយគ្មានរើសមុខ បង្កឱ្យមានការភ័យស្លន់ស្លោយ៉ាងខ្លាំង។ បន្តិចក្រោយមក ភ្នាក់ងារសន្តិសុខផ្សារបានប្រកាសបិទផ្សារ ជម្លៀសភ្ញៀវទៅផ្នែកខាងក្រោយនៃហាងទំនិញ។ ជនដៃដល់ ត្រូវប៉ូលិសបានចាប់ខ្លួនបាន នៅក្រៅ ដោយផ្តួល ផ្អិបនឹងដី។ នេះបើតាមរូបភាពវីដេអូ ដែលមានបង្ហោះផ្សាយក្នុងប្រព័ន្ធសង្គម។
ហើយដោយយោលទៅលើទីតាំងនៃកន្លែងកើតហេតុ និងរបៀបនៃការវាយប្រហារ ប៉ូលិសអង់គ្លេសបានសម្រេចបើកអង្កេតជាបទភេរវកម្មភ្លាម។ នេះបើតាមសេចក្តីថ្លែងការណ៍របស់ប៉ូលិស ដែលក៏បានឃាត់ខ្លួននិងចាប់បញ្ជូនជនសង្ស័យទៅសួរចម្លើយ។
លោកនាយករដ្ឋមន្ត្រី បូរីស ចនស៊ុន បានបង្ហោះសារសម្តែងក្តីរន្ធត់ និងនឹកគិតដល់ជនរងគ្រោះទាំងឡាយ ព្រមទាំងសម្តែងអំណរគុណចំពោះភ្នាក់ងារសង្គ្រោះនិងអង្កេត។
សូមបញ្ជាក់ថាក្រុង Manchester នេះធ្លាប់រងការវាយប្រហារភេរវកម្ម កាលពីពីរឆ្នាំមុនម្តងហើយ។ នៅថ្ងៃទី ២២ឧសភា ឆ្នាំ២០១៧ ភេរវជនSalman Abedi បានបំផ្ទុះគ្រាប់បែកច្នៃ នៅមាត់ច្រកនៃសាលប្រគុំតន្ត្រី ដ៏ធំមួយរបស់ក្រុង។ ទីដែលតារាចម្រៀងអាមេរិកកំពុងទើបបញ្ចប់ការសម្តែង។ មនុស្ស២២នាក់បានស្លាប់ ក្នុងនោះ៧នាក់ជាកុមារ និង២៦០នាក់រងរបួស។ គណៈកម្មការអង្កេតសភាបានសន្និដ្ឋានថាភ្នាក់ងារចារកិច្ចអង់គ្លេសថ្លោះធ្លោយការងារទើបទប់ស្កាត់ភេរវកម្មជីហាតមិនបាន។ នៅឆ្នាំ១៩៩៦ មជ្ឈមណ្ឌលពាណិជ្ជកម្មដដែលនេះ ធ្លាប់រងភេរវកម្ម បំផ្ទុះរថយន្ត ពីសំណាក់ក្រុមប្រដាប់អាវុធអៀរឡង់ បង្កឱ្យមនុស្ស២១២នាក់រងរបួស និងការខូចខាតសម្ភារៈគិតជាទឹកប្រាក់ ៨៨០លានអឺរ៉ូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ