តួកគី-ស៊ីរី៖ក្រុមប្រឹក្សាសន្តិសុខកោះប្រជុំជាថ្មីតាមសំណើរបស់ក្រុមប្រទេសសមាជិកមកពីអឺរ៉ុប
នៅថ្ងៃពុធ ទី១៦ តុលានេះ ក្រុមប្រឹក្សាសន្តិសុខអង្គការសហប្រជាជាតិកោះប្រជុំជាថ្មីតាមសំណើរបស់ក្រុមប្រទេសសមាជិកមកពីអឺរ៉ុប គឺបែលហ្ស៊ិក អាល្លឺម៉ង់ បារាំង ប៉ូឡូញ និងប្រទេសអង់គ្លេស។ កម្មវត្ថុនៃកិច្ចប្រជុំជាថ្មីពេលនេះក៏ដូចជាកិច្ចប្រជុំលើកទី១ មិនបានសម្រេចកាលពីថ្ងៃព្រហស្បតិ៍ ទី១០ តុលាដែរ គឺស្វែងរកសេចក្តីសម្រេចមួយដើម្បីទាមទារឲ្យតួកគីបញ្ឈប់ការវាយប្រហារលើកម្លាំងគួឌីស្ថានស៊ីរីនៅប៉ែកខាងជើងស៊ីរីដែលបានផ្តើមតាំងពីថ្ងៃពុធ ទី៩ តុលា។ ទន្ទឹមនឹងការព្យាយាមដាក់សម្ពាធលើតួកគីដោយប្រើវេទិកាក្រុមប្រឹក្សាសន្តិសុខ ប្រទេសបស្ចិមលោកខ្លះក៏បានចាត់វិធានការដាច់ដោយឡែករបស់ខ្លួនដែរ។ ជាក់ស្តែង អាមេរិកប្រកាសដាក់ទណ្ឌកម្មសេដ្ឋកិច្ចដោយបង្កកទ្រព្យសម្បត្តិលើរដ្ឋមន្រ្តីតួកកី ៣នាក់ រួមទាំងដំឡើងពន្ធផលិផលដែកថែបតួកគីនាំចូលអាមេរិក។ ចំណែកសហភាពអឺរ៉ុបក៏អាចអនុម័តទណ្ឌកម្មសេដ្ឋកិច្ចស្រដៀងគ្នាដាក់តួកគីនៅក្នុងកិច្ចប្រជុំក្រុមប្រឹក្សាអឺរ៉ុបនាថ្ងៃព្រហស្បតិ៍ ទី១៧ និងថ្ងៃសុក្រ ទី១៨ តុលាខាងមុខដែរ។ តើទណ្ឌកម្មទាំងអស់នេះអាចធ្វើឲ្យប៉ះពាល់ដល់សេដ្ឋកិច្ចតួកគីកម្រិតណាដែរ និងថា តើវិធានការទាំងអស់នេះអាចធ្វើឲ្យតួកគីបារម្ភដែរ ឬទេ?។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៨
« ខណៈនេះ គេពិបាកនឹងវាយតម្លៃឲ្យបានប្រាកដប្រជាពីផលប៉ះពាល់ដល់សេដ្ឋកិច្ចតួកគីនៅក្នុងករណីណាដែលតួកគីអាចបង្វែរការនាំចេញមួយផ្នែករបស់ខ្លួនទៅកាន់ប្រទេសផ្សេងដែលមិនមានការអនុវត្តន៍រណាំងពន្ធគយនាំចូល។ អ្វីដែលនឹងអាចកើតមាននៅពេលខាងមុខដ៏ខ្លីនោះ គឺការដែលរដ្ឋាភិបាលតួកគីផ្តើមពិនិត្យមើលពីទំហំនៃការនាំទំនិញរបស់ខ្លួនទៅកាន់អាមេរិកដែលនឹងត្រូវរដ្ឋបាលអាមេរិកដំឡើងពន្ធ។
ទន្ទឹមគ្នានេះ រដ្ឋាភិបាលតួកគីក៏នឹងត្រូវពិនិត្យមើលផងដែរពីលក្ខខណ្ឌដែលខ្លួនអាចបង្វែរការនាំចេញទៅកាន់ប្រទេស ឬទៅកាន់តំបន់ភូមិសាស្រ្តផ្សេងទៀត ដូចជាប្រទេសចិនដែលមិនអនុវត្តន៍រណាំងពន្ធគយនាំចូលទេ។ លើសពីនេះទៅទៀតនៅក្នុងកិច្ចប្រជុំបន្ទាន់របស់ក្រុមប្រឹក្សាសន្តិសុខថ្មីៗនេះ រដ្ឋាភិបាលចិនថែមទាំងបានសម្រេចមិនធ្វើតាមការផ្តន្ទាទោសរបស់ប្រទេសសមាជិកផ្សេងឡើយ។
ដូច្នេះ ប្រទេសចិនអាចជាគោលដៅនាំចេញដ៏ប្រសើរសម្រាប់ប្រទេសតួកគី ពិសេសនៅពេលដែលសហភាពអឺរ៉ុបអាចនឹងអនុម័តទណ្ឌកម្មសេដ្ឋកិច្ច ឬរណាំងពន្ធគយដាក់លើតួកគីដែរនោះ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ