Unicef៖មានកូនក្មេងម្នាក់ក្នុងចំណោម ៣នាក់ជួបបញ្ហាកង្វះអាហារូបត្ថម្ភ
ចុះផ្សាយនៅថ្ងៃ៖
ស្តាប់ - ០៦:៣០
ថ្ងៃអង្គារ ទី១៥ តុលានេះ អង្គការ Unicef បានចេញផ្សាយរបាយការណ៍ប្រចាំឆ្នាំ ២០១៨ ស្តីពីស្ថានភាពសុខភាពកុមារក្នុងលោកដោយផ្តោតសំខាន់លើចំណីអាហារប្រចាំថ្ងៃរបស់ពួកគេ។ របាយការណ៍របស់ Unicef បានទាញសញ្ញាអាសន្នថា មានកុមារក្រោមអាយុ ៥ឆ្នាំម្នាក់ក្នុងចំណោម ៣នាក់លើលោកមិនបានទទួលអាហារដែលមានជីវជាតិ និងវីតាមីនគ្រប់គ្រាន់ដើម្បីការអភិវឌ្ឍន៍រាងកាយត្រឹមត្រូវរបស់ពួកគេ។ តាម Unicef កង្វះជីវជាតិ និងវីតាមីនក្នុងអាហារបានធ្វើឲ្យរាងកាយកុមារមានការវិវឌ្ឍន៍មិនត្រឹមត្រូវ។ ដើម្បីប្រយុទ្ធប្រឆាំងនឹងបញ្ហាមួយនេះ Unicef បានលើកទឹកចិត្តដល់រដ្ឋាភិបាលគ្រប់ប្រទេសឲ្យលើកកម្ពស់ និងធ្វើយ៉ាងណាឱ្យកុមារគ្រប់រូបអាចទទួលបានរបបអាហារដែលមានតុល្យភាព។
មានកត្តាសំខាន់ចំនួនពីរដែលបានធ្វើឲ្យកុមារភាគច្រើនក្នុងលោកជួបបញ្ហាកង្វះអាហារូបត្ថម្ភ។ កត្តាទី១ គឺភាពក្រីក្រដែលគ្មានអាហារគ្រប់គ្រាន់ដើម្បីឲ្យកុមារញ៉ាំតាមការឃ្លានរបស់ពួកគេ និងកត្តាទី២ គឺការមានអាហារគ្រប់គ្រាន់ដើម្បីញ៉ាំហើយ តែជាអាហារដែលគ្មានជីវជាតិ និងវីតាមីនគ្រប់គ្រាន់ដើម្បីការរីកលូតលាស់រាងកាយរបស់កុមារ។ អង្គការ Unicef បានផ្តោតខ្លាំងលើកត្តាទី២ ដោយកត់សម្គាល់ឃើញថា នៅក្នុងចំណោមកុមារដែលមានអាយុក្រោម ៥ឆ្នាំលើលោកចំនួន ៦៧៦លាននាក់ក្នុងឆ្នាំ ២០១៨ មានប្រមាណជា ២២៧លាននាក់ជាកុមារដែលមានរាងស្គមជ្រុល ឬមានទម្ងន់ច្រើនជ្រុល និងមានកុមារចំនួន ៣៤០លាននាក់កំពុងជួបបញ្ហាកង្វះជាតិវីតាមីនក្នុងខ្លួន។
អ្វីដែល Unicef ចង់និយាយនៅត្រង់ចំណុចនេះ គឺគុណភាពចំណីអាហារ ឬអាហារដែលមានជីវជាតិគ្រប់គ្រាន់ដើម្បីធ្វើឲ្យការអភិវឌ្ឍន៍រាងកាយរបស់កុមារមានដំណើរការត្រឹមត្រូវទៅតាមអាយុរបស់ពួកគេ។ នាយិកា Unicef លោកស្រី Henrietta Fore បានគូសបញ្ជាក់នៅក្នុងសេចក្តីប្រកាសព័ត៌មានថា អ្វីដែលសំខាន់មិនមែនការផ្តល់អាហារគ្រប់គ្រាន់ឲ្យកុមារញ៉ាំទេ តែគឺត្រូវផ្តល់អាហារដែលមានជីវជាតិគ្រប់មុខ។ អាហារដែលខ្វះជីវជាតិបានធ្វើឲ្យសុខភាព និងរាងកាយរបស់កូនក្មេងមានភាពមិនប្រក្រតី។ តាម Unicef មានកូនក្មេងចំនួន ១៤៩លាននាក់ក្នុងលោកមានមាឌតូចជ្រុលធៀបនឹងអាយុ និងមាន ៥០លាននាក់មានរាងស្គមខ្លាំងធៀបនឹងកម្ពស់។
ទន្ទឹមគ្នានេះ Unicef ក៏បានលើកឡើងពីករណីកូនក្មេងចំនួន ៣៤០លាននាក់ដែលទទួលបានអាហារដែលមានកាឡូរីគ្រប់គ្រាន់ តែខ្វះវីតាមីនចាំបាច់មួយចំនួន ដូចយ៉ាងជាតិដែក អ៊ីយ៉ូដ វីតាមីន A ឬវីតាមីន C ជាដើម។ កង្វះជាតិវីតាមីននឹងអាចធ្វើឲ្យកុមារមានបញ្ហាភ្នែកមើលមិនសូវច្បាស់ និងត្រចៀកស្តាប់មិនសូវឮ។
មីកញ្ចប់ជាអាហារអាក្រក់សម្រាប់កុមារ
Fast-food និងអាហារងាយស្រួល ធ្វើរួចស្រាប់ៗដាក់ក្នុងកំប៉ុង ក្នុងប្រអប់ ឬក្នុងកញ្ចប់ ដូចជាមីកញ្ចប់។ តាម Unicef ប្រភេទអាហារទាំងអស់នេះសម្បូរកាឡូរីណាស់ តែខ្វះជីវជាតិ។ ប្រភេទអាហារទាំងអស់នេះបានធ្វើឲ្យកុមារចំនួន ៤០លាននាក់លើលោកក្នុងឆ្នាំ ២០១៨ មានទម្ងន់លើសខ្លាំង និងធាត់ចុកខ្លាញ់ មានទាំងកុមាររស់នៅក្នុងប្រទេសក្រីក្រផង។ ក្នុងទសវត្ស ៩០ ក្រុមប្រទេសដែលប្រជាជនមានប្រាក់ចំណូលតិចមិនដែលស្គាល់ករណីកុមារធាត់ចុកខ្លាញ់ និងកុមារមានទម្ងន់លើសខ្លាំងទេ។ តែសម័យបច្ចុប្បន្ន ករណីនេះបានកើតមាននៅសឹងគ្រប់ប្រទេសទាំងអស់ មិនថាប្រទេសអ្នកមាន ប្រទេសកំពុងមានសេដ្ឋកិច្ចរីកលូតលាស់ខ្លាំង ឬប្រទេសកំពុងអភិវឌ្ឍ។
មីកញ្ចប់ត្រូវបានក្រុមអ្នកជំនាញចាត់ទុកជាអាហារអាក្រក់សម្រាប់កូនក្មេងដែលគេមិនគួរឲ្យកុមារញ៉ាំជាអាហារប្រចាំថ្ងៃទេ។ តាមក្រុមអ្នកជំនាញ មីកញ្ចប់បានធ្វើកូនក្មេងរាប់លាននាក់នៅអាស៊ីអាគ្នេយ៍មានទម្ងន់លើសជ្រុល ឬស្គមខ្លាំងជ្រុល។ ហ្វីលីពីន ឥណ្ឌូណេស៊ី និងម៉ាឡេស៊ីដែលសុទ្ធសឹងជាប្រទេសមានកម្រិតជីវភាពខ្ពស់ តែបែរជាមានកូនក្មេងដល់ទៅ ៤០% កំពុងជួបបញ្ហាកង្វះអាហារួបត្ថម្ភទៅវិញ នេះបើតាមរបាយការណ៍របស់ Unicef។ តាម Unicef ឳពុក ម្តាយនៅហ្វីលីពីន ឥណ្ឌូណេស៊ី និងម៉ាឡេស៊ីគិតថា ចំអែតក្រពះកូនៗជារឿងសំខាន់ តែមិនបានគិតថា តើអាហារនោះមានជីវជាតិ និងវីតាមីនគ្រប់គ្រាន់ដើម្បីការលូតលាស់ និងភាពឆ្លាតវៃរបស់កូនៗឬអត់ទេ។
អាហារដែលងាយស្រួលធ្វើ រហ័ស និងមានតម្លៃថោក គឺមីកញ្ចប់។ តែមីកញ្ចប់សម្បូរជាតិខ្លាញ់ និងអំបិល។ ឥណ្ឌូណេស៊ីជាប្រទេសដែលប្រើមីកញ្ចប់ច្រើនលំដាប់ទី២ បន្ទាប់ពីប្រទេសចិន។ ក្នុងឆ្នាំ ២០១៨ ពលរដ្ឋឥណ្ឌូណេស៊ីបរិភោគមីកញ្ចប់ចំនួន ១២ ៥០០លានកញ្ចប់។ សូម្បីតែប្រទេសឥណ្ឌា និងជប៉ុនរួមបញ្ចូលគ្នាក៏មិនស្មើនឹងឥណ្ឌូណេស៊ីតែម្នាក់ឯងផង។
Unicef បានជំរុញរដ្ឋាភិបាលគ្រប់ប្រទេសឲ្យយកចិត្តទុកដាក់លើអាហារសម្រាប់កុមារ
ប្រភេទអាហារដែលមានជីវជាតិ និងវីតាមីនគ្រប់គ្រាន់ជាអាហារដែលមានតាំងពីបន្លៃរហូតដល់សាច់។ តែគេត្រូវការពេលវេលាដើម្បីរៀបចំចំអិនវាឲ្យបានត្រឹមត្រឹម។ គេបានសង្កេតឃើញជាទូទៅថានៅក្នុងសម័យសកលភាវូបនីយកម្មបច្ចុប្បន្ន និងការធ្វើការងាររបស់ឳពុក ម្តាយខ្លះ Fast-food និងម្ហូបអាហារធ្វើស្រាប់ៗ ពិសេសមីកញ្ចប់ជាអាហាររហ័សទាន់ចិត្ត និងជាការចូលចិត្តរបស់កូនៗផង។ អនុសាសន៍របស់អង្គការ Unicef នៅក្នុងបញ្ហានេះ គឺការជំរុញរដ្ឋាភិបាលគ្រប់ប្រទេសឲ្យយកចិត្តទុកដាក់ចំពោះអាហារសម្រាប់កុមារ។ ទន្ទឹមគ្នានេះ Unicef ក៏បានអំពាវនាវឲ្យមានការបិទលើកំប៉ុង ប្រអប់ ឬកញ្ចប់ម្ហូបអាហារនូវព័ត៌មានស្តីពីជីវជាតិ និងវីតាមីន។
ការធ្វើរបៀបនេះ គឺដើម្បីឲ្យឳពុក ម្តាយងាយស្រួលក្នុងការជ្រើសរើសអាហារដើម្បីសុខភាពល្អសម្រាប់កូនៗរបស់ពួកគេ។ បន្ថែមពីនេះ Unicef ក៏បានអំពាវនាវឲ្យបញ្ឈប់ការផ្សាយពាណិជ្ជកម្មណាដែលអាចប៉ះពាល់ដល់សុខភាពកុមារ ពិសេសភេសជ្ជៈដែលមានជាតិស្ករច្រើន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ