Brexit៖លោកបូរីស ចនសុនអំពាវនាវឲ្យសភាអង់គ្លេសបោះឆ្នោតទទួលយកកិច្ចព្រមព្រៀងថ្មីជាមួយអឺរ៉ុប
នៅថ្ងៃព្រហស្បតិ៍ ទី១៧ តុលា កិច្ចព្រមព្រៀងថ្មីស្តីពី Brexit ត្រូវបានរកឃើញរវាងសហភាពអឺរ៉ុប និងប្រទេសអង់គ្លេស។ ភាគីនីមួយៗបានសម្តែងការពេញចិត្តចំពោះកិច្ចព្រមព្រៀងថ្មីដែលបានឆ្លើយតបនឹងឆន្ទៈ និងកម្មវត្ថុដែលភាគីនីមួយៗចង់បាន។ ប្រធានាធិបតីបារាំងលោកម៉ាក្រុងបានចាត់ទុកជាដំណឹងមួយណាស់ល្អ តែហាក់នៅមានការប្រយ័ត្នប្រយែងដោយរង់ចាំឲ្យមានការអនុម័តជាផ្លូវការពីសភាអង់គ្លេសសិន។ ការលើកឡើងយ៉ាងដូចនេះដោយលោកម៉ាក្រុងបានរម្លឹកពីមេរៀនជូរចត់របស់អតីតនាយករដ្ឋមន្រ្តីអង់គ្លេសលោកស្រីតេរ៉េហ្សា មេដែលត្រូវបានសភាអង់គ្លេសបានបោះឆ្នោតច្រានចោលកិច្ចព្រមព្រៀងរបស់លោកស្រីដល់ទៅ ៣ដង។ នៅទីបំផុតកាលណោះ លោកស្រីក៏បានសម្រេចចុះចេញពីតំណែងដោយខ្លួនឯង។ ក្រៅពីភាពសប្បាយរីករាយ និងធូរស្រាលរបស់អឺរ៉ុប នាយករដ្ឋមន្រ្តីអង់គ្លេសលោកបូរីស ចនសុនក៏បានសម្តែងការពេញចិត្តចំពោះកិច្ចព្រមព្រៀងថ្មីពេលនេះដែរ។ តាមលោកចនសុន កិច្ចព្រមព្រៀងថ្មីនេះជាសក្ខីកម្មមួយដែលបញ្ជាក់ថា អង់គ្លេសអាចរកបាន Brexit ពិតប្រាកដមួយដែលឆ្លើយតបនឹងកម្មវត្ថុរបស់អង់គ្លេស។ ទន្ទឹមគ្នានេះ លោកចនសុនក៏បានអំពាវនាវដល់សមាជិកសភាអង់គ្លេសទាំងអស់ឲ្យអនុម័តលើកិច្ចព្រមព្រៀងថ្មីនេះឲ្យបានមុនថ្ងៃទី៣១ តុលា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៤
« ពិតណាស់សម្រាប់យើងនៅអង់គ្លេស កិច្ចព្រមព្រៀមថ្មីមួយនេះមានន័យយ៉ាងច្បាស់ថា យើងអាចឈានទៅសម្រេចបាន Brexit ពិតប្រាកដដែលឆ្លើយតបនឹងកម្មវត្ថុរបស់យើង។ កិច្ចព្រមព្រៀងថ្មីមួយនេះក៏បញ្ជាក់ដែរថា អង់គ្លេសចាកចេញ និងចាកចេញដូចដែលបានគ្រោងទុកនៅថ្ងៃទី៣១ តុលា។ ហើយកិច្ចព្រមព្រៀងថ្មីដដែលមួយនេះក៏ជាសក្ខីកម្មដែលបញ្ជាក់ផងដែរថា យើងទាំងអស់គ្នាក្នុងនាមជាអង់គ្លេសអាចសម្រេចរួមគ្នានូវជោគវាសនាអនាគតរបស់យើង។
សេចក្តីសម្រេចទាំងអស់នេះនឹងត្រូវសម្រេចនៅក្នុងប្រទេសអង់គ្លេស និងដោយក្រុមអ្នកតំណាងរាស្រ្តអង់គ្លេស។ ទាក់ទងនឹងអ្នកតំណាងរាស្រ្តអង់គ្លេស ខ្ញុំសង្ឃឹម និងមានជំនឿថា ក្រុមអ្នកតំណាងរាស្រ្តក្នុងគណបក្សរបស់ខ្ញុំនៅ Westminster នឹងរួមកម្លាំងគ្នាដើម្បីជួយឲ្យកិច្ចព្រមព្រៀងថ្មីស្តីពី Brexit ទទួលបានជោគជ័យ និងដើម្បីធានាថា កិច្ចព្រមព្រៀងដ៏ប្រសើរមួយនេះមានដំណើរទៅមុខដោយរលូនដោយគ្មានយឺតពេល និងគ្មានការលើកពេល Brexit ទៀតឡើយ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ