សហភាពអឺរ៉ុប៖លោកអេម៉ានុយអែល ម៉ាក្រុងជំទាស់នឹងការពង្រីកបន្ថែមសមាជិកថ្មីនៅក្នុងសហភាពអឺរ់ុប
ថ្ងៃសុក្រ ទី១៨ តុលាជាថ្ងៃទី២ និងជាថ្ងៃចុងក្រោយនៃជំនួបកំពូលអឺរ៉ុប។ ក្រៅពីបានអនុម័តជាផ្លូវការលើកិច្ចព្រមព្រៀងថ្មីស្តីពី Brexit ជាមួយប្រទេសអង់គ្លេស ជំនួបកំពូលអឺរ៉ុបបានលើកយកសំណុំរឿងផ្សេងទៀតទៅនិយាយ ដូចជាប្រតិបត្តិការសឹករបស់តួកគីទៅលើកម្លាំងប្រដាប់អាវុធគួដឌីស្ថានស៊ីរីនៅប៉ែកខាងជើងស៊ីរី ឬមួយក៏នយោបាយផ្ទៃក្នុងអឺរ៉ុបដែលផ្តោតលើការពង្រីកសមាជិកបន្ថែមជាដើម។ ថ្លែងនៅក្រោយជំនួបកំពូល ប្រធានាធិបតីបារាំងលោកម៉ាក្រុងបានចាត់ទុកអន្តរាគមន៍ទាហានតួកគីនៅប៉ែកខាងជើងស៊ីរីថាជាកំហុសរបស់បស្ចិមលោក និងអង្គការអូតង់។ តាមលោកម៉ាក្រុង សំណុំរឿងមួយនេះនឹងលើកទៅជជែកនាប៉ុន្មានសប្តាហ៍ខាងមុខជាលក្ខណៈ ៤ភាគីរវាងបារាំង តួកគី អាល្លឺម៉ង់ និងអង់គ្លេស និងប្រហែលជារៀបចំក្នុងទីក្រុងឡុងដ៏។ ទាក់ទងនឹង Brexit ត្រូវបានលោកម៉ាក្រុងបញ្ជាក់ច្បាស់ៗថា លោកប្រឆាំងដាច់ខាតនឹងការពន្យារពេលចាកចេញបន្ថែមឲ្យអង់គ្លេសនៅក្រោយថ្ងៃទី៣១ តុលា។ ចំណែកសំណុំរឿងចង់បន្ថែមប្រទេសម៉ាសេដ្វានខាងជើង និងអាល់បានីជាសមាជិកថ្មីអឺរ៉ុបត្រូវបានបារាំង ហូឡង់ និងដាណឺម៉ាកបដិសេធ។ លោកម៉ាក្រុងបានយល់ឃើញថា ការពង្រីកសមាជិកអឺរ៉ុបបន្ថែមមិនច្បាស់ធ្វើឲ្យអឺរ៉ុបមានដំណើរការដោយរលូន និងមានប្រសិទ្ធិភាពទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៧
« អឺរ៉ុបនៅមិនទាន់បានធ្វើកិច្ចការទាំងអស់របស់ខ្លួនដោយជោគជ័យនៅឡើយទេ ជាក់ស្តែងនៅក្នុងសំណុំរឿងអន្តោប្រវេសន៍ និងការគោរពឲ្យបានត្រឹមត្រូវនូវច្បាប់ទាំងអស់របស់អឺរ៉ុប។ តែអ្វីដែលខ្ញុំបានចាប់អារម្មណ៍ស៊ីជម្រៅជាងគេ យើងជាមហាអំណាចតែមួយនៅក្នុងលោកដែលចាត់ទុកថា នយោបាយនៃទំនាក់ទំនងជាមួយអ្នកជិតខាង គឺការស្នើអ្នកជិតខាងទាំងអស់ឲ្យចូលរួមនៅក្នុងសហគមន៍តែមួយ។
យើងបានដឹងច្បាស់ថា នយោបាយមួយនេះមានដក់ជាប់នៅក្នុងស្មារតីរួមរបស់អឺរ៉ុប។ ពិតជាចម្លែកខ្លាំងណាស់។ បើមានដំណើរការមិនរលូនជាមួយនឹងសមាជិក ២៨ប្រទេស ហើយបើមានដំណើរការមិនល្អជាមួយនឹងសមាជិក ២៧ប្រទេសនោះ ខ្ញុំមិនជឿជាក់ថាវានឹងមានដំណើរការដោយរលូននៅពេលអឺរ៉ុបបន្ថែមសមាជិកថ្មី។
ដូច្នេះខ្ញុំសុំនិយាយម្តងទៀត មុននឹងអឺរ៉ុបបន្ថែមសមាជិកថ្មី។ យើងត្រូវចេះធ្វើកំណែទម្រង់ដោយខ្លួនឯង។ ចំពោះខ្ញុំ អឺរ៉ុបនេះនឹងក្លាយទៅជាសហភាពមួយដែលល្អមើលតែពីខាងក្រៅ ជាមួយនឹងទីផ្សាររួមមួយ និងធ្វើការមិនសូវចុះសម្រុងគ្នា។ នេះហើយជាចក្ខុវិស័យមួយដែលកំពុងទាញអឺរ៉ុបពេលនេះ។ គឺជាកំហុសឆ្គងមួយ។
យើងស្ថិតក្នុងពិភពលោកមួយដែលពោរពេញដោយការប្រកួតប្រជែងដែលយើងត្រូវការបន្ថែមនូវសមាហរណកម្ម ភាពច្បាស់លាស់នៅក្នុងជម្រើសរបស់យើង និងត្រូវមានឥទ្ធិពលខាងភូមិសាស្រ្តនយោបាយ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ