តួកគីប្រកាសចាប់បញ្ជូនទាហានជីហាតបរទេសឲ្យទៅទទួលទោស នៅប្រទេសកំណើត
រដ្ឋាភិបាលតួកគីនឹងចាប់បញ្ជូនទាហានជីហាតបរទេស ទៅប្រទេសកំណើតរបស់ពួកគេវិញ ចាប់ពីថ្ងៃចន្ទ ដើមសប្តាហ៍ក្រោយ។ នៅថ្ងៃសុក្រម្សិលមិញ រដ្ឋមន្រ្តីការមហាផ្ទៃតួកគីបានប្រកាសថា តួកគីនឹងចាប់បញ្ជូន អ្នកទោសជីហាតបរទេស ដែលកំពុងស្ថិតនៅក្នុងពន្ធនាគារតួកគី សព្វថ្ងៃនេះ ឲ្យទៅទទួលទោស នៅប្រទេសកំណើតរបស់ពួកគេវិញ នោះបើទោះបីជាពួកគេត្រូវប្រទេសកំណើត ដកសញ្ជាតិ ឬ មិនចង់ទទួលយកពួកគេវិញ ក៏ដោយ។
ចុះផ្សាយនៅថ្ងៃ៖ កែប្រែថ្ងៃទី៖
តួកគី នឹងចាប់បញ្ជូនទាហានបរទេសរបស់ក្រុមជីហាតអង្គការរដ្ឋអ៊ីស្លាម ទៅប្រទេសកំណើតរបស់ពួកគេ ចាប់ពីថ្ងៃចន្ទសប្តាហ៍ក្រោយ។ តាមរដ្ឋមន្រ្តីក្រសួងមហាផ្ទៃ តួកគី មានអ្នកទោសដែលជាទាហានបរទេសរបស់ក្រុមជីហាតអង្គការរដ្ឋអ៊ីស្លាម ចំនួន ១២០០នាក់ កំពុងជាប់ក្នុងពន្ធានាគារតួកគី។ តួកគីទើបចាប់បានបន្ថែម ទាហានជីហាត បរទេស ២៨៧នាក់ផ្សេងទៀត ដែលបានលួចរត់ពីគុក ក្នុងតំបន់គ្រប់គ្រងរបស់កងកម្លាំងគួដឌីស្ថាន នៅភាគខាងជើងស៊ីរី។
ប្រធានាធិបតី តួកគី លោករេស៊ីប អ៊ែរដូហ្កាន នៅថ្ងៃសុក្រម្សិលមិញបានអះអាងថា កន្លងមក តួកគីធ្លាប់បានចាប់បញ្ជូន ទាហានជីហាតបរទេសជាង ៧៦០០នាក់ទៅប្រទេសកំណើតវិញ ក្នុងពេលទាហានជីហាត បរទេស ១២០០នាក់ កំពុងស្ថិតក្នុងពន្ធានាគារតួកគី។
ប៉ុន្មានថ្ងៃមកហើយ រដ្ឋមន្រ្តីក្រសួងមហាផ្ទៃតួកគីបាននិយាយដដែលៗថា នឹងចាប់បញ្ជូនទាហានជីហាតបរទេស ទៅប្រទេសដើមរបស់ពួកគេវិញ នោះបើទោះបីជាពួកទាហានជីហាតទាំងនោះ ត្រូវរដ្ឋាភិបាលប្រទេសដើម ដកសញ្ជាតិ ឬមិនចង់ទទួលយកវិញក្តី។ រដ្ឋមន្រ្តីក្រសួងមហាផ្ទៃមិនបាននិយាយបញ្ជាក់ឈ្មោះប្រទេស ដែលត្រូវទទួលទាហានជីហាត បរទេស។ នៅក្នុងសុន្ទរកថាកាលពីថ្ងៃសុក្រ លោកគ្រាន់តែនិយាយដល់ប្រទេសអឺរ៉ុបតែប៉ុណ្ណោះ។ ទៅតាមអនុសញ្ញាក្រុងញូវយ៉ក ឆ្នាំ ១៩៦១ ការដកសញ្ជាតិ ធ្វើឲ្យមនុស្សម្នាក់គ្មានប្រទេស ជ្រកកោន គឺជារឿងខុសច្បាប់។
ប៉ុន្តែ អង់គ្លេស ជាដើមដែលបដិសេធមិនផ្តល់សច្ចាប័ន ដល់អនុសញ្ញាក្រុងញូវយ៉ក បានសម្រេច ដកសញ្ជាតិពីជនជាតិរបស់ខ្លួន ជាង ១០០នាក់ ដែលបានចេញទៅប្រយុទ្ធក្នុងជួរកងទ័ពជីហាត នៅប្រទេសស៊ីរី និងអ៊ីរ៉ាក់។
កន្លងមក តួកគីធ្លាប់បានរិះគន់ បណ្តាប្រទេសនៅអឺរ៉ុប ដែលបដិសេធ មិនចង់ទទួលយកទាហានជីហាត ដែលជាជនជាតិរបស់ខ្លួន ដោយសារកង្វះយន្តការច្បាប់ ភស្តុតាង សម្រាប់ ដាក់បន្ទុក ហើយនិងដោយសារបារម្ភខ្លាចក្រែងពួកទាហានជីហាតទាំងនោះ វាយប្រហារភេរវកម្ម នៅក្នុងប្រទេស នៅពេលពួកគេត្រលប់ចូលទៅប្រទេស និងអាចរស់នៅ រួចផុតពីសំណាញ់ច្បាប់។
ធ្លាប់រងការរិះគន់ថា បានធូររលុង បណ្តែតបណ្តោយឲ្យជនបរទេសឆ្លងកាត់ព្រំដែនរបស់ខ្លួនទៅប្រយុទ្ធក្នុងទឹកដីស៊ីរី និងអ៊ីរ៉ាក់ តួកគីបានចូលរួមក្នុងប្រតិបត្តិការរបស់សម្ព័ន្ធអន្តរជាតិ ប្រយុទ្ធប្រឆាំងនឹងក្រុមជីហាតអង្គការរដ្ឋអ៊ីស្លាម នៅក្រោយ រងការប្រហារភេរវកម្ម ផ្ទួនៗគ្នា នៅឆ្នាំ ២០១៥។ ប៉ុន្តែ ទីក្រុងអង់ការ៉ាបានរងការរិះគន់ម្តងទៀត ជាពិសេសពីអឺរ៉ុប នៅក្រោយកងទ័ពតួកគីបើកការវាយប្រហារទៅលើក្រុមទាហានគួដឌីស្ថាន ដែលជាសម្ព័ន្ធមិត្ត របស់ប្រទេសលោកខាងលិច និងជាអ្នកចាប់ដាក់ឃុំ ពួកទាហានជីហាតបរទេស។ តើតួកគីកំពុងសងសឹក អឺរ៉ុបឬយ៉ាងណា? តួកគីសម្រេចដាច់អហង្កា ចាប់បញ្ជូន អ្នកទោសជីហាតបរទេស ទៅឲ្យប្រទេសដើម នៅអឺរ៉ុប ទោះបីជាអឺរ៉ុប ប្រកែកមិនចង់បាន។ តួកគីបានប្រកាសចាប់បញ្ជូនទាហានជីហាតបរទេសទៅប្រទេសដើម នៅទឹកដីអឺរ៉ុបវិញ នៅប៉ុន្មានសប្តាហ៍ដែលប្រធានាធិបតីតួកគីនឹងបើកជំនួបកំពូលជាមួយមេដឹកនាំបារាំង អាល្លឺម៉ង់ និងអង់គ្លេស នៅក្រៅជំនួបកំពូលអូតង់ នៅទីក្រុងឡុងដ៍ ដើម្បីនិយាយពីបញ្ហាស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ