ស្តាប់ ថតទុក Podcast
  • 00h00 - 01h00 GMT
    កម្មវិធីព័ត៌មាន 10/12 00h00 GMT
  • 06h00 - 07h00 GMT
    កម្មវិធីព័ត៌មាន 10/12 06h00 GMT
  • 12h00 - 13h00 GMT
    កម្មវិធីព័ត៌មាន 10/12 12h00 GMT
អឺរ៉ុប

បារាំង បាក់ស្ពានស្លាប់ម្នាក់ រដ្ឋាភិបាលបើកអង្កេត

media ស្ពាន​Mirepoix-sur-Tarn ក្បែរ​ក្រុង​ Toulouse បាក់​នៅ​ថ្ងៃទី ១៨ វិច្ឆិកា ២០១៩ វេលា​ម៉ោង​៨ព្រឹក ERIC CABANIS / AFP

មាន​ស្លាប់​យ៉ាង​ហោច​ណាស់​ម្នាក់ និង​បាត់​ខ្លួន​ម្នាក់ នៅក្នុង​ហេតុការណ៍​បាក់​ស្ពានមួយ នៅភាគខាង​ត្បូង​ប្រទេស​បារាំង កាលពី​ព្រឹក​ថ្ងៃចន្ទ។ រដ្ឋាភិបាល​ បាន​ប្រកាស នៅពេល​រសៀល​ ថា​​នឹង​បើក​អង្កេត​ភ្លាម​ តែ​សម្រាប់​គិត​មក​ទល់​នឹង​ពេល​នេះ​គេ​នៅ​មិន​ទាន់​ដឹង​អំពី​មូលហេតុ​​ច្បាស់​លាស់​នៃ​គ្រោះ​ថ្នាក់បាក់​ស្ពាន​ទេ។ គ្រោះថ្នាក់​បាន​ធ្វើ​ឱ្យ​មតិ​សាធារណៈ​ចោទ​សួរ​យ៉ាង​ខ្លាំង​អំពី​សុវត្ថិភាព​នៃ​ស្ពាន​ទាំង​ឡាយ​នៅ​ទូទាំង​ប្រទេស​បារាំង។

បើ​តាម​រដ្ឋ​អាជ្ញារខេត្ត​ទូលូ​ សាកសព​ជន​រងគ្រោះ​បាត់​បង់​ជីវិត​​​អាយុ​១៥​ឆ្នាំ ស្រង់​ចេញ​ពី​ទឹក​បាន​ភ្លាម ចំណែក​អ្នក​ជាម្តាយ​ក៏​បាន​សង្គ្រោះ​ចេញ​ពី​រថយន្ត​ទាន់​ពេល​វេលា ដោយ​សាក្សី​។ ជា​សរុប​មាន​មនុស្ស​៦​នាក់​ផ្សេង​ទៀត​បាន​រងរបួស ក្នុង​ម្នាក់​ជា​របួស​ធ្ងន់​ និង​មាន​យ៉ាង​ហោច​ណាស់អ្នក​បើក​បរ​ឡាន​កាមីញ៉ុក​​ម្នាក់​បាន​បាត់​ខ្លួន។

គេ​ពុំ​ដឹង​ទេ​ថា​តើ​មាន​មនុស្ស​ប៉ុន្មាន​នាក់​ដែល​ស្ថិត​នៅលើ​ស្ពាន​ពេល​កំពុងកើត​ហេតុ​​ទេ​។ ​ក្រុម​អ្នក​សង្គ្រោះ បាន​អះអាង​ថា​ មាន​រថយន្ត​ពីរគ្រឿង បាន​ធ្លាក់​ចូល​ទឹក ក្នុង​នោះ​មួយ​គ្រឿង​ជា​រថយន្ត​ធុន​ធ្ងន់ សម្រាប់​ដឹក​គ្រឿង​ចក្រ​ធ្ងន់ៗ តែ​សាក្សី​ថា​មាន​ឡាន​បី​។ រថយន្តទី​បី​ដែល​ទំនង​ជា​កូន​ឡាន​ទ្រុង។ នេះ​បើ​តាមសេចក្តីជូន​ដំណឹង​បឋម​របស់​រដ្ឋ​អាជ្ញារ​ដដែល។

មាន​ប្រវែង​១៥០​ម៉ែត្រ​ ស្ពាន​ដែល​បាក់លិច​បាត់​ក្នុង​ទឹក​ស្ទឹង សល់​តែ​ខ្សែ​យោង មាន​សមត្ថភាព​​​អាច​ទទួល​ឱ្យ​រថយន្ត​ត្រឹម​ទម្ងន់យ៉ាង​ច្រើន​បំផុត​១៩​តោន​ បើក​​ឆ្លង​កាត់​។ ធ្វើ​ពី​​ដែក​ និង​មាន​អ្នក​ថ្មើរ​ជើង​ដើរ​ឆ្លងទៅ​ឆ្លង​មក​យ៉ាងច្រើន ស្ពាន​មាន​វ័យ​ចំណាស់ខ្លាំង​ ​ដោយ​​សាង​សង់ឡើង​តាំង​ពី​​​ឆ្នាំ​១៩៣៥​​។ ទើប​ជួសជុល​ជា​ថ្មី​នៅ​ឆ្នាំ​២០០៣ ស្ពាន​ទើប​ឆ្លង​កាត់​ការ​​ត្រួត​ពិនិត្យ​សុវត្ថិភាពប្រកប​ដោយ​ជោគជ័យ​​កាលពី​ឆ្នាំ​២០១៧ ដោយ​គ្មាន​ចំណុច​ខុស​ប្រក្រតី​អ្វី​សោះ។ ស្ពាន​នេះ​ពុំ​ស្ថិត​ក្នុង​ចំណោម​ក្រុម​ស្ពាន​ទ្រុឌទ្រោម​ ដែល​ទាមទារ​ឱ្យ​មាន​ការ​តាមដាន​ជា​ពិសេស​អ្វីឡើយ។ ប៉ុន្តែទោះ​ជា​យ៉ា​ង​ដូច្នេះ​ក្តី ក៏​រដ្ឋាភិបាល​បាន​ប្រកាស​បើក​អង្កេត​ភ្លាម​ ដើម្បី​កំណត់​រក​មូលហេតុ​នៃ​គ្រោះ​ថ្នាក់។

សូម​បញ្ជាក់​ថា នៅ​ឆ្នាំ​២០១៨ ក្រោយ​ហេតុការណ៍​បាក់ស្ពាន​នៅក្រុងGene​ ប្រទេស​អ៊ីតាលី​ ដែល​មាន​មនុស្ស​៤៣​នាក់​បាន​បង់​ជីវិត ព្រឹទ្ធសភា​បារាំង​បាន​​បង្កើត​គណៈកម្មការ​​ប្រមូល​ព័ត៌មាន​ស្តី​ពី​សុវត្ថិភាព​ស្ពាន​​របស់​បារាំង​។ ​លទ្ធផល​នៃ​ការ​អង្កេតរយៈ​ពេល​១០​ខែ បាន​បង្ហាញ​ថា មាន​ស្ពាន​ជាង​២៥០០០​ ស្ថិត​ក្នុង​​ស្ថានភាព​មិន​ល្អ៕​

 
សូមអភ័យទោស យើងមិនអាច​ភ្ជាប់​ទៅ​ទំព័រ​ដែល​លោកអ្នក​ស្នើសុំ​បានទេ