អង់គ្លេស ៖ លោក ចនសុន បង្ហាញផែនការនយោបាយថ្មី Brexitជាអាទិភាពចំបង
សម្រេចBrexit ឱ្យបានជាមុន បន្ទាប់មកអង់គ្លេសនឹងបើកទំព័រថ្មី បញ្ចប់នយោបាយរឹតត្បិតថវិកា។ នេះជាផែនការដឹកនាំប្រទេស ដែលនាយករដ្ឋមន្ត្រី បូរីស ចនសុន ទើបបង្ហើបបង្ហាញនៅថ្ងៃអាទិត្យទី ២៤វិច្ឆកា ប្រសិនបើលោកបានទទួលជោគជ័យនៅក្នុងសម័យបោះឆ្នោតសភាថ្ងៃទី ១២ធ្នូ ខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
សម្រាប់លោក បូរីស ចនសុន ការបោះឆ្នោតសភាថ្ងៃទី ១២ធ្នូ២០១៩ ជាមធ្យោបាយតែមួយគត់ដែលនឹងនាំអង់គ្លេសឱ្យចេញផុតពីភាពទ័លច្រកBrexit ដែលបានធ្វើឱ្យអង់គ្លេសប្រេះឆាតាំងពីសម័យបោះឆ្នោតប្រជាមតិឆ្នាំ២០១៦មក។
ដើម្បីបញ្ចុះបញ្ចូលពលរដ្ឋឱ្យគាំទ្រ លោកសនចុន បានសន្យាថាប្រសិនបើលោកជាប់ឆ្នោតជាថ្មី គម្រោងកិច្ចព្រមព្រៀងBrexit ដែលលោកសម្រេចបានជាមួយសហភាពអឺរ៉ុប នឹងបញ្ចូនទៅឱ្យសភាអនុម័ត នៅមួយខែក្រោយ ដើម្បីឱ្យអង់គ្លេសបានបំបែកខ្លួនចេញពីអឺរ៉ុបនៅចុងខែមករា។ សមាជិកសភាថ្មីដែលនឹងចូលកាន់អាសនៈ ជាផ្លូវការជាលើកដំបូងសម្រាប់អាណត្តិថ្មី នៅថ្ងៃទី ១៧ធ្នូ មានពេលវេលាគ្រប់គ្រាន់នឹងសិក្សាអំពីគម្រោងច្បាប់Brexit ដែលមិនត្រូវអនុម័តមុនណូអែលឡើយ។ ធ្វើយ៉ាងដូច្នេះ ក្រុមគ្រួសារអង់គ្លេស អាចរៀបចំអបអរពិធីបុណ្យគ្រីស្មាក់ និងបុណ្យឆ្លងឆ្នាំ ដោយមិនខ្វល់ខ្វាយពីរឿងនយោបាយBrexit ទៀត។
កម្មវិធីនយោបាយរបស់អនាគតរដ្ឋាភិបាលលោក ចនសុន គឺត្រូវសម្រេច Brexit ឱ្យបានជាមុន ដើម្បីជាបើកផ្លូវរុញឱ្យប្រទេសឱ្យដើរទៅមុខ និងបញ្ចេញសក្តានុពលជាតិបានពេញផ្ទៃប្រទេស។ រដ្ឋាភិបាលអភិរក្ស គិតគូរដល់ប្រជាពលរដ្ឋ ដោយលោកចនសុនសន្យាមិនដំឡើងពន្ធលើប្រាក់ចំណូល មិនដំឡើងថ្លៃធានារ៉ាប់ជាតិ និងពន្ធលើតម្លៃបន្ថែមទេ។
គណបក្សអភិរក្សអង់គ្លេស ដែលឡើងប្រជាប្រិយភាពតាំងពីលោកបូរីសចនសុនក្លាយជានាយករដ្ឋមន្ត្រីមក កំពុងនាំមុខខ្លាំង ឈ្នះគណបក្សប្រឆាំង។ បរិបទនយោបាយហាក់ផ្តល់អំណោយផលដល់លោកចនសុន ព្រោះគណបក្សប្រឆាំងអឺរ៉ុបមួយទៀតដែលជាប់ចោទថាអ្នកបំបែកសំឡេងអ្នកគាំទ្រBrexit មិនឈរឈ្មោះនៅក្នុងការបោះឆ្នោតសភានេះទេ។ ប៉ុន្តែ គ្មានអ្វីជាក់លាក់ទេ។ អ្នកវិភាគបានអំពាវនាវឱ្យមានការប្រុងប្រយ័ត្ន។ គណបក្សប្រឆាំង របស់លោក Jeremy Corbyn សង្ឃឹមថានឹងអាចឈ្នះឆ្នោតបានឡើងកាន់អំណាច រួចនឹងទៅចរចារកកិច្ចព្រមព្រៀងBrexit ថ្មីជាមួយសហភាពអឺរ៉ុប ក្នុងអំឡុងពេលបីខែ។ កិច្ចព្រមព្រៀងថ្មីត្រូវឆ្លងកាត់ប្រជាមតិ ដែលពេលនោះពលរដ្ឋអង់គ្លេសអាចមានជម្រើសលុបចោលBrexitតែម្តងផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ