ក្រោយមរណភាពទាហាននៅម៉ាលី តើបារាំងគួរបន្តរក្សាវត្តមានយោធានៅបរទេសទៀតឬយ៉ាងណា ?
ចុះផ្សាយនៅថ្ងៃ៖
ស្តាប់ - ០៤:២៧
មរណភាពរបស់ទាហាន១៣រូបក្នុងប្រតិបត្តិការនៅម៉ាលី ជាដំណឹងដ៏ក្រៀមក្រំសម្រាប់ប្រទេសបារាំងទាំងមូល។ ថ្នាក់ដឹកនាំនយោបាយគ្រប់ស្រទាប់ គ្រប់និន្នាការបានសម្តែងក្តីរន្ធត់និងការគោរពដល់វិញ្ញាណក្ខន្ធយុទ្ធជនពលី។ យុទ្ធសាស្ត្រយោធារបស់រដ្ឋាភិបាល នៅតែបានទទួលការគាំទ្រយ៉ាងច្រើន ប៉ុន្តែភាពមន្ទិលសង្ស័យចំពោះសមត្ថភាពប្រយុទ្ធប្រឆាំងនឹងពួកជីហាតនៅអាហ្វ្រិក និងការប្រេះឆាចាប់មានលេចស្នាមឡើងក្នុងរង្វង់បក្សប្រឆាំង។ តើបារាំងមានទស្សនវិស័យយ៉ាងណា ក្នុងជម្លោះនៅតំបន់សាហែលអាហ្វ្រិកនេះ ? បារាំងនឹងបន្តរក្សាវត្តមានយោធារបស់ខ្លួនទៀតឬយ៉ាងណា ?
ពិធីគោរពវិញ្ញណក្ខន្ធថ្នាក់ជាតិនឹងប្រារព្ធធ្វើនៅវិមានយុទ្ធជនពលី Invalides ក្រោមអធិបតីភាពប្រធានាធិបតីនៅថ្ងៃចន្ទដើមសប្តាហ៍ក្រោយ។ សភា-ព្រឹទ្ធិសភា បានលំអោនកាយមួយនាទីគោរពវិញ្ញាណក្ខន្ធរួចហើយ នៅពេលបានទទួលដំណឹងមរណភាពភ្លាម។
នេះជាលើកទីមួយហើយ គិតចាប់តាំង៣៦ឆ្នាំមក ដែលបារាំងបានជួយហេតុការណ៍ បាត់បង់ជីវិតកងទ័ពរបស់ខ្លួន នៅលើសមរភូមិក្នុងចំនួនដ៏ច្រើនបែបនេះ។ ហេតុដូច្នេះហើយបានជាទន្ទឹមពេលនឹងការសម្តែងសាមគ្គីភាពជាតិ មានមតិជាច្រើនបានផុសឡើង ចេញពីជួរនយោបាយបក្សឆ្វេងនិយម អំពាវនាវឱ្យរដ្ឋាភិបាលពិចារណារកផ្លូវដកទ័ពចេញពីតំបន់សាហ៊ែលអាហ្វ្រិក។
សូមបញ្ជាក់ថា នៅខែមករាឆ្នាំ២០១៣ ក្រោមការគំរាមកំហែងរបស់ពួកជីហាត តាមសំណើរបស់ម៉ាលីនិងជាមួយកងទ័ពជាតិម៉ាលី បារាំងបានផ្តើមធ្វើអន្តរគមន៍យោធាដើម្បីប្រយុទ្ធប្រឆាំងនឹងពួកភេរវនិយម។ បេសកកម្មនេះបានការចូលរួមពីកងទ័ពមួកខៀវអង្គការសហប្រជាជាតិ និងសហភាពអឺរ៉ុប។ ជាបេសកកម្មអង្គការសហប្រជាជាតិដ៏សំខាន់ តែក៏មានខាតបង់ជីវិតទាហានអស់ច្រើនបំផុត ដល់ទៅជាង២០០នាក់ និងទាហានជាតិម៉ាលីជាច្រើននាក់ផ្សេងទៀត។ ហើយតាំងពីឆ្នាំ២០១៤មក បារាំងបាននាំមុខ មានសកម្មភាពខ្លាំងជាងគេ និង បានដឹកនាំពន្លាតសកម្មភាព ដោយមានការចូលរួមពីកងទ័ពឆាដ បើកប្រតិបត្តិការ បារខាន Barkhane ដែលមានកម្លាំងទ័ពសរុប៤៥០០នាក់។ ជាប្រតិបត្តិការយោធាបារាំងដ៏ នៅបរទេសធំជាងគេ។
ប៉ុន្តែជម្លោះអន្តរសហគមន៍ក្នុងតំបន់ បានជំរុញឱ្យពួកជីហាតបានរីករាលដាលសកម្មភាពកាន់តែខ្លាំងឡើងៗ រាលដល់ប្រទេសនីហ្សេ បួរគីណាហ្វាសូ និងឆាដ ក្រោមផ្លាកអាល់កៃដា ឬអង្គការរដ្ឋអ៊ីស្លាម។ ក្នុងតំបន់វាលខ្សាច់ដ៏ធំទូលាយ ពួកភេរវនិយមបានបង្កើនសកម្មភាពវាយប្រហារ វាយឆ្មក់លើទីតាំងតំណាងអំណាចរដ្ឋ និងយោធាបរទេស ...
មានន័យថាប្រតិបត្តិការយោធានេះបរាជ័យ ? បារាំងត្រូវដកទ័ពត្រលប់មកស្រុកវិញឬ ?ជាមួយដំណឹងមរណភាពទាហានកុម្មង់ដូ១៣នាក់ កាលពីថ្ងៃចន្ទទី ២៥វិច្ឆិកា ភាពសង្ស័យលើសមត្ថភាពប្រយុទ្ធប្រឆាំងនឹងការគំរាមកំហែងភេរវកម្មមានកាន់តែច្រើន។ សំណួរទាក់ទងនឹងការផ្លាស់ប្តូរយុទ្ធសាស្ត្រ និងវិធីសាស្ត្រថ្មី ក៏ផុសឡើងដែរ។ ពលរដ្ឋបារាំងចោទសួរមិនខុសទេ។ រដ្ឋមន្ត្រីក្រសួងការពារជាតិបារាំង បានទទួលស្គាល់ថាស្ថានភាពសន្តិសុខនៅតំបន់សាហ៊ែលស្មុគស្មាញខ្លាំង ដែលត្រូវការមានយុទ្ធសាស្ត្រអំណត់ខ្លាំង និងស៊ូខ្លាំងណាស់។ ការប្រយុទ្ធប្រឆាំងនឹងភេរវនិយមជាសង្គ្រាមដ៏យូរអង្វែង។
វត្តមានកងទ័ពបារាំងនៅ ម៉ាលី មិនមែនកំរិតត្រឹមការប្រយុទ្ធលើសមរភូមិប្រឆាំងនឹងពួកជីហាតទេ ប៉ុន្តែជាវត្តមានដ៏ចាំបាច់។ នេះបើតាមការអះអាងបញ្ជាក់របស់លោកនាយករដ្ឋមន្ត្រីបារាំង ក្រោយគ្រោះថ្នាក់បុកឧទ្ធម្ភាគចក្រស្លាប់ទាហានបារាំង១៣នាក់ភា្លម តបទៅនឹងសំណួររបស់បក្សឆ្វេងនិយម។ ប្រតិបត្តិការយោធានេះមិនអាចនាំជោគជ័យបានទាំងស្រុង ឃើញសឃើញខ្មៅភ្លាមៗដូចល្ខោនសំដែងលើឆាកទេ ប៉ុន្តែវត្តមានកងទ័ពបារាំង បានទប់ស្កាត់មិនឱ្យពួកជីហាត ពួកភេរវនិយមពង្រីកកម្លាំងបាន។ បើគ្មានវត្តមានកងទ័ពបារាំង បើគ្មានកម្លាំងប្រឈមនឹងសត្រូវ ប្រឆាំងនឹងអស្ថិរភាពតាមផ្លូវថ្នល់ ប្រឆាំងនឹងការលាក់បង្កប់អាវុធ ប្រឆាំងបង្កជាក្រុមភេរវកម្មទេ នោះគេក៏មិនអាចធានាការងារស្តារស្ថិរភាពនយោបាយ និងការអភិវឌ្ឍន៍សេដ្ឋកិច្ចដ៏ចាំបាច់បំផុតបានដែរ។
រដ្ឋាភិបាលបារាំងគ្មានទស្សនៈវិស័យចង់ដកកងទ័ពចេញពីតំបន់សាហ៊ែលទេ។ លោកនាយករដ្ឋមន្ត្រីបានបញ្ជាក់ជំហរនេះម្តង កាលពីថ្ងៃទី ១៨ វិច្ឆិកា ពីទីក្រុងដាកា។ នៅក្នុងជំនួបកំពូលអន្តរជាតិធំៗដូចជាជំនួបG៧ ប្រធានាធិបតីបារាំង បានដាស់សហគមន៍អន្តរជាតិឱ្យដឹងអំពីស្ថានភាពអសន្តិសុខនៅតំបន់សាហ៊ែល និងសំដែងការខកចិត្តនឹងប្រទេសជាដៃគូ ជាសម្ព័ន្ធមិត្តជាច្រើនផ្សេងទៀតដែលទុកបារាំងឱ្យបន្ទុកម្នាក់ឯង។
គ្រប់អ្នកវិភាគ និងអ្នកជំនាញក៏ព្រមព្រៀងដូចគ្នាថា ទាហានបារាំងចាំបាច់ត្រូវបន្តវត្តមាននៅតំបន់សាហ៊ែលទៀតសម្រាប់ពេលនេះ និងយូរទៅមុខទៀត ដើម្បីជួយបំពាក់បំប៉នកងកម្លាំងជាតិដែលធ្លាប់ជាអតីតប្រទេសស្ថិតក្រោមអាណានិគមន៍បារាំង ឱ្យរឹងមាំសិន។ ម្យ៉ាងវិញទៀត បារាំងកំពុងស្ថិតក្នុងសង្គ្រាម ដែលមានសមរភូមិ ពីរ នៅក្រៅនិងនៅក្នុង ប្រទេស (ចង់សំដៅលើភេរវកម្មនៅប៉ុស្តិ៍ប៉ូលិសក្រុងប៉ារីសកាលពីថ្ងៃទី ៣តុលា)។ ដូច្នេះគេមិនអាចបោះបង់សមរភូមិណាមួយបានឡើយ បើសង្គ្រាមមិនទាន់បញ្ចប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ