ប្រទេសអឺរ៉ុប៦ទៀតចូលរួមក្នុងអង្គភាពពិសេស ដែលជួយឲ្យគេធ្វើជំនួញជាមួយអ៊ីរ៉ង់ដោយ មិនឲ្យជាប់ទណ្ឌកម្មអាមេរិក
ប្រទេសអឺរ៉ុបខាងជើង ចំនួន៦ បានប្រកាសចូលរួមក្នុងអង្គភាពពិសេស Instex ដែលបារាំង អង់គ្លេស និងអាល្លឺម៉ង់បានបង្កើតឡើងនៅដើមឆ្នាំនេះ ក្នុងគោលដៅ ធ្វើជំនួញជាមួយអ៊ីរ៉ង់ ដោយមិនឲ្យជាប់សំណាញ់ទណ្ឌកម្មសេដ្ឋកិច្ចរបស់អាមេរិក។ នេះ បើតាមសេចក្តីថ្លែងការណ៍រួម របស់បារាំង អង់គ្លេស និងអាល្លឺម៉ង់។ គេនៅមិនទាន់ឃើញមានប្រតិកម្មយ៉ាងណាពីភាគីអាមេរិក ក៏ប៉ុន្តែ នៅថ្ងៃអាទិត្យម្សិលមិញ អ៊ីស្រាអែលដែលជាសត្រូវរបស់អ៊ីរ៉ង់ បានចេញមុខប្រតិកម្មរិះគន់ខ្លាំង ចំណាត់ការរបស់ប្រទេសអឺរ៉ុប។
ចុះផ្សាយនៅថ្ងៃ៖
ក្រសួងការបរទេសអ៊ីស្រាអែល នៅថ្ងៃអាទិត្យម្សិលមិញ បានរិះគន់ខ្លាំង ប្រទេសអឺរ៉ុបទាំង៦ ដែលបានចូលខ្លួនជាសមាជិករបស់អង្គភាព Instex បង្កើតឡើងដោយបារាំង អង់គ្លេស និងអាល្លឺម៉ង់ ក្នុងគោលដៅ បន្តធ្វើពាណិជ្ជកម្មជាមួយអ៊ីរ៉ង់ ប៉ុន្តែ ដោយមិនឲ្យជាប់ក្នុងទណ្ឌកម្មសេដ្ឋកិច្ចរបស់អាមេរិក។
នៅក្នុងសេចក្តីថ្លែងការណ៍កាលពីថ្ងៃសៅរ៍ បារាំង អង់គ្លេស និងអាល្លឺម៉ង់ ដែលជាហត្ថលេខីនៃកិច្ចព្រមព្រៀងអន្តរជាតិស្តីពីនុយក្លេអ៊ែរអ៊ីរ៉ង់ បានថ្លែងស្វាគម រដ្ឋាភិបាលបែលហ្ស៊ិក ហូឡង់ ដាណឺម៉ាក ស៊ុយអែត ន័រវែស ហ្វាំងឡង់ ដែលបានចុះឈ្មោះជាម្ចាស់ភាគហ៊ុន ក្នុង អង្គភាព Instex។ មានទីតាំងនៅទីក្រុងប៉ារីស អង្គភាពInstex ប្រៀបបាននឹងប្រព័ន្ធពិសេសមួយ ដែលមាននាទី រៀបចំការដោះដូរពាណិជ្ជកម្ម អនុញ្ញាតឲ្យអ៊ីរ៉ង់ អាចលក់នាំចេញប្រេង ហើយនិងទិញនាំចូល ទំនិញ ឬសេវា ដោយមិនប្រើសាច់ប្រាក់ដុល្លារ ដើម្បីកុំឲ្យជាប់ទណ្ឌកម្មសេដ្ឋកិច្ចរបស់សហរដ្ឋអាមេរិក។
សម្រាប់បារាំង អង់គ្លេស និងអាល្លឺម៉ង់ ដែលជាស្ថាបនិក អង្គភាពInstex ការចូលរួមរបស់ប្រទេសអឺរ៉ុបផ្សេងទៀត បង្ហាញឲ្យឃើញពីការប្រឹងប្រែងរបស់អឺរ៉ុប ដើម្បី សម្របសម្រួលការធ្វើពាណិជ្ជកម្មស្របច្បាប់រវាងអឺរ៉ុប ហើយនិងអ៊ីរ៉ង់ នោះបើទោះបីអ៊ីរ៉ង់ ជាប់រងទណ្ឌកម្មអាមេរិក។ ប៉ុន្តែ សម្រាប់ក្រសួងការបរទេសអ៊ីស្រាអែល ប្រទេសអឺរ៉ុបទាំង ៦បានជ្រើសរើសពេលវេលាដ៏អាក្រក់បំផុត ដើម្បីជួយរដ្ឋាភិបាលអ៊ីរ៉ង់ ឲ្យគេចផុតពីទណ្ឌកម្មអាមេរិក ព្រោះវាធ្វើឡើង នៅចំពេលដែរដ្ឋាភិបាលអ៊ីរ៉ង់ កំពុងប្រឈមនឹងមហាបាតុកម្ម របស់ប្រជាជនអ៊ីរ៉ង់ដែលរិះគន់រដ្ឋាភិបាល ពីរឿងដំឡើងថ្លៃប្រេង (តាំងពីពាក់កណ្តាលខែ វិច្ឆិកា)។
នៅក្រោយ អាមេរិកដកខ្លួនចេញពីកិច្ចព្រមព្រៀង និងត្រលប់ទៅដាក់ទណ្ឌកម្មសេដ្ឋកិច្ចលើអ៊ីរ៉ង់ បារាំង អាល្លឺម៉ង់ និងអង់គ្លេស ដែលជាហត្ថលេខីបីទៀតនៃកិច្ចព្រមព្រៀង បានសម្រេចបង្កើត អង្គភាព Instex ក្នុងគោលដៅ បញ្ចុះបញ្ចូលឲ្យអ៊ីរ៉ង់ នៅបន្តគោរពតាមកិច្ចព្រមព្រៀង ដែលសំដៅ ទប់ស្កាត់កុំឲ្យអ៊ីរ៉ង់ មានអាវុធបរិមាណូ។
ប៉ុន្តែ ជាអត់ប្រយោជន៍។ អ៊ីរ៉ង់ ដែលប្រឈមនឹងវិបត្តិសេដ្ឋកិច្ច ដោយសារទណ្ឌកម្មអាមេរិក បានបន្ទោសប្រទេសនៅអឺរ៉ុប ថា អសមត្ថភាព មិនអាចជួយឲ្យអ៊ីរ៉ង់។ តាំងពីខែឧសភា អ៊ីរ៉ង់ បានក្រឡាស់ដោះដៃបន្តិចម្តងៗ ពីការគោរពកិច្ចសន្យារបស់ខ្លួន ដែលមានចែងក្នុងកិច្ចព្រមព្រៀងនុយក្លេអ៊ែរ ឆ្នាំ ២០១៥។ នៅថ្ងៃអាទិត្យម្សិលមិញ ប្រធានរដ្ឋសភាអ៊ីរ៉ង់ នៅបានគំរាមទៀតថា អ៊ីរ៉ង់ នឹងពិចារណា ឡើងវិញ ពីការងារសហការជាមួយ ទីភ្នាក់ងារថាមពលបរិមាណូអន្តរជាតិ AIEA បើសិនភាគីអឺរ៉ុប សើរើពិនិត្យ លើយន្តការ ដែលអាចធ្វើឲ្យអ៊ីរ៉ង់ ត្រលប់ទៅជាប់ទណ្ឌកម្មសេដ្ឋកិច្ចសាជាថ្មី របស់អង្គការសហប្រជាជាតិ។
នៅខែវិច្ឆិកាមុននេះ ប៉ារីស ប៊ែរឡាំងបានគំរាមនឹងប្រើយន្តការដោះស្រាយវិវាទ ដែលមានចែងនៅក្នុងកិច្ចព្រមព្រៀង និងដែលបើកផ្លូវឲ្យអង្គការសហប្រជាជាតិ ត្រលប់ទៅដាក់ទណ្ឌកម្មលើអ៊ីរ៉ង់ នៅបន្ទាប់ពីអ៊ីរ៉ង់ បានរំលោភ ជាបន្តបន្ទាប់ កិច្ចព្រមព្រៀង ដូចជា បង្កើនបរិមាណ ស្តុក សារធាតុ អ៊ុយរ៉ាញ៉ូម ច្រើនជាងការកំណត់ក្នុងកិច្ចព្រមព្រៀងជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ