ជំនួបកំពូលអូតង់ លើកទី៧០ ជាវេលានៃការស្វែងយល់ចិត្តគ្នា ?
មេដឹកនាំប្រទេសនៃក្រុមសម្ព័ន្ធមិត្តចំណាស់៧០ឆ្នាំ អូតង់ ត្រូវជួបជុំគ្នានៅថ្ងៃអង្គារ និងពុធនេះ នៅWatford ក្បែរទីក្រុងឡុងដ៍ ក្នុងបរិយាកាសដ៏អាប់អួរខ្លាំង ដោយហេតុតែសមាជិកខ្វែងគំនិតគ្នាច្រើនរឿងពេក។ មុនជំនួបកំពូលចាប់បើកជាផ្លូវការនៅថ្ងៃស្អែក នៅពេញមួយថ្ងៃអង្គារនេះ គេសង្កេតឃើញមានជំនួបទ្វេភាគី ពហុភាគីតូចៗជាច្រើន ប្រធានាធិបតីបារាំងនិងអាល្លឺម៉ង់ ត្រូវជួបជាមួយប្រធានាធិបតីអាមេរិកដូណាល់ត្រាំ ដាច់ដោយឡែកពីគ្នា។ បន្ទាប់មក លោកម៉ាក្រុង លោកស្រី មែរកិល និងនាយករដ្ឋមន្ត្រីអង់គ្លេស នឹងមានជំនួបមួយ ជាមួយប្រធានាធិបតីតួកគី ... ជំនួបទាំងនេះប្រព្រឹត្តទៅក្នុងបរិបទដ៏តានតឹង។
ចុះផ្សាយនៅថ្ងៃ៖
បង្កើតឡើងនៅឆ្នាំ១៩៤៩ ក្រោយឈ្នះសង្គ្រាមលោកលើកទីពីរ អូតង់ ជាតំណាងជោគជ័យដ៏គួរឱ្យស្ងប់ស្ងែងមួយ។ ប៉ុន្តែ៧០ឆ្នាំក្រោយ ថ្ងៃបើកជំនួបកំពូល កំពុងក្លាយថ្ងៃជួបវែកញែកស្វែងយល់គ្នាឡើងវិញ។
គ្រប់គ្នាកំពុងចង់បានការបំភ្លឺពីប្រធានាធិបតីបារាំង ដែលចាត់ទុកអូតង់ថាកំពុងឈានមកដល់មាត់ច្រាំងនៃមរណៈ ព្រោះមានមូលហេតុច្រើនតែសំខាន់ជាងគេគឺបញ្ហាហិរញ្ញវត្ថុ។ ប្រធានាធិបតីអាមេរិកត្រូវការពិភាក្សាតែប្រធានបទថវិកាមួយប៉ុណ្ណោះ រាល់គ្រប់ជំនួបអូតង់ និងដាក់សម្ពាធឱ្យសម្ព័ន្ធមិត្តបង់វិភាគទានក្នុងវិស័យការពារជាតិឱ្យបានកាន់ច្រើន។ អាល្លឺម៉ង់បានបន្ទន់ជំហរតាមអាមេរិក ដោយសង្ឃឹមថាសម្ព័ន្ធភាពអូតង់នឹងប្រសើរឡើងនៅមានកិច្ចព្រមព្រៀងថវិកា។ ប៉ុន្តែនរណាអាចទុកចិត្តលោកត្រាំបាន ! ចំណែកបារាំងមិនត្រូវការនិយាយអំពីការដំឡើងថវិកាយោធាទេ បារាំងចាប់អារម្មណ៍នឹងយុទ្ធសាស្ត្ររួមប្រឆាំងសត្រូវ និងទំនាក់ទំនងក្នុងរង្វង់សម្ព័ន្ធមិត្ត។
ចាប់ផ្តើមដំបូងគេគឺតួកគី។ បារាំង-តួកគីកំពុងតឹងសរសៃកដាក់គ្នា រហូតដល់ថ្នាក់កោះហៅប្រមុខការទូតចូលជួបផង ពិតជាការដ៏កម្របំផុតក្នុងរង្វង់សម្ព័ន្ធមិត្ត។ ជំនួបរវាងប្រធានាធិបតីបារាំងនិងតួកគី អាចនឹងពុះកញ្ជ្រោលខ្លាំង ព្រោះបារាំងមិនពេញចិត្តនឹងប្រតិបត្តិការយោធារបស់អង់ការ៉ានៅស៊ីរី ដោយគ្មានប្រាប់សម្ព័ន្ធមិត្តដូច្នេះឡើយ។ ឯចំណែកលោកអ៊ែរដូហ្កាន គំរាមថានឹងខ្ទប់ផែនការអូតង់ បើសម្ព័ន្ធមិត្តមិនព្រមចាត់ទុកពួកគូដឌីស្ថានជាក្រុមភេរវជន។ សង្ឃឹមថានៅក្នុងជំនួបស្តីពីស៊ីរី នៅថ្ងៃនេះ ដោយមានប្រមុខដឹកនាំអាល្លឺម៉ង់ និងនាយករដ្ឋមន្ត្រីអង់គ្លេស ចូលរួមជាមួយផង ជាការជួសបុសឱ្យធ្លាយជាសះនឹងគ្នាឡើងវិញ។
លោកដូណាល់ ត្រាំ មានជំនួបទ្វេភាគីជាមួយប្រធានអូតង់នៅពេលព្រឹកព្រលឹម មុននឹងមានជំនួបជាមួយប្រធានាធិបតីបារាំង។ មិនដឹងថាតើលើកនេះលោកត្រាំ នឹងបញ្ជាក់ជំហរយ៉ាងណាទេ បើមានជម្លោះពាណិជ្ជកម្មផង ថវិកាអូតង់ផងជាមួយបារាំងយ៉ាងដូច្នេះ។
រួមរឹតដោយវិវាទ ជំនួបកំពូលនឹងខ្លី តែប្រមាណបីម៉ោង ! នឹងផ្តល់ចំណេញដល់រុស្ស៊ី។ នេះបើតាមរដ្ឋមន្ត្រីអឺរ៉ុបម្នាក់។ ប្រមុខអង្គការទំនងជានឹងបានទទួលភារៈដឹកនាំពិចារណាមើលទំនាក់ទំនងអូតង់ជាមួយរុស្ស៊ី តាមសំណើរបស់បារាំង និងអំពីបញ្ហាសន្តិសុខរួម នាពេលអនាគត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ