អាមេរិកគំរាមដំឡើងពន្ធ ១០០% លើផលិតផលបារាំងមួយចំនួន តែបារាំងបានគំរាមនឹងវាយបកវិញ
នៅថ្ងៃអង្គារ ទី៣ ធ្នូ បារាំងតាមរយៈរដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុលោកប៊្រុយណូ ឡឺម៊ែរបានបញ្ចេញប្រតិកម្មតបនឹងរដ្ឋបាលអាមេរិកដែលគំរាមដំឡើងពន្ធលើផលិផលបារាំងមួយចំនួនដែលនាំចូលអាមេរិក។ ការគំរាមរបស់រដ្ឋបាលអាមេរិកនេះ គឺដើម្បីឆ្លើយតបនឹងរដ្ឋាភិបាលបារាំងដែលបានបង្កើតច្បាប់យកពន្ធលើក្រុមហ៊ុនបច្ចេកវិទ្យាអាមេរិកាំងចំនួន៤ គឺ Google Appel Facebook និង Amazon ដែលគេហៅថា Gafa។ អាមេរិកយល់ថា ច្បាប់ពន្ធ Gafa របស់បារាំងបានធ្វើឲ្យខូចប្រយោជន៍ដល់ក្រុមហ៊ុនអាមេរិកាំង។ លោកប៊្រុយណូ ឡឺម៊ែរបានព្រមានបកវិញដោយចាត់ទុកទណ្ឌកម្មថ្មីអាមេរិកលើបារាំងជារឿងមិនអាចទទួលយកបាន និងថា បារាំង រួមទាំងអឺរ៉ុបនឹងធ្វើការវាយបកចាស់ដៃលើអាមេរិកវិញ។
ចុះផ្សាយនៅថ្ងៃ៖
ស្តាប់ - ០២:២៨
២ ៤០០លានដុល្លារ នេះជាទឹកប្រាក់ដែលរដ្ឋបាលអាមេរិកអាចទទួលបានពីការដំឡើងពន្ធលើផលិតផលបារាំងមួយចំនួនដែលនាំចូលអាមេរិក។ ផលិផលទាំងនោះរួមមាន ស្រា កាបូបដៃ គ្រឿងសំអាង និង Fromage ឬ Cheese។ ការគំរាមរបស់រដ្ឋបាលអាមេរិកនៅរសៀលថ្ងៃចន្ទ ទី២ ធ្នូបានធ្វើឡើង ក្រោយពីអ្នកតំណាងពាណិជ្ជកម្មអាមេរិកបានបើកការស៊ើបអង្កេតក្នុងខែកក្កដាលើច្បាប់ពន្ធ Gafa របស់បារាំង រួចបានចេញសេចក្តីសន្និដ្ឋានថា ច្បាប់ពន្ធ Gafa នេះបានធ្វើឲ្យខូចប្រយោជន៍ដល់ក្រុមហ៊ុនអាមេរិកាំង។
« ការិយាល័យតំណាងពាណិជ្ជកម្មអាមេរិកផ្តោតលើការប្រឆាំងនឹងការការពារនិយមដែលកំពុងកើនឡើងនៅក្នុងប្រទេសសមាជិកអឺរ៉ុបដែលបានយកក្រុមហ៊ុនអាមេរិកធ្វើជាផ្ទាំងស៊ីបដោយអយុត្តិធម » នេះជាការថ្លែងរបស់អ្នកតំណាងពាណិជ្ជកម្មអាមេរិកនៅក្នុងសេចក្តីប្រកាសព័ត៌មានមួយ។ « ខ្ញុំនឹងមិនទុកឲ្យបារាំងយកពន្ធលើក្រុមហ៊ុនអាមេរិកាំងទេ » នេះជាការថ្លែងរបស់ប្រធានាធិបតីអាមេរិកលោកដូណាល់ ត្រាំពីទីក្រុងឡុងដ៏ ប្រទេសអង់គ្លេសដែលលោកអញ្ជើញចូលរួមនៅក្នុងជំនួបកំពូលអូតង់។ ជាចម្លើយតបនឹងការគំរាមរបស់រដ្ឋបាលអាមេរិកវិញ បារាំងតាមរយៈរដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុលោកប៊្រុយណូ ឡឺម៊ែរបានបញ្ជាក់ថា ទណ្ឌកម្មថ្មីរបស់អាមេរិកប្រឆាំងបារាំងជារឿងមិនអាចទទួលយកបាន និងថា បារាំង រួមជាមួយអឺរ៉ុបនឹងធ្វើការវាយបកចាស់ដៃវិញ។
« គម្រោងទណ្ឌកម្មនេះជារឿងមួយដែលមិនអាចទទួលបានទេ។ វាជាវិធានការដែលមិនសក្តិសមនឹងសម្ព័ន្ធមិត្តម្នាក់សោះ។ វាក៏មិនមែនជាឥរិយាបទដែលគេកំពុងរង់ចាំពីអាមេរិកចំពោះបារាំងដែលជាសម្ព័ន្ធមិត្តដ៏សំខាន់មួយ និងចំពោះអឺរ៉ុប និយាយជាទូទៅទេ។
អ្វីៗគឺច្បាស់ណាស់រវាងអាមេរិក និងយើង ខ្ញុំចង់និយាយថាអឹរ៉ុប ប្រសិនបើមានទណ្ឌកម្មថ្មីរបស់អាមេរិក សហភាពអឺរ៉ុបនឹងត្រៀមខ្លួនរួចជាស្រេចដើម្បីវាយបកវិញ។ នៅថ្ងៃចន្ទ ទី២ ធ្នូ យើងបានទាក់ទងជាមួយគណៈកម្មការអឺរ៉ុបដើម្បីធានាថា បើមានទណ្ឌកម្មថ្មីពីអាមេរិកាំង គឺត្រូវតែមានការវាយបកវិញពីអឹរ៉ុប ហើយជាការវាយបកយ៉ាងចាស់ដៃ » នេះជាការថ្លែងរបស់លោកប៊្រុយណូ ឡឺម៊ែរ។
គួររម្លឹកថា Gafa មកពីពាក្យពេញ Google Appel Facebook និង Amazon ហើយនៅក្នុងច្បាប់ពន្ធ Gafa នេះ រដ្ឋាភិបាលបារាំងបានសម្រេចយកពន្ធដល់កម្រិត ៣% លើប្រាក់ចំណូលដែលក្រុមហ៊ុនអាមេរិកទាំង ៤ រកស៊ីបាននៅក្នុងប្រទេសបារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ