អង្គការអូតង់បានបញ្ជាក់ជាថ្មីពីសាមគ្គីភាព ឯកភាព និងភាពស្អិតរមួត
ជំនួបកំពូលអង្គការអូតង់រយៈពេល ២ថ្ងៃក្នុងទីក្រុងឡុងដ៏ ប្រទេសអង់គ្លេសបានបិទបញ្ចប់នៅរសៀលថ្ងៃពុធ ទី៤ ធ្នូ។ ទោះបីជាមានភាពមិនចុះសម្រុង និងការយល់មិនដូចគ្នាក៏ដោយក៏នៅទីបំផុត សមាជិកទាំង ២៩ប្រទេសបានអនុម័តលើសេចក្តីថ្លែងការណ៍រួមមួយដោយបញ្ជាក់ជាថ្មីពីសាមគ្គីភាព ឯកភាព និងភាពស្អិតរមួត។ ទន្ទឹមគ្នានេះ សេចក្តីថ្លែងការណ៍ដដែលក៏បានបើកផ្លូវឲ្យមានការគិតគូរពីយុទ្ធសាស្រ្តថ្មីដែលបានទាមទារយ៉ាងទទូចពីសមាជិកមួយចំនួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៥
ទំរាំសម្រេចបានសេចក្តីថ្លែងការណ៍រួមមួយ សមាជិកអូតង់ទាំង ២៩ប្រទេសបានធ្វើការងារយ៉ាងសកម្មរយៈពេល ៣ម៉ោង។ « សាមគ្គីភាព ឯកភាព និងភាពស្អិតរមួតជាគោលការណ៍គ្រឹះរបស់អង្គការអូតង់ » នេះឃ្លាដែលមានចែងនៅក្នុងសេចក្តីថ្លែងការណ៍រួម។ ថ្លែងនៅក្នុងសន្និសីទកាសែត ប្រមុខអង្គការអូតង់លោក Jens Stoltenberg បានបញ្ជាក់ដោយទទួលស្គាល់ថា ការមានភាពខុសគ្នាជារឿងធម្មតា ព្រោះសមាជិកទាំង ២៩ប្រទេសមកពីប្រទេសខុសគ្នានៃត្រើយទាំងពីរនៃសមុទ្រអាត្លង់ទិក។ តែអ្វីដែលជាកម្លាំងពិតរបស់អូតង់ គឺយើងអាចជំនះបានគ្រប់ពេលនូវការខ្វែងគំនិត និងការយល់ឃើញមិនដូចគ្នា នេះជាការបន្ថែមរបស់លោក Stoltenberg។
អ្វីជាការកត់សម្គាល់ អូតង់បានបញ្ជាក់ជាផ្លូវការលើកទី១ ថា កំណើនឥទ្ធិពលរបស់ចិន និងនយោបាយការបរទេសរបស់ចិនមានបង្កប់ដោយចំណុចពីរ គឺឱកាស និងការប្រឈមដែលអូតង់ត្រូវតែនិយាយសម្លេងតែមួយ និងផ្តល់ចម្លើយរួមគ្នា។ ទាក់ទងនឹងប្រទេសរុស្ស៊ីវិញ អូតង់បានបរិហារជាថ្មីម្តងទៀតលើសកម្មភាពឈ្លានពានរបស់រុស្ស៊ី តែទុកទ្វារចំហសម្រាប់កិច្ចសន្ទនាក្នុងគោលដៅបង្កើតទំនាក់ទំនងក្នុងន័យស្ថាបនាជាមួយរុស្ស៊ី។ ចុងក្រោយ លោក Stoltenberg បានលើកឡើងពីអាវុធនុយក្លេអ៊ែរដោយទទូចពីភាពចាំបាច់ដែលគេត្រូវប្រឹងប្រែងបន្ថែមទៀតដើម្បីគ្រប់គ្រងអាវុធនុយក្លេអ៊ែរឲ្យបានម៉ត់ចត់។
នៅក្នុងន័យនេះ លោក Stoltenberg ចង់ឲ្យមានសន្ធិសញ្ញាថ្មីមួយស្តីពីអាវុធនុយក្លេអ៊ែរដោយដាក់បញ្ចូលប្រទេសរុស្ស៊ី និងប្រទេសចិន។ ជំនួបកំពូលអូតង់លើកក្រោយនឹងរៀបចំនៅឆ្នាំ ២០២១ តែនៅមិនទាន់បានកំណត់ឈ្មោះប្រទេសដែលត្រូវរៀបចំនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ