ល្បែងកីឡាអឺរ៉ុបលើកទី១ សម្ពោធ ថ្ងៃ១២មិថុនានេះ នៅក្រុងបាគូ
ចុះផ្សាយនៅថ្ងៃ៖
ស្តាប់ - ០៥:១៦
ក្រុងបាគូ រដ្ឋធានី អាស៊ែរបែហ្សន់ ក្លាយជា ម្ចាស់ផ្ទះទទួល ល្បែងកីឡាអឺរ៉ុបនេះ ដែលក្នុងប្រវត្តិសាស្ត្រ គឺជាលើកដំបូងបង្អស់ ហៅថា 1St European Games គឺស្របនឹង សេចក្តីសម្រេច អនុម័ត កាលពីចុងឆ្នាំ២០១២ ដោយ “ គណៈកម្មាធិការអូឡាំពិកអឺរ៉ុប“។ ល្បែងកីឡានេះ នឹងប្រព្រឹត្តទៅ ១៧ថ្ងៃ រហូតដល់ថ្ងៃទី២៨ មិថុនា ដោយមានការចូលរួមពី កីឡាករ កីឡាការិនី ៦.២០០នាក់ តំណាងឲ្យ ៥០ប្រទេសអឺរ៉ុប។
គឺថ្ងៃ៨ធ្នូ ឆ្នាំ២០១២ ដែលក្នុងមហាសន្និបាតលើកទី៤១ របស់ខ្លួន ក្នុងក្រុង រ៉ូម ប្រទេស អ៊ីតាលី គណៈកម្មាធិការអូឡាំពិកអឺរ៉ុប បានសម្រេចប្រគល់សិទ្ធិ ទៅ រដ្ឋធានីអាស៊ែរបែហ្សន់ ឲ្យធ្វើជាម្ចាស់ផ្ទះទទួល ការប្រកួតល្បែងកីឡាអឺរ៉ុប ជាលើកដំបូងបង្អស់ ហៅថា 1St European Games។ សេចក្តីសម្រេចនេះ យោងទៅលើលទ្ធផលនៃការបោះឆ្នោតសម្ងាត់គឺថា ក្នុងចំណោម ៤៨ប្រទេស ដែលបានវត្តមាន ក្នុងមហាសន្និបាតនោះ មានដល់ ៣៨ប្រទេស ដែលគាំទ្របេក្ខភាព ក្រុងបាគូ ហើយសម្លេងជំទាស់ គឺមានតែ ៨ប៉ុណ្ណោះ ចំណែក ២សម្លេងទៀត គឺអនុប្បវាទ។ រីឯ ទីស្នាក់ការរបស់ គណៈកម្មាធិការអូឡាំពិកអឺរ៉ុប ដែលមាន គណៈកម្មាធិការអូឡាំពិកជាតិ ៥០ ប្រទេសអឺរ៉ុប ជាសមាជិក គឺស្ថិតនៅ ក្រុង Lausanne ប្រទេសស្វ៊ីស។
ទាំងពិធីសម្ពោធ នៅថ្ងៃ ១២មិថុនានេះ ទាំងពិធីបិទបញ្ចប់ នៅថ្ងៃទី ២៨ មិថុនា គឺប្រព្រឹត្តទៅ ក្នុង ស្តាត នាមអតីតប្រធានាធិបតីអាស៊ែរបែហ្សន់ លោក Gueidar Aliev ជាបិតា ប្រធានាធិបតី សព្វថ្ងៃ លោក ilham Aliev ដែលរូបគាត់ផ្ទាល់ជាអ្នកអុជភ្លើងអនុកីឡាអូឡាំពិកនេះ ឲ្យឆេះ ជាប្រចាំ នៅលើស្តាដ ពេញក្នុងរយៈពេល ១៧ថ្ងៃ នៃការប្រកួត។
សំបុត្រសម្រាប់ចូលមើលការប្រកួត នៅតាមទីប្រកួតប្លែកៗ នៃល្បែងកីឡានោះ តាមដែល គណៈកម្មធិការខាងចាត់ចែងល្បែងកីឡាអឺរ៉ុប ក្រោមឈ្មោះថា “ ក្រុងបាគូ-២០១៥ “ ប្រកាសឲ្យ ដឹង គឺថ្លៃ ពី ១ទៅ៥ Manat ឫ ម្តុំពី១ ទៅ ៥ ដុល្លារ ដ្បិតលុយអាស៊ែរបែហ្សន់ ថ្លៃ ប្រហាក់ ប្រហែល នឹង លុយអាមេរិក។ អ្វីដែល គួរឲ្យកត់សម្គាល់ គឺថា សម្រាប់កុមារអាយុ ក្រោម១៦ឆ្នាំ បើទៅជាមួយមនុស្សចាស់ ដែលមានអត្តសញ្ញាណប័ណ្ណបញ្ជាក់ និងសំបុត្រចូលមើលនោះ ជាប់នឹងខ្លួនគេ គឺមិនចាំបាច់បង់ថ្លៃទេ។ លើកលែងតែក្នុងករណី ដែលការប្រកួត ប្រព្រឹត្តទៅ ក្នុងស្តាត សំខាន់នោះ ដែលតម្រូវឲ្យកុមារអាយុក្រោម ១៦ឆ្នាំទិញសំបុត្រដែរ ប៉ុន្តែ ថ្លៃត្រឹម ១ Manat ប៉ុណ្ណោះ។
ចំណែក សំបុត្រសម្រាប់ចូលមើលពិធីសម្ពោធ គឺថ្លៃ ចាប់ពី២០ Manat ហើយសំបុត្រ សម្រាប់ ចូលមើលពិធីបិទបញ្ចប់ គឺថ្លៃ ចាប់ពី ១០ Manat ឡើងទៅ។
នឹងចូលរួមប្រកួត គឺកីឡាករ កីឡាការិនី ចំនួន៦.២០០នាក់មកពី ៥០ប្រទេសអឺរ៉ុប។ គេនឹងប្រកួត ដើម្បីដណ្តើមយក មេដាយចំនួន ២៥៣ នៅតាមមុខវិញ្ញាសាកីឡា ២០ប្រភេទ។ ការប្រកួតនឹងប្រព្រឹត្ត ទៅ នៅតាមកីឡាដ្ឋាន ១៨កន្លែង និងនៅតាម ឆាកប្រកួត ៦កន្លែង សង់ឡើង ពិសេស សម្រាប់ល្បែងកីឡាអឺរ៉ុបនេះឯង។ បុរីកីឡា ដែលមានសង់ឡើង អាចទទួលឲ្យស្នាក់នៅ គឺ អត្តពលិក ចំនួន ៧.៣៥១នាក់។ តាមតួលេខផ្លូវការ សំណង់ថ្មីៗទាំងនេះ បានតម្រូវឲ្យ ក្រុងបាគូ ចំណាយ អស់១.២០០លានដុល្លារ។ ប៉ុន្តែ តាមអ្នកវិភាគ ខ្ទង់ចំណាយមែនពិត អាចច្រើនជាង នេះ ពីព្រោះគ្រាន់តែ ស្តាតអូឡាំពិក បានទាមទារឲ្យចំណាយដល់ទៅ ៦០០លានដុល្លារ។
គួរនិយាយថា ក្រុងបាគូ ក្នុងឆ្នាំ២០១២ ធ្លាប់មានបទពិសោធន៍ខាងទទួល ការប្រកួតចម្រៀង អឺរ៉ុប ហៅថា Eurovision ចូលរួម ដោយ៤២ប្រទេស។ ក្រុងបាគូ បានទទួលសិទ្ធិធ្វើ ជាម្ចាស់ផ្ទះ កាលណោះ គឺដោយសារ អ្នកចម្រៀង អាស៊ែរបែហ្សន់ ក្នុងការប្រកួតឆ្នាំ២០១១ នៅប្រទេស អាល្លឺម៉ង់ ដោយមាន ៤៣ប្រទេសចូលរួម ចេះដណ្តើមបានពិន្ទុជាប់លេខ១តែម្តង។
សាធារណរដ្ឋអាស៊ែរបែហ្សន់ នៅតំបន់នាយភ្នំកូកាស ជាប់មាត់សមុទ្រ Caspienne ដែល សម្បូណ៏ដោយធនធានធម្មជាតិ បែបយ៉ាងប្រេងឆៅ និង ឧស្ម័នធម្មជាតិ ប្រែរដ្ឋឯករាជ្យថ្មីនេះ ទៅជា ប្រទេសអ្នកមានមួយ ក្នុងលំហអតីតសហភាពសូវៀត។ មិនមែនចៃដន្យទេ ដែលក្រសួង ហិរញ្ញវត្ថុអាស៊ែរបែហ្សន់ បានព្យាករ សម្រាប់ឆ្នាំ ២០១៥នេះ ថា គ្រាន់តែប្រេងឆៅ ធានាបាន ៦៥% ឯណោះ នៃ ផលិតផលសរុប ក្នុងប្រទេស ហៅថា GDP ដែលមានទឹកប្រាក់ ដល់ ៦០.០០០លានដុល្លារ។
ម៉្លោះហើយបានជារដ្ឋអាស៊ែរបែហ្សន់ មិនរួញរាឡើយ ក្នុងការបង់ថ្លៃសំបុត្រយន្តហោះធ្វើដំណើរ ទៅមក ថ្លៃស្នាក់នៅ ថ្លៃហូបចុក សម្រាប់គ្រប់តែកីឡាករ គ្រប់តែប្រតិភូ ដែលមកចូលរួមក្នុង ល្បែងកីឡាអឺរ៉ុប លើកដំបូងបង្អស់ នៅក្រុងបាគូ។
មិនតែប៉ុណ្ណោះ ដើម្បីលំអបរិយាកាសបុណ្យកីឡានេះ ក្រសួងដឹកជញ្ជូនអាស៊ែរបែហ្សន់ បាន ប្រកាសថា ពេលវត្តមាន ក្នុងក្រុងបាគូ ពួកអ្នកកីឡា អាចជិះកូនឡានតាក់ស៊ីពណ៌ខ្មៅ រាប់រយ គ្រឿង ដែលកុម៉្មង់ពីអង់គ្លេសមក ដូចឡានតាក់ស៊ី ដែលរត់នៅក្រុងឡុងដ៍អញ្ចឹង។ សម្រាប់អាជ្ញាធរ ការទទួលល្បែងកីឡាអឺរ៉ុប ជាកិត្តិយស ដែល លើកមុខលើកមាត់រដ្ឋអាស៊ែរបែហ្សន់។
ប៉ុន្តែ នាយកមជ្ឈមណ្ឌលស្រាវជ្រាវដែលមានទីស្នាក់ការ ស្ថិតក្នុងក្រុងបាគូផ្ទាល់ លោក Arastun Orudjlou បានបញ្ចេញមតិថា “ ការចំណាយច្រើនយ៉ាងនេះ គឺនាំឲ្យ បណ្តាជនភាគច្រើន ដែល រស់នៅទាំងខ្វះ មុខ ខ្វះក្រោយ ក្នក់ក្នាញ់ទេតើ”។
ជាការប្រៀបធៀប នៅទ្វីបអាស៊ី ក៏រមែងប្រព្រឹត្តទៅ តាំងពីឆ្នាំ១៩៥១ម៉្លេះ ល្បែងកីឡាអាស៊ី ៤ឆ្នាំម្តង ហើយក្នុងឆ្នាំនេះ ល្បែងកីឡាបែបនេះ បានចាប់ផ្តើមទៅដែរ នៅទ្វីបអាមារិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ