ធនាគារអភិវឌ្ឍន៍ ក្រុម៥ប្រទេសធំៗ ហៅថា BRICS បានចាប់ដំណើរការ
ការដាក់ឲ្យដំណើរការនេះ គឺស្របនឹងកិច្ចព្រមព្រៀងចុះហត្ថលេខា ម្សិលមិញ ដោយ ក្រុមប្រឹក្សាទេសាភិបាលរបស់ ធនាគារថ្មីនេះ ដែលមានបេឡា សរុប ក្នុងទឹកប្រាក់ ១០០ ពាន់លានដុល្លារ ផ្សំឡើងពីវិភាគទាន នៃ៥ ប្រទេស BRICS ពោលគឺ ប្រេស៊ីល រុស្ស៊ី ឥណ្ឌា ចិន អាហ្វ្រិកខាងត្បូង។ ហើយធនាគារអភិវឌ្ឍន៍នេះ ចាប់ផ្តើមដំណើរការ គឺឧទ្ទិសដល់ ការបើកជំនួបកំពូល BRICS នៅថ្ងៃ ៨ កក្កដានេះ ក្នុងក្រុង អ៊ូហ្វា នៃប្រទេសរុស្ស៊ី ជាម្ចាស់ផ្ទះ។
ចុះផ្សាយនៅថ្ងៃ៖
ស្តាប់ - ០២:០១
ជាការកត់សម្គាល់ បេឡាក្នុងទឹកប្រាក់ ១០០.ពាន់លានដុល្លារនេះ ផ្សំឡើង ក្នុងទំហំ ច្រើនជាងគេ គឺពី វិភាគទាន របស់មហាប្រទេសចិន ដល់ទៅ ៤១.ពាន់លានដុល្លារ ចំណែក រុស្ស៊ី ប្រេស៊ីល ឥណ្ឌា នីមួយៗ រួមវិភាគទានស្មើគ្នា ក្នុងទំហំ ១៨.០០០លានដុល្លារ ហើយតិចជាងគេ គឺ អាហ្វ្រិកខាងត្បូង តែ ៥.០០០លានដុល្លារ។
៥ប្រទេស BRICS បានព្រមព្រៀងគ្នា ទៅលើការជួយគ្នា ទៅវិញ ទៅមក ផ្នែកហិរញ្ញវត្ថុ ក្នុង ករណី មានវិបត្តិ និងបាន ចាត់តាំងឡើង ជា ថ្នាក់ដឹកនាំរបស់ធនាគារអភិវឌ្ឍន៍ថ្មីនេះ សម្រាប់ជាប់ដៃ រវល់ នឹងការធ្វើវិនិយោគ ទៅក្នុង គម្រោងហេដ្ឋារចនាសម្ព័ន្ធ របស់ប្រទេសស្ថាបនិក។ តាមធាតុពិតដែលមាន សាច់រឿងគឺអំពី ការបង្កើតឡើងជា ស្ថាប័នហិរញ្ញវត្ថុ ស្រដៀងគ្នានឹង មូលនិធិរូបិយវត្ថុអន្តរជាតិ និង ធនាគារពិភពលោក។
ការសម្រេចចិត្តសមស្រប ត្រូវបានអនុម័ត ថ្ងៃអង្គារ ទី៧កក្កដា នៅក្រុងម៉ូស្គូ ដោយ រដ្ឋមន្ត្រី ហិរញ្ញវត្ថុ និង ប្រធាន ធនាគារកណ្តាល ទាំង៥ ប្រទេសស្ថាបនិក គឺមួយថ្ងៃមុនដល់ជំនួបកំពូល BRICS នៅថ្ងៃ ៨ កក្កដានេះ ក្នុងក្រុង អ៊ូហ្វា នៃប្រទេសរុស្ស៊ី ជាម្ចាស់ផ្ទះ។
សេចក្តីសម្រេចនោះចែងថា បើប្រទេសណាមួយ ក្នុង ៥ប្រទេសនោះ ស្រាប់តែ ប៉ះទង្គិចនឹង ស្ថានភាព ហៅថា “ ខ្វះលុយស្រស់” នោះធនាគារកណ្តាលនៃ ប្រទេស ឯទៀតក្នុង BRICS នឹងរត់ទៅជួយគេ ហើយធនធានដែលនឹងផ្តល់ទៅ គឺ ផ្តល់ជាប្រាក់ដុល្លារ។
ធនាគារអភិវឌ្ឍន៍ BRICS ក៏តាំងគោលដៅរបស់ខ្លួន បែបយ៉ាង ក្នុងទស្សនៈវិស័យវែងឆ្ងាយ ទៅមុខ បណ្តាប្រទេស BRICS គ្រោងដោះខ្លួនចេញពីសេវាផ្តល់ដោយ ប្រព័ន្ធធនាគារអន្តរជាតិ ហៅថា SWIFT ហើយបន្តិចម្តងៗ ជាជំនួសប្រាក់ដុល្លារ គឺឆ្លងទៅធ្វើ ការបង់ប្រាក់ទូទាត់គ្នា ជារូបិយវត្ថុជាតិ នៃប្រទេសខ្លួន។
ជាការរំលឹក គឺក្នុងជំនួបកំពូល BRICS នៅប្រទេសប្រេស៊ីល កាលពីឆ្នាំមុន ដែលគេបានពិភាក្សា អំពីរបៀបរបប ផ្តល់ជំនួយហិរញ្ញវត្ថុដល់គ្នា ទៅវិញ ទៅមក និង បង្កើតឡើង ជា ធនាគារអភិវឌ្ឍន៍ របស់ BRICS តែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ