រដ្ឋអាជ្ញាអាល្លឺម៉ង់៖ ពីឡុតអមលាក់មិនឲ្យក្រុមហ៊ុនដឹងថា ខ្លួន ឈឺ
៥ថ្ងៃ មកហើយ ដែលយន្តហោះAirbus A ៣២០របស់ក្រុមហ៊ុនអាល្លឺម៉ង់ Germanwing បានធ្លាក់ និងសម្លាប់មនុស្ស ១៥០នាក់ ក្នុងជ្រលងភ្នំ ភាគខាងត្បូងប្រទេសបារាំង។ ការស៊ើបអង្កេតរកមូលហេតុដែលធ្វើឲ្យពីឡុតអម បើកយន្តហោះទៅបុកភ្នំ បានបង្កើតភាពភ្ញាក់ផ្អើល ពីមួយថ្ងៃ ទៅមួយថ្ងៃ។ កាលពីថ្ងៃសុក្រ រដ្ឋអាជ្ញអាល្លឺម៉ង់បានបើកការស៊ើបអង្កេត និងឆែកឆេរផ្ទះរបស់ Andreas Lubitz ដែលក្នុងនោះ គេរកឃើញថា Andreas Lubitz បានហែកបោះចោល ក្នុងធុងសំរាម វេជ្ជបញ្ជាពេទ្យ ដែលតម្រូវឲ្យ Andreas Lubitz ត្រូវសម្រាក នៅផ្ទះ មិនទៅធ្វើការ នៅថ្ងៃអង្គារទី ២៤ មីនា ថ្ងៃ ដែលមានសោកនាដកម្ម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៨:៣៩
នៅថ្ងៃសៅរ៍ នេះ ក្រុមអ្នកជួយសង្រ្គោះ និងប៉ូលិសបារាំង នៅបន្តរុករកសាកសព នៅក្នុងអាកាសធាតុ ដ៏ត្រជាក់ក្នុងជ្រលងភ្នំ។ រដ្ឋាភិបាល និងប្រជាជនបារាំង បានបង្ហាញសាមគ្គីភាពយ៉ាងសម្បើម នៅក្រោយយន្តហោះអាល្លឺម៉ង់ធ្លាក់ក្នុងទឹកដីបារាំង។ ជំរកស្នាក់នៅ ប្រមាណ ១៣០០កន្លែង អ្នកជំនាញចិត្តសាស្រ្ត និងអ្នកបកប្រែ ៤០នាក់ សម្រាប់បកប្រែ ៨ភាសាផ្សេងគ្នា ត្រូវបានរើសបញ្ចូលសម្រាប់ជួយក្រុមគ្រួសារជនរងគ្រោះ ដែលបានធ្វើដំណើរ បណ្តើរៗ ទៅដល់Seyne les Alpes ក្បែរជ្រលងភ្នំ ដែលយន្តហោះរបស់ក្រុមហ៊ុនអាល្លឺម៉ង់ បានធ្លាក់ កាលពីថ្ងៃអង្គារ។
បន្ទាប់ពីរដ្ឋអាជ្ញាបារាំងអះអាងថា ពីឡុត អម គឺ Andreas Lubitz មានចេតនាបើកយន្តហោះ បើកទៅបុក ភ្នំ រហូតធ្វើឲ្យមនុស្សនៅលើយន្តហោះទាំងអស់ ស្លាប់ គ្មានសល់ម្នាក់ រដ្ឋអាជ្ញាអាល្លឺម៉ង់វិញ ដែលបើកការស៊ើបអង្កេត ឆែកឆេរនៅក្នុងផ្ទះរបស់ Andreas Lubitz បាននិយាយថា Andreas Lubitz បានហែកវេជ្ជបញ្ជាពេទ្យ ដែលតម្រូវឲ្យ Andreas Lubitz ត្រូវសម្រាក នៅផ្ទះ មិនទៅធ្វើការ នៅថ្ងៃដែលមានសោកនាដកម្ម។
នៅក្នុងពេលឆែកឆេរ ម្សិលមិញ ក្នុងផ្ទះរបស់ Andreas Lubitz ដែលស្ថិតនៅមិនឆ្ងាយប៉ុន្មានពីព្រលានយន្តហោះ Duseeldof រដ្ឋអាជ្ញាអាល្លឺម៉ង់ បាននិយាយថា គេឃើញវេជ្ជបញ្ជាពេទ្យជាច្រើន ដែល Andreas Lubitz បានហែកបោះចោលក្នុងធុងសម្រាម។ បើទោះបី អ្នកវិភាគជាច្រើនគិតថា Andreas Lubitz មានបំណងធ្វើអត្តឃាត ដោយបានបើកយន្តហោះទៅបុកភ្នំ ប៉ុន្តែ រដ្ឋអាជ្ញាអាល្លឺម៉ង់មិនបានរកឃើញសារ ឬសំបុត្រ ចុងក្រោយ ណាមួយ ដែលអាចបញ្ជាក់ថា Andreas Lubitz អស់សង្ឃឹមក្នុងជីវិតដែរ។
យ៉ាងណាក៏ដោយ សំបុត្រពេទ្យដែលត្រូវហែក និងបោះចោលក្នុងធុងសំរាម អាចបង្ហាញថា Andreas Lubitz មានចេតនាពិតប្រាកដ លាក់មិនឲ្យក្រុមហ៊ុន ឬមិត្តរួមការងារ ដឹងថា ខ្លួនមានជម្ងឺ។ នេះបើតាមរដ្ឋអាជ្ញាអាល្លឺម៉ង់។ រដ្ឋអាជ្ញាអាល្លឺម៉ង់មិនបានបញ្ជាក់លំអិតពីខ្លឹមសាក្នុង សំបុត្រពេទ្យនោះទេ ដោយគ្រាន់តែនិយាយថា នៅក្នុងសំបុត្រ ពេទ្យ Andreas Lubitz ត្រូវកំណត់ឲ្យបន្តប្រើថ្នាំព្យាបាលដូចមុន និងត្រូវឈប់សម្រាក មួយរយៈ។ តាមកាសែតអាល្លឹម៉ង់ Bild សំបុត្រពេទ្យចេញដោយពេទ្យជំនាញសរសៃប្រសាទ ឬពេទ្យជំនាញផ្លូវចិត្ត។
យោងតាមសក្ខីកម្មរបស់អតីតសង្សារម្នាក់របស់ Andreas Lubitz ដែលធ្លាប់សេពគប់ និងធ្វើការជាមួយ Andreas Lubitz រយៈពេល ៥ខែ Andreas Lubitz ធ្លាប់មានបញ្ហាផ្លូវចិត្ត។ រូបនាង បានបែកពី Andreas Lubitz ក៏ដោយសារតែបញ្ហានោះដែរ។ តាមសំដី របស់ស្រ្តីម្នាក់នោះ ដែលកាសែតអាល្លឺម៉ង់ Bild បានជួបសម្ភាសន៍ Andreas Lubitz បានធ្វើអត្តឃាតខ្លួន ដោយសារតែក្តីអស់សង្ឃឹមព្រោះថា Andreas Lubitz យល់ច្បាស់ថា ដោយសារតែបញ្ហាសុខភាព ខ្លួនគេមិនអាចសម្រេចក្តីស្រមៃដែលចង់បានការងារនៅក្រុមហ៊ុនអាកាសចរណ៍ អាល្លឺម៉ង់ Lufthansa។ ដោយសារតែបញ្ហាសុខភាព គេនឹងមិនតែមិនអាចបើកយន្តហោះ ក្នុងរយៈ ចម្ងាយឆ្ងាយ ដូចជាអ្នកបើកយន្តហោះដទៃទៀតនោះទេ។។ តាមអ្នកដែលស្គាល់ Andreas Lubitz ទាំងប៉ុន្មាន ដែលគេបានជួបសម្ភាសន៍ គេដឹងថា Andreas Lubitz ស្រឡាញ់អាជីពជាអ្នកបើកយន្តហោះនេះខ្លាំងណាស់។
មូលហេតុដែលធ្វើឲ្យ Andreas Lubitz ហែកសំបុត្រពេទ្យ និងលាក់ជម្ងឺទៅកន្លែងធ្វើការ នៅតែ អាថ៌កំបាំង ដែលក្រុមអ្នកស៊ើបអង្កេតកំពុងអង្កេតតទៅទៀត។ ប៉ុន្តែ យ៉ាងណាក៏ដោយ ការអះអាងរបស់អតីតសង្សាររបស់ Andreas Lubitz អាចឲ្យគេយល់បានខ្លះហេតុអ្វី បានជា Andreas Lubitzហែកសំបុត្រពេទ្យ និងលាក់មិនឲ្យក្រុមហ៊ុនដឹងថា ខ្លួនបានទទួលសំបុត្រពេទ្យ ឲ្យឈប់សម្រាកនៅផ្ទះនោះ។ អតីតសង្សាររបស់ Andreas Lubitz នៅបាននិយាយថា ថ្ងៃដែល Andreas Lubitz បានបើកយន្តហោះទៅបុកភ្នំ បានធ្វើឲ្យនាងនឹកទៅដល់ពាក្យរបស់ Andreas Lubitz ដែលធ្លាប់និយាយថា នៅថ្ងៃណាមួយ គេនឹងធ្វើអ្វីមួយ ដើម្បី កែប្រែ ប្រព័ន្ធទាំងស្រុង ហើយពិភពលោកនឹងស្គាល់ ចងចាំ ឈ្មោះរបស់គេ។ ច្បាស់ណាស់ថា ការបើកបុកយន្តហោះទៅបុកភ្នំ រហូតធ្វើឲ្យមនុស្សស្លាប់អស់១៥០នាក់ ដូច្នេះ គឺប្រាកដណាស់នឹងធ្វើឲ្យឈ្មោះ Andreas Lubitz ត្រូវពិភពលោកស្គាល់ ប៉ុន្តែ ក្នុងនាមជាឧក្រិដ្ឋជន តែប៉ុណ្ណោះ។
សំណងជម្ងឺចិត្តសម្រាប់គ្រួសារជនរងគ្រោះ
កាលពីថ្ងៃសុក្រ ក្រុមហ៊ុនGermanwing បានប្រកាសសងប្រាក់៥ម៉ឺនអឺរ៉ូ សម្រាប់គ្រួសារជនរងគ្រោះម្នាក់។ ជាជំនួយសម្រាប់ចំណាយបន្ទាន់របស់ក្រុមគ្រួសារ។ ក្រុមហ៊ុនធានារ៉ាប់រង Allianz របស់ក្រុមហ៊ុនអាកាសចរណ៍ Germanwing ដែលត្រូវចេញមុខសងជំនួសGermanwing បានផ្តល់៦លានអឺរ៉ូសម្រាប់ការបាត់បង់យន្តហោះ Airbus A ៣២០ នៅមួយថ្ងៃ ក្រោយយន្តហោះបុកធ្លាក់ក្នុងជ្រលងភ្នំ។
យោងតាម អនុសញ្ញាអន្តរជាតិ ក្រុងម៉ុងរ៉េអាល់ នៅក្នុងពេលគ្រោះថ្នាក់ធ្លាក់យន្តហោះដែលធ្វើឲ្យបាត់បង់អាយុជីវិតរបស់អ្នកដំណើរ នោះ គឺក្រុមហ៊ុនអាកាសចរណ៍ជាអ្នកចេញសងជម្ងឺចិត្ត ជាង ១សែន ២ម៉ឺន អឺរ៉ូ ដល់ជនរងគ្រោះម្នាក់ៗ។ ប៉ុន្តែ ទឹកប្រាក់សំណងពីខាងក្រុមហ៊ុនGermanwing នឹងអាចប្រែប្រួល និងអាចច្រើនជាងនេះ បើសិនគេរកឃើញថា ក្រុមហ៊ុនGermanwing មិនបានគោរពក្រិតក្រម និង ជាអ្នកចូលរួមទទួលខុសត្រូវឲ្យមានសោកនាដកម្មលើកនេះ។ នោះមានន័យថា ក្រុមហ៊ុនអាចដឹងថា ពីឡុត អម Andreas Lubitz មានបញ្ហាផ្លូវចិត្តហើយ ប៉ុន្តែ នៅតែបញ្ជូនឲ្យទៅបើកយន្តហោះទៀត។ នៅក្នុងករណីដែលគេរកឃើញថា ក្រុមហ៊ុនGermanwing មានចំណែកទទួលខុសត្រូវធ្វើឲ្យយន្តហោះធ្លាក់ នោះ គឺខាងក្រុមគ្រួសាររបស់ជនរងគ្រោះអាចប្តឹងទៅតុលាការ ដើម្បីទាមទារប្រាក់សំណង តាមចិត្តចង់បានរបស់ខ្លួន។
ក្នុងបទពិសោធន៍កន្លងមក ដូចជា ការធ្លាក់ យន្តហោះ បារាំង Concorde គ្រួសាររបស់ជនរងគ្រោះទាំង១០០នាក់ បានទទួលសំណងយ៉ាងតិច១លានអឺរ៉ូ។ លើកនេះ ក្នុងករណី របស់ក្រុមហ៊ុនGermanwing គេប៉ាន់ស្មានថា ក្រុមហ៊ុននឹងត្រូវចំណាយយ៉ាងតិច ១៥០លានអឺរ៉ូសម្រាប់បង់ជម្ងឺចិត្តឲ្យគ្រួសាររបស់ជនរងគ្រោះ។
តាមរបាយការណ៍របស់អាជ្ញាធរគ្រប់គ្រងអាកាសចរណ៍ស៊ីវិល អាល្លឺម៉ង់ ដែលបានទទួលឯកសារព័ត៌មានជាប់ជាប្រចាំពីក្រុមហ៊ុនLufthansa ពីឡុតអម Andreas Lubitzត្រូវបានគេសរសេរនៅក្នុងឯកសារពេទ្យរបស់ក្រុមហ៊ុនថា ត្រូវទទួលការតាមដានពិនិត្យសុខភាពជាប់ជាប្រចាំ និងអចិន្រ្តៃយ៍។ នេះសបញ្ជាក់ថា ក្រុមហ៊ុនដឹងថា Andreas Lubitzមានករណីសុខភាពចាំបាច់ដែលគេតាមដានជាពិសេស។
រឿងមួយទៀត ដែលគេគិតថា ក្រុមហ៊ុនហោះហើរ Lufthansa ដែលជាមេពីលើក្រុមហ៊ុនGermanwing អាចព្យាយាមលាក់បាំងព័ត៌មានគឺនៅត្រង់ថា ក្រុមហ៊ុនបានត្រឹមនិយាយថា ពីឡុត អម Andreas Lubitzធ្លាប់បានផ្អាក ការហាត់រៀនមួយរយៈ ប៉ុន្តែ ក្រុមហ៊ុនមិនបានបញ្ជាក់ដោយមូលហេតុអ្វីនោះទេ។ តាមកាសែតអាល្លឺម៉ង់ ជាច្រើន នៅក្នុងពេលផ្អាកការរៀនសូត្របើកយន្តហោះ នោះដែល មានរយៈពេលប្រមាណ ១ឆ្នាំ កន្លះ តាមពិត Andreas Lubitzកំពុងជួបជម្ងឺបាក់ទឹកចិត្តយ៉ាងធ្ងន់ធ្ងរ។ គេនឹងមិនជឿទេថា ក្រុមហ៊ុនLufthansa មិនដឹងថា Andreas Lubitz ជួបជម្ងឺផ្លូវចិត្តនោះ។ គេអាចបន្ទោសថា បើក្រុមហ៊ុនដឹងថា ពីឡុតអម ធ្លាប់មានជម្ងឺផ្លូវចិត្ត ហេតុអ្វីបានជានៅតែបណ្តោយឲ្យទៅបើកយន្តហោះទៀត។ ហើយបើក្រុមហ៊ុនមិនដឹង មានន័យថា ក្រុមហ៊ុនធ្វើការថ្លោះធ្លោយ មិនដឹងពីប្រវត្តិជម្ងឺរបស់បុគ្គលិករបស់ខ្លួន ដែលតាមពិតទៅជាអ្នកទទួលខុសត្រូវធំបំផុត លើអាយុជីវិតរបស់អ្នកដំណើរ នៅលើអាកាសនោះ។ ចង់ ឬមិនចង់ ក្រុមហ៊ុននៅតែគេចរួច ពីការបន្ទោស និងការទទួលខុសត្រូវទេ ក្នុងពេលមានគ្រោះថ្នាក់ធ្លាក់យន្តហោះបែបនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ